Ezechiel

9 Atunci vo dea cingar zurales ca me te așunav: „Te pașion codola cai va anena i pedeapsa opral o foro, fiesaves te avel-les ande lesco vast leschi arma mudarimaschi!”. 2 Hai dichlem șov murșa cai avenas catar i poarta de opral, cai del caring o nordo, fiesaves sas-les iech arma mudarimaschi ande lesco vast. Hai ande lengo mașcar sas iech murș cai sas pe leste iech hureaimos anda ino, iecha călimara de secretar po mașcar. Von avile hai așile ande pânrănde pașa o altaro anda harcum. 3 Pala codoia i gloria le Devleschi le Israeloschi vazdea-pe anda o than cai sas-li, de opral le heruvimi, hai gălea ando prago le chăresco. Hai vo dea cingar caring o murș hureado ando ino, cai sas-les iech călimara de secretar po mașcar. 4 O Iehova phendea lesche: „Nach prin o foro, prin o Ierusalimo, hai cher iech semno po cicat le manușengo cai roven hai sile duchade anda le buchia nasul cai cheren-pe ande lengo mașcar”. 5 Hai le coaverenghe phendea ca me te așunav: „Nachen pala leste prin o foro hai liman. Tumari iach te na sicavel mila hai nici te na sicaven îndurarea. 6 Mudaren le phures, le tărnes, le bare șeiorra, le șiaves hai la jiuvlea – mudaren le sasten! Tha te na pașion nici ieche manușestar cai siles o semno. Începosaren catar mânro sanctuaro”. Cadea că începosarde le phurența cai sas-le angla o chăr.