1 Samuel

2 Atunci o Saul vazdea-pe hai gălea tele caring o șuco than anda Zif le 3 000 murșența alosarde anda o Israelo caște rodel le Davidos ando șuco than anda Zif. 3 O Saul șiutea peschi tabăra pașa o drom, pi ciarlin Hachila, cai si angla o Ieșimon. O David beșelas atunci ando șuco than hai așundea că o Saul avilea pala leste ando șuco than. 4 Hai o David bișaldea chichiva manușen cioral caște dichen dacă o Saul avilea ciaces. 5 Pala codoia, o David gălea ando than cai o Saul șiutea peschi tabăra. Hai o David dichlea o than cai sovelas o Saul hai o Abner, o șiav le Nerosco, codo cai sas angla leschi armata. O Saul sovelas ando mașcar la tabăraco, hai i armata sas-li chidini pașa leste. 6 Atunci o David phendea caring o Ahimelec, o hetito, hai caring o Abișai, o șiav la Țeruiaco hai o phral le Ioabosco: „Con va jiala tele manța co Saul andi tabăra?”. O Abișai phendea lesche parpale: „Me va avela te jiav tele tusa”. 7 Cadea că, o David hai o Abișai găle andi tabăra pi riat hai arachle le Saulos sar sovelas ando mașcar la tabăraco. I sulița sas șiuti andi phuv ca lesco șăro, hai o Abner hai le soldați sovenas vi von chidine pașa leste. 8 O Abișai phendea atunci le Davidosche: „O Del dea aghies che dușmanos ande chio vast. Acana mech-man, mangav-tut, te lav i sulița hai te pusavav-les iech corcori data hai ci va mai trebula te cherav cadaia i duito data!”. 9 Tha o David phendea caring o Abișai: „Na cher lesche niciech nasulimos! Că con daștil te vazdel o vast opral o machlo le Iehovasco hai te așel nedoșalo?”. 10 O David mai phendea: „Jiuvindo si o Iehova că chiar o Iehova va dela-les dab sau va arăsăla o ghies cana va merela, sau va jiala co marimos hai va avela mudardo. 11 Anda codoia că jianav sar dichel o Iehova le buchia, dur mandar o gândo te vazdav mânro vast opral o machlo le Iehovasco! Hai acana le, mangav-tut, i sulița cai sili ca lesco șăro hai i cucii paieschi, hai av te tiliaras”. 12 Cadea că o David lea i sulița hai i cucii paieschi catar o șăro le Saulosco hai tiliarde. Chonic ci dichlea-len, chonic ci dine penghi sama că sas-le code hai chonic ci uștilea. Savore sovenas, anda codoia că o Iehova cărdea te perel iech bari lindr pe lende.