Matei
3 „Fericime sile codola cai jianen ande pengo ilo că silen nevoia te prinjianen le Devles, anda codoia că lengo si o Regato le cerosco! 4 Fericime sile codola cai lengo ilo silo duchado, anda codoia că lengo ilo va avela zuriardo! 5 Fericime sile codola blânzi, anda codoia că von va moștenina i phuv! 6 Fericime sile codola bochale hai trușale pala o ortomos, că von va avena ciailiarde. 9 Fericime sile codola cai cheren pacea, că von va avena numime «șiave le Devlesche»! 10 Fericime sile codola persecutime anda o ciacimos, că lengo si o Regato le cerurengo! 11 Fericime san tumen cana le manușa prasan tumen hai persecutin tumen hai phenen hohaimata hai sacon felo buchia jiungale contra tumenghe anda mânri cauza! 12 Bucurin tumen hai aven zurales voime, anda codoia că tumaro pochinimos si baro andel ceruri; anda codoia că cadea sas-le persecutime vi le profeți de angla tumende. 14 Tumen san i lumina la lumeachi. Iech foro șiuto pe iech plain ci daștil te avel garado. 15 Cana le manușa astaren iech lampa ci garaven-la, tha von len-la hai șion-la pi meseili, hai cadea voi strălucil opral sea codola anda o chăr. 16 Sa cadea, mechen ca tumari lumina te strălucil angla le manușa, ca von te dichen tumare lașe buchia cai cheren-len hai cadea von te den pachiv tumare Dadesche cai silo andel ceruri. 23 Cadea că, dacă anes chio daro co altaro hai code anes tuche amintea că che phrales siles vareso contra tute, 24 mech chio daro code, angla o altaro hai tiliar. Cher mai anglal pacea che phraleia hai pala codoia av parpale hai de chio daro. 28 Tha me phenav tumenghe că con încărel pesche iacha but timpo pe iech jiuvli cadea încât te camel-la, cărdea deja curvia laia ande pesco ilo. 29 Cadea că, dacă chi ciaci iach cherel-tu te peres, încalav-la hai șiude-la. Că si mai mișto te hasares iech cotor anda o corpo sar te avel șiudino sea chio corpo andi Gheena. 30 Hai dacă chio ciacio vast cherel-tu te peres, șin-les hai șiude-les. Că si mai mișto te hasares iech cotor anda o corpo sar te arăsăl sea chio corpo andi Gheena. 34 Tha me phenav tumenghe: Na solaharen niciechdata, nici po cerii, că si o trono le Devlesco, 35 nici pi phuv, că si o țâno scamin catar lesche pânre, nici po Ierusalimo, că si o foro le bare Regesco. 36 Te na solahares nici pe chio șăro, că ci daștis te cheres iech firo bal te avel parno sau calo. 37 Cana den duma, «da» te avel «da» hai «na» te avel «na», că so si phendo mai but sar cadala avel catar codo nasul. 43 Așundean că phendea-pe: «Te iubis che pașardes hai te urâs che dușmanes». 44 Tha me phenav tumenghe: Iubin mai dur tumare dușmanen hai manghen tumen le Devlesche anda codola cai phiraven-pe jiungales tumența, 45 caște sicaven că san șiave tumare Dadesche cai si ando cerii, anda codoia că vo del o cham vi pe codola nasul, hai vi pe codola lașe hai cherel te del o brâșând vi pe codola orta hai vi pe codola neorta.