Romani
12 Cadea că, mangav tumen zurales, phralale, prin i îndurarea le Devleschi, te anen tumare corpuri sar iech jertfa jiuvindi, sfânto hai plăcuto le Devlesche, cai te anen iech servicio sacro le zuralimaia tumara goghiaco. 2 Na mai mechen tumen îngărde cadala lumeatar, hai paruven tumen prin o nevimos tumara goghiaco, caște pachian corcore savi si i voința lași, plăcuto hai perfecto le Devleschi. 3 Cadea că, prin o lașimos nemeritime cai sas manghe dino, phenav fiesavesche mașcar tumende te na gândil anda peste mai but sar trebul, tha te gândil ande iech modo savo te sicavel că siles iech goghi sastevesti, fiesavo pala o pachiamos cai dea-les lesche o Del. 4 Că cadea sar amare corpos siles mai but părți, tha na savore cheren sa codoi buchi, 5 sa cadea vi amen, chiar cana sam but jene, sam iech corcoro corpo ando phanglimos le Cristosoia, hai, fiesavo anda amende, sam părți cai încăren iech averestar. 6 Cadea că, si amen diferime daruri, pala o lașimos nemeritime cai sas amenghe sicado. Cadea că, dacă si amen o daro te phenas profeții, te phenas profeții pala o pachiamos cai sas amenghe dino; 7 dacă si amen o daro te slujisaras averenghe, te slujisaras; dacă varecon sicavel averen, te del peschi zor te sicavel averen; 8 cana varecon zuriarel, te zuriarel mai dur; cana varecon hulavel averența, te cherel-la bare vasteia; cana varecon îndrumil i congregația te cherel-la anda sasto ilo; cana varecon sicavel lașimos, te cherel-la pherdo bucuria. 9 Na sicaven iech iubirea hohamni tha sicaven tumari iubirea anda ilo. Urân zurales o nasulimos; așen pașa so si mișto. 10 Andi iubirea phralicani, aven pherde afecțiunea tandro iech caring aver. Cana trebul te sicaven pachiv iech averesche, aven dintune. 11 Aven vreanici, na chandine. Aven pherde spirito. Slujin le Iehovasche sar sclavi. 12 Bucurin tumen andi speranța. Așen zurale andel pharimata. Cheren mai dur manglimata. 13 Den anda so si tumen codolenghe sfinți pala so silen nevoia. Aven sea o timpo ospitalieri. 14 Binecuvântin codolen cai persecutin tumen; binecuvântin, na den armaia. 15 Bucurin tumen codolența cai bucurin-pe, roven codolența cai roven. 16 Te gândin anda aver sa cadea sar gândin anda tumende. Na gândin tumen ca buchia uce, tha phiren pala buchia umilo. Na arăsăn goghiaver ande tumare iacha. 17 Na risaren parpale chanicasche nasul anda nasul. Încăren conto catar so pachian sea le manușa că si mișto. 18 Dacă daștil-pe, chichi încărel tumendar, aven andi pacea savore manușența. 19 Mânre cuci phrala, na risaren corcore o nasulimos, tha mechen le Devles te sicavel peschi holi, că si scriime: „«Me va avela te risarav o nasulimos, me va avela te pochinav», phenel o Iehova”. 20 Ba mai but, „cana chio dușmano silo bochalo, de-les te hal, cana silo trușalo, de-les te piel; anda codoia că, cana va avela te cheres cadea, va avela te șios thabarde angara pe lesco șăro”. 21 Na mech tut mardo catar o nasulimos, tha mar o nasulimos prin o miștimos.