Ezra

1 Ando iechto bărș cana o Cirus sas rege andi Persia, caște pherel-pe so phendea o Iehova prin o Ieremia, o Iehova uștadea o spirito le Cirusosco, o rege andai Persia, cadea că vo dea i porunca te scriil-pe hai te del-pe mai dur ande sea lesco regato le cuvintea cai aven: 2 „Ita so phenel o Cirus, o rege andai Persia: «O Iehova, o Del le cerurengo, dea-ma sea le regatea la phuveache hai phendea manghe te vazdav iech chăr co Ierusalimo, cai si andi Iuda. 3 Con mașcar tumende si anda lesco poporo? Lesco Del te avel leia hai vo te jial co Ierusalimo, cai si andi Iuda, caște vazdel pale o chăr le Iehovasco, o Del le Israelosco – vo silo o ciacio Del – , savesco chăr sas-lo ando Ierusalimo. 4 Oricon beșel sar străino, oricai avelas, te avel ajutime le manușendar anda codol thana hai te den-les rup, sumnacai, buchia hai animalea, pașa i ofranda dini anda sea o ilo anda o chăr le ciace Devlesco, cai sas-lo ando Ierusalimo»”.