Filipeni
4 Cadea că, mânre cuci phrala, savendar si manghe doro, mânri bucuria hai coroana, așen zurale ando Rai cadea sar phendem tumenghe, mânre iubime phrala! 2 Phenav caring i Evodia hai vi caring i Sintiche te avel len sa codoi gândirea ando Rai. 3 Da, mangav vi tut, sar iech lașio phral saveia cărdem buchi, te ajutis mai dur cadale jiuvlean cai cărde buchi phares ande iech than manța anda i vestea lași, le Clementoia hai vi averența casa cărdem buchi, savengo anav silo ando lil la viațaco. 4 Bucurin tumen sea o timpo ando Rai! Încă iech data phenav: Bucurin tumen! 5 Te aven prinjiande savore manușendar că mechen tumendar! O Rai silo pașă. 6 Na daran chancestar, tha ande orisavi buchi, prin manglimata zurale ande iech than mulțumirența, cheren prinjiande le Devlesche so camen tumen, 7 hai i pacea le Devleschi, cai si mai bari sar orisavo hachiarimos, va ferila tumaro ilo hai goghi prin o Cristos Isus. 8 Ando palutno than, phralale, sea so si ciaces, sea so meritil pachiv, sea so si orta, sea so si ujo, sea so meritil iubime, sea le buchia anda save del-pe duma de mișto, sea so si lașio hai sea so si demno așarimasco – cadala buchia te aven ande tumari goghi. 9 Le buchia cai sichilean-len hai, vi pachiaian-len, cai așundean-len hai cai dichlean-len anda mande, cadala te cheren-len, hai o Del la paceco va avela tumența. 11 Na phenav anda codoia că som cioro, că sichilem te avav mulțumime soia si man ande orisavi situația. 12 Jianav te traisarav vi cana sima țâra, vi cana sima but. Ande sea-l buchia hai ande sea-l situații sichilem o secreto sar te avav vi ciailo, vi bochalo, vi te avel-ma but buchia, vi te na avel-ma chanci. 13 Anda sea le buchia si man zuralimos prin codo cai del man zor. 16 Mai but, cana somas ando Tesalonic, bișaldean manghe vareso anda so sas man nevoia na numai iech data, tha dui-var 18 Tha si man sea so trebul-ma hai vi mai but. Ci lipsol manghe chanci, acana, că o Epafrodit dea-ma so tumen bișaldean manghe, iech mireasma gugli, iech jertfa lași te avel primime, cai placial le Devles.