Luca

1 Anda codoia că but jene camle te cheren iech lil anda le buchia cai amen pachias-len anda sea o ilo, 2 cadea sar sas amenghe phende codolendar cai, de mai anglal, dichle penghe iachența cadal buchia hai phende i duma le Devleschi, 3 cadea că vi me, pala so rodem mișto sea le buchia de mai anglal, alosardem te scriiv-len tuche, Teofil, manuș pachivalo, cadea sar întâmplosarde-pe ciaces iech pala aver, 4 caște jianes că le buchia cai așundean-len hai sas tuche sicade sile ciace. 5 Andel ghiesa cana o Irod sas rege andi Iudeea, code sas iech rașai po anav Zaharia, anda o grupo le Abiiasco. Leschi rromni sas iech andal șeia le Aaronosche hai bușiolas Elisabeta. 6 Le dui sas-le orta angla o Del, anda codoia că phirenas bi doșaco hai încărenas sea le porunci hai le legi le Iehovasche. 7 Tha len ci sas-len șiavorre, anda codoia că i Elisabeta ci daștilas te așel phari, hai vi le dui sas-le phure. 8 Iechdata, o Zaharia cherelas peschi buchi sar rașai pașa pesco grupo angla o Del. 9 Cadea sar sas mechlo le Devlestar andal rașaia, avilea lesco rândo te jial andre ando than sfânto le Iehovasco caște thabarel tămâia. 10 Co ceaso cana thabarelas-pe tămâia, savore manușa beșenas avri hai manghenas-pe. 11 Atunci o îngero le Iehovasco sicadea-pe le Zahariasche. Vo beșelas andi ciaci rig catar o altarii cai thabarelas-pe i tămâia. 12 Cana o Zaharia dichlea-les, lesco ilo astardea te marel zurales hai darailo. 13 Tha o îngero phendea lesche: „Na dara, Zaharia, anda codoaia că chio manglimos sas-lo așundo. Chi rromni, i Elisabeta, va cherela tuche iech șiavorro, hai si te șios lesco anav Ioan. 14 Va avesa bucurime hai zurales voime hai but jene va bucurina-pe catar leschi nașterea, 15 că vo va avela baro andel iacha le Iehovasche. Tha ci trebul te piel nici mol, hai nici aver pimos. Va avela pherdo spirito sfânto, angla so te cărdiol, 16 hai va cherela bute israelițen te aven parpale co Iehova, lengo Del. 17 Sa cadea, vo va jiala angla leste le spiritosa hai le zuralimasa cai sas le Ilies caște ortosarel o ilo le dadengo caring le șiave hai codolen cai ci așunen caring o goghiaverimos codolengo orta. Cadea, vo va pregătila iech poporo anda o Iehova”. 18 O Zaharia pușlea le îngeros: „Catar jianav că va avela ciaces? Că som phuro, hai mânri rromni si vi voi phuri”. 19 O îngero phendea lesche parpale: „Me som o Gabriel, cai beșel angla o Del, hai somas bișialdo te dav duma tusa hai te phenav tuche cadai vestea lași. 20 Tha dichta că va avela te așes muto hai ci va daștia te des duma ji ando ghies cana va avena cadal buchia, anda codoia că ci pachiaian mânre dumes, cai va pherena-pe co timpo alosardo”. 21 Ande cado timpo, le manușa ajucărenas le Zaharias hai astarde te pușen-pe sostar beșelas cadea de but ando than sfânto. 22 Cana avilo avri, vo ci daștilas te del duma. Atunci von dine penghi sama că o Del sicadea lesche vareso ando than sfânto. Vo sicavelas lenghe le vastența, tha ci daștilas te phenel chanci. 23 Cana nachle le ghiesa anda leschi buchi sfânto, vo gălea chăre. 24 Pala chichiva ghiesa, i Elisabeta, leschi rromni, așili phari hai beșlea garadi panji șiona; voi phendea: 25 „So bari buchi cărdea o Iehova anda mande ande cadal ghiesa! Vo dichlea caring mande caște chosel mânro lajiavo anda o mașcar le manușengo”. 26 Cana voi sas-li ando șiov-to șion, o îngero Gabriel sas-lo bișialdo le Devlestar ande iech foro anda Galileea, savo bușiolas Nazaret, 27 ca iech șei bari savi trebulas te avel dini sar rromni ieche murșesche po anav Iosif, anda o chăr le Davidosco. Laco anav sas Maria. 28 Cana gălea andre, o îngero phendea lache: „I pacea te avel tusa, jiuvli saveache sicadea-pe iech baro lașimos! O Iehova silo tusa”. 29 Voi darailea zurales cana așundea-les hai delas peschi zor te hachiarel le dumes cai phendea-len cana dea-la ghies. 30 Atunci o îngero phendea lache: „Na dara, Maria, că arachlean lașimos angla o Del! 31 Dichta, si te așes phari hai va avela te cheres iech șiavorro. Si te șios lesco anav Isus. 32 Vo va avela baro hai va phenela-pe anda leste că si o Șiav Codolesco o Mai Baro, hai o Iehova Del va dela lesche o trono le Davidosco, lesco dad. 33 Vo va raila sar Rege opral o chăr le Iacobosco anda sea o timpo hai lesche Regatos ci va avela-les sfârșito”. 34 Tha i Maria phendea le îngerosche: „Sar va avela cadai buchi? Că me ci somas nicieche murșesa”. 35 O îngero phendea lache parpale: „O spirito sfânto va avela opral tute hai o zuralimos le Bare Devlesco va pachiarela tut sar iech ucial. Anda codoia, codo cai va cărdiola va avela sfânto, o Șiav le Devlesco. 36 Hai dichta că chio neamo, i Elisabeta, ajucărel vi voi iech șiavorro, chiar cana si phuri. Anda late phenelas-pe că ci daștil te așel phari. Tha acana si ando șiov-to șion, 37 anda codoia că anda o Del na-i chanci pharo”. 38 Atunci i Maria phendea: „Dichta, i sclava le Iehovaschi! Te cherel-pe manghe cadea sar phendean”. Pala codoia, o îngero tiliardea latar. 39 Ande codola ghiesa, i Maria tiliardea dromeste hai sighiardea te jial caring o than plainalo, ande iech foro anda Iuda. 40 Voi gălea andre ando chăr le Zahariasco hai dea ghies la Elisabeta. 41 Cana i Elisabeta așundea că i Maria dea-la ghies, o șiavorro hutea ande laco păr. Hai i Elisabeta pherdili spiritosa sfânto 42 hai phendea bare mosa: „Binecuvântime san tu mașcar le jiuvlea hai binecuvântime si o șiavorro anda chio păr! 43 Con som me te sicavel-pe manghe cadai bari pachiv te avel mande i dei mânre Raieschi? 44 Că dichta, sar așundem chio glaso că dean man ghies, o șiavorro hutea ande mânro păr bucuriatar. 45 Fericime si vi codoia cai pachiaia, că sea le buchia cai sas lache phende le Iehovastar va pherena-pe ciaces”. 46 Hai i Maria phendea: „Me așarav le Iehovas 47 hai mânro ilo bucuril-pe zurales but ando Del, mânro Salvatorii, 48 că vo dichlea tele caring mande, leschi ciori sclava. Hai dich, de acanara angle, savore manușa va phenena manghe că som fericime, 49 anda codoia că o Del zuralo cărdea bare buchia anda mande hai sfânto si lesco anav. 50 Catar iech generația ca aver generația, vo sicavel mila codolenghe cai daran lestar. 51 Vo cărdea bare buchia pesche zurale vastesa hai dea rigate codolen cai sile baricane ande pengo ilo. 52 Dea tele pa-l tronuri manușa zurale hai vazdea opre codolen ciore; 53 ciailiarde codolen bochale buchianța lașe hai bișialdea codolen barvale bi te del-len chanci. 54 Vo avilo ando ajutorii le Israelosco, lesco slujitorii, cadea sar phendea amare phurenghe hai ci bâstărdea te sicavel peschi mila 55 caring o Avraam hai lesche șiave anda sea o timpo”. 56 Hai i Maria așilea la Elisabetasa cam trin șiona, pala codoia gălea chăre. 57 Hai avilea o timpo ca i Elisabeta te năștil; voi cărdea ieche șiavorres. 58 Cana le vecini hai lache neamuri așunde anda i bari mila cai sicadea-la lache o Iehova, von bucurisarde-pe lasa. 59 Ando ohto-to ghies, von avile te șinen împrejur le șiavorres hai camenas te șion lesche o anav lesche dadesco, Zaharia. 60 Tha leschi dei phendea: „Na, va bușiola Ioan”. 61 Atunci von phende lache: „Chanicas anda chio neamo nai-les cado anav”. 62 Pala codoia, von pușle lesche dades prin semnea so anav camelas te del le șiavorres. 63 Vo manglea iech tăblița hai scriisardea: „Ioan si lesco anav”. Hai savore mirinas-pe. 64 Pe thaneste, lesco mui pâtărdilo, leschi șib dea-pe drom hai vo astardea te del duma hai așarelas le Devles. 65 Savoren cai beșenas pașa lende lea-len i dar, hai anda cadal buchia astardea te del-pe duma ande sea o than plainalo anda Iudeea. 66 Hai savore cai așunenas încărenas-len ando ilo hai pușenas-pe: „So va arăsăla cado șiavorro?”. Că o zuralo vast le Iehovasco sas ciaces lesa. 67 Atunci o Zaharia, lesco dad, pherdilo spiritosa sfânto hai astardea te phenel le dumes le Devlesche: 68 „Așardo te avel o Iehova, o Del le Israelosco, anda codoia că vo dichlea caring pesco poporo hai scăpisardea-les! 69 Vo dea amen iech zuralo salvatorii ando chăr le Davidosco, lesco slujitorii, 70 cadea sar phendea prin lesche manușa sfinți andal purane ghiesa, 71 caște salvil amen amare dușmanendar hai anda o vast savorengo cai urân amen. 72 Vo cărdea cadaia caște sicavel mila, cadea sar phendea amare phurenghe, hai caște sicavel că ci bâstărdea pesco legământo sfânto 73 cai solahardea-les amare bare paposche o Avraam. 74 Prin cado solaharimos, vo va dela amen, pala so va scăpila amen andal vasta le dușmanenghe, i bari pachiv te cheras anda leste iech buchi sfânto bi daraco, 75 loialo hai sar si mișto angla lesche iacha, ande sea amare ghiesa. 76 Hai tu, șiavorre, si te aves o profeto Codolesco o Mai Baro, că tu si te jias angla o Iehova caște lașiares lesco drom, 77 caște cheres prinjiando lesche poporosche că va avela salvime cana lenghe păcatea va avena chosle, 78 prin i bari mila amare Devleschi. Prin cadai mila, opral amende va avela i bari lumina le ghieseschi 79 caște cherel lumina opral codola cai beșen ando tunearico hai andi ucial le merimaschi hai caște îngărel amare pânre po drom la paceaco”. 80 O șiavorro barilea hai cărdilo iech tărno goghiaver. Hai vo beșlea mai dur ando șuco than ji ando ghies cana sicadea-pe le Israelosche.