Psalmii
26 An chi cris opral mande, o, Iehova, anda codoia că phirdem bidoșaco angla tute, pachiaiem-ma ando Iehova bi te încărav-ma parpale! 2 Rode ande mande, o Iehova, hai zumav man, ujiar mânro ilo hai mânre mai garade gânduri! 3 Anda codoia că chi iubirea loialo si sea o timpo angla mande, hai me phirav ande chio ciacimos. 4 Ci beșav le manușența cai athaven hai așiav dur codolendar cai garaven con sile. 5 Urâv te beșav codolența nasul hai încărav-ma parpale te așiav pașa codola cai cheren o nasulimos. 6 Va avela te halavav mânre vasta caște sicavav că ci som doșalo hai va avela te phirav pașa chio altarii, o, Iehova, 7 caște cherav te așunel-pe so but naisarav tuche hai te phenav sea le șucar buchia cai cărdean-len. 8 Iehova, iubisarav o chăr ande savo beșes, o than ande savo beșel chi bari pachiv. 9 Na mudar-ma ande iech than codolența păcătoși, na le mânri viața ande iech than le manușența nasul, 10 savenghe vasta cheren buchia lajiavune hai savengo ciacio vast si pherdo mita! 11 Tha me va avela te phirav vi mai dur bidoșaco pe mânro drom. Hastrav-man hai sicav manghe lașimos! 12 Mânro pânro așel po than orta; va avela te așarav le Iehovas andi bari congregația.