Matei
18 Ande codo momento, le discipoli pașile le Isusostar hai pușle-les: „Con si o mai baro ando Regato cerisco?”. 3 hai phendea: „Ciaces phenav tumenghe că, dacă ci paruven tumen hai ci cărdion sar niște șiavorre, nicisar ci va avela te jian andre ando Regato cerisco. 10 Len sama te na prasan nicieches anda cadal țânorre, că phenav tumenghe că lenghe îngeri, ando cerii, dichen sea o timpo i fața mânre Dadeschi, cai silo ando cerii. 12 So pachian? Dacă ieche manușes siles 100 bacrea hai iech anda lende hasardiol, ci va mechela vo codolen 99 pe plaina hai ci va jiala te rodel codola hasardi? 13 Hai, cana arachela, ciaces phenav tumenghe că bucuril-pe mai but latar sar codolendar 99, cai ci hasardile. 14 Sa cadea, mânro Dad, cai silo ando cerii, ci camel te hasardiol ci barem iech anda cadal țânorre. 15 Cana chio phral cherel vareso cai duchavel chio ilo, jia hai phen lesche so duchadea tut cana san numai tu hai vo. Dacă așunel tut, ajutisardean che phrales te cherel so si mișto. 16 Tha, cana ci așunel, mai le tuia iech jeno sau dui, ca orisavi buchi te avel phendi prin dui sau trin martori. 17 Cana ci așunel lendar, de duma la congregațiaia. Cana nici la congregațiatar ci așunel, te avel anda tute sar iech manuș andal națiuni hai sar iech cai lel impozito. 18 Ciaces phenav tumenghe să sea so va avela te phanden pi phuv va avela deja phanglo ando cerii hai sea so va pâtrena pi phuv va avela deja pâtărdo ando cerii. 21 Atunci o Petru pașilo hai phendea lesche: Raia, chichivar daștil mânro phral te păcătuil caring mande hai me te iertiv-les? Ji 7 var?” 22 O Isus phendea lesche: „Me phenav tuche: Na ji 7 var, tha ji 77 var. 23 Ita sostar o Regato le cerurengo daștil te ameal ieche regeia cai camlea te phandavel le camimata pesche sclavența. 24 Cana astardea te cherel cadai buchi, sas andino angla leste iech manuș cai trebulas te del lesche 10 000 talanți. 25 Tha, anda codoia că o manuș ci daștilas te pochinel lesche parpale le love, o rai phendea te aven bichinde vo, leschi rromni, lesche șiave hai sea so sas-les, caște pochinel lesche o camimos. 26 Atunci o sclavo pelea tele ca i phuv, dea cianga angla leste hai phendea: «Av răbdătorii manța hai va avela te pochinav tuche sea». 27 Pherdo mila, lesco rai mechlea-les te jial hai choslea cu sea lesco camimos. 28 Tha o sclavo înclistea hai arachlea avere sclavos, cai trebulas te del lesche 100 dinari. Șiutea o vast pe leste, astardea te chichidel-les coratar hai phendea lesche: «De parpale mânre love!». 29 Ocoaver sclavo pelea tele ca i phuv hai astardea te manghel-les anda sea o ilo: «Av răbdătorii manța, hai va avela te pochinav tuche». 30 Tha vo ci camlea, mai but tilardea hai șiutea te avel șiudino ando phandaimos ji cana avelas te pochinel sea o camimos. 31 Cana dichle cadaia, le coaver sclavi sas-le zurales duchade hai găle te phenen le raiesche sea so sas. 32 Atunci lesco rai achardea-les hai phendea lesche: «Sclavo nasul, me choslem sea chio camimos cana manglean mandar anda sea o ilo cadaia». 33 Ci trebulas te sicaves vi tu mila le coavere sclavosche, cadea sar vi me sicadem tuche mila?». 34 Hai, holiardo, lesco rai dea-les ando vast codolenghe cai lenas sama po phandaimos ji cana avelas te pochinel lesche parpale sea so trebulas. 35 Sa cadea va cherela vi mânro Dad cerisco cana fiesavo anda tumende ci va iertila anda ilo pesche phrales”.