Psalmii

119 Fericime sile codola cai sile bidoșaco pe lengo drom, cai phiren pala i legea le Iehovaschi. 2 Voime si codola cai încăren le buchia cai o Iehova anel-len amintea, codola cai roden-les anda sea o ilo. 9 Sar daștil iech tărno te încărel ujo pesco drom? Dacă așel atento hai cherel cadea sar phenel chio cuvânto. 10 Rodav tut sea mânre ileia. Na mech man te duriarav man catar che porunci. 18 Pâtăr mânre iacha caște dichav mișto le bare buchia anda chi legea. 24 Iubisarav le buchia cai anes-len manghe amintea; von ajutin man te jianav so te cherav. 31 Încărav ande mânro ilo le buchia cai anes-len manghe amintea. O, Iehova, caște na avav perado! 32 Va avela te phirav anda sea o ilo po drom cai sile che porunci, anda codoia că buhliares mânro ilo. 34 De man hachiarimos, caște așiav ande chi legea hai te încărav-la sea mânre ileia! 36 Banghiar mânro ilo caring le buchia cai anes-len manghe amintea, na caring le buchia cai camav-len. 37 Le mânre iacha le buchiandar cai nai-le lașe; încăr man andi viața pe chio drom. 45 Va avela te phirav andi siguranța, că rodav che porunci. 50 Cadaia sastiarel-ma ande mânro pharimos, anda codoia că che dumes încărde-ma andi viața. 51 Codola baricane prasan-ma zurales, tha me ci duriarav-ma catar chi legea. 52 Anav manghe andi goghi che purane hotărâri judecătorești, o, Iehova, hai arachav sastiarimos anda mânro ilo ande lende. 59 Dichlem mișto mânre droma caște risarav mânre pânre caring le buchia cai anes-le manghe amintea. 60 Sighiarav hai ci mechav pe aver data te încărav che porunci. 61 Le dorea le nasulenghe sile pe mande, tha me ci bâstrav chi legea. 63 Som o amal savorengo cai daran tutar hai codolengo cai încăren che porunci. 66 Sicav-ma te gândisarav sastevesto hai de man prinjianimos, că șiutem mânro pachiamos ande che porunci! 71 Si mișto că somas ando pharimos, că cadea sichilem so manghes tu mandar. 76 Mangav tut, ca chi iubirea loialo te anel manghe mângâierea, cadea sar promitisardean che manușesche! 81 Abia ajucărav chi salvarea, că șiutem mânri speranța ande chio cuvânto. 96 Dichlem că sea so si perfecto terminil-pe, tha chi porunca ci terminil-pe. 97 Ce but iubisarav chi legea! Gândiv-ma late sasto ghies. 99 Si man mai but prinjianimos sar sea mânre sicaitoren, anda codoia că gândiv-ma ca le buchia cai anes-le manghe andi goghi. 103 So gugle sile che dumes anda o cerii mânre muiesco, mai gugle sar i avghin anda mânro mui! 105 Chio cuvânto si iech lampa anda mânro pânro hai iech lumina pe mânri rig. 112 Camav anda sea o ilo te încărav che dispoziții sea o timpo, ji co sfârșito. 113 Urâv codolen cai lengo ilo silo hulado, tha iubisarav chi legea. 127 Anda codoia iubisarav che porunci mai but sar o sumnacai, chiar mai but sar o ujo sumnacai. 128 Cadea că, dichav orta orisavi porunca cai avel tutar; urâv orisavo drom nasul. 130 Cana cheres prinjiande che dumes, anes lumina hai des goghiaverimos codolen cai nai-len. 133 Cher mânre pași zurale prin che cuvintea; niciech buchi nasul te na șiol stăpânirea pe mande. 138 Le buchia cai anes-le amenghe amintea sile orta hai daștin te aven pachiame cu sea. 159 Dich ce but iubiv me che porunci! O, Iehova, încăr-ma andi viața, anda chi iubirea loialo! 160 Sea so si ande chio cuvânto si o ujo ciacimos hai sea che hotărâri judecătorești, cai sile orta, încăren veșnico. 161 Le prinți persecutin-ma bi te aven-le iech motivo, tha ande mânro ilo si iech dar pherdi respecto caring che cuvintea. 163 Urâv o hohaimos, ci daștiv te dichav-les, tha iubisarav chi legea. 164 Așarav-tu efta-var ande iech ghies anda che orta hotărâri judecătorești. 165 Codolen cai iubin chi legea silen but pacea; chanci ci daștil te cherel-le te poticnin-pe. 167 Lav sama ca le buchia cai anes-le manghe amintea hai iubisarav-le zurales but. 168 Încărav che porunci hai le buchia cai anes-le manghe amintea, anda codoia că tu jianes sea so cherav. 176 Duriardem-ma sar iech bacri hasardi. Rode che slujitores, anda codoia că ci bâstărdem che porunci.