1 Petru
5 Anda codoia că vi me som phuro, cai dichlem le ducha prin save nachlea o Cristos hai lav partea ca i gloria cai va avela sicadi, mangav le phuren anda tumaro mașcar: 2 Păstorin i turma le Devleschi, cai sili ande tumari grija, hai slujin sar supraveghetori, na oblighime, tha că tumen camen angla o Del; na că iubin o câștigo neciacio, tha anda sea o ilo, 3 na sar unii cai sile opral codola cai sile i moștenirea le Devleschi, tha cărindoi exemplea anda i turma. 4 Hai cana o mai baro păstoro va avela sicado, va avela tumenghe dini i coroana la gloriachi, cai ci șiuchiol-pe. 5 Sa cadea, tumen, murșa mai tărne, te aven supuso le phure murșenghe. Tha sea te hureaven tumen umilințaia iech caring aver, anda codoia că o Del, așel contra codolenghe cai den-pe bare, tha del lașimos nemeritime codolenghe cai sile umili. 6 Cadea că, mechen tumen tela o zuralo vast le Devlesco, caște vazdel tumen co timpo lașio, 7 hai șiuden sea tumare phare gânduri pe leste, anda codoia că les duchal-les tumendar. 8 Așen uștiade, len sama! Tumaro dușmano, o Beng, phirel angle hai pale sar iech leo cai răcnil, hai rodel te hal varecas. 9 Tha așen contra lesche zurale ando pachiamos, că jianen că sea le phrala andai lumea nachen prin sea codola ducha. 10 Tha, pala soste va suferina iech țâra timpo, o Del orisave lașimasco nemeritime, cai achardea tumen ca leschi gloria veșnico andi unitatea le Cristosoia, chiar vo va avela te îngărel sfârșitoste tumari formarea. Vo va cherela tumen fermi, va zuriarela tumen, va ajutila tumen te na peren.