Marcu
6 Tha, le începutostar la creațiaco «Vo cărdea-le murș hai jiuvli» 7 hai, «anda codoia va mechela o murș pesche dades hai pesca deia, 8 hai le dui va avena iech corcoro mas». Cadea, ci mai sile dui, tha iech corcoro mas. 9 Cadea că so șiutea o Del ande iech jugo o manuș te na hulavel”. 17 Ando timpo so jialas pe pesco drom, iech murș nașlea hai pelea andel cianga angla leste hai pușlea-les: „Lașe Sicaitorina, so trebul te cherav caște avel man viața veșnico?”. 18 O Isus phendea lesche: „Sostar phenes manghe că som lașio? Chonic na-i lașio, numai iech corcoro: o Del. 19 Prinjianes le porunci: te na mudares, te na cheres curvia, te na ciores, te na șios mărturia hohamni, te na athaves, te des pachiv che dadesche hai chia deiache”. 20 O manuș phendea lesche: „Sicaitorina, sea cadala încărav-len anda mânro tărnimos”. 21 O Isus dichlea caring leste hai simțosardea iubirea anda leste; hai phendea lesche: „Iech corcori buchi mai trebul tuche: Jia, bichin sea so si tut hai de le love le ciorenghe, hai cadea va avela tut iech barvalimos ando cerii. Pala codoia av pala mande”. 22 Tha, cana așundea cadal buchia, o manuș sas-lo duchado hai tiliardea le ilesa phagărdo, că sas-les but barvalimata. 23 Pala so dichlea pașa peste, o Isus phendea pesche discipolenghe: „So pharo va avela anda codola cai silen love te jian andre ando Regato le Devlesco!”. 29 O Isus phendea: „Ciaces phenav tumenghe că na-i chonic cai mechlea chăr sau phrala sau pheia sau dei sau dad sau șiave sau phuvea anda mande hai anda i vestea lași 30 hai te na primil 100 var mai but acana, ande cado timpo – chăra hai phrala hai pheia hai deia, șiave hai phuvea ande iech than persecuțiența – , hai ando sistemo cai avel, viața veșnico. 43 Mașcar tumende ci trebul te avel cadea. Mai but, con camel te avel baro mașcar tumende trebul te slujil tumenghe 44 hai oricon camel te avel o iechto mașcar tumende trebul te slujil savorenghe. 45 Anda codoia că nici o Șiav le manușesco ci avilea te slujil-pe lesche, tha te slujil hai te del peschi viața sar răscumpărarea anda butende”.