Evrei

2 Na bâstren te primin anda ilo averen tumende chăre că aver cana cărde cadaia, bi te jianen, încărde ande pengo chăr îngeren. 3 Gândin tumen ca codola cai sile phandade sar cana san phandade lența hai codolende cai sile marde hai zurales duchade sar cana vi tumen nachen prin sea cadal ducha. 4 I căsătoria te avel pachivali anda savore hai o pato la căsătoriaco te na avel meliardo, anda codoia că o Del va judechila le manușen imorali hai codolen adulteri. 5 Tumaro phiraimos la viațaco te avel bi te iubin le love, hai te aven mulțumime sosa si tumen. Că vo phendea: „Niciechdata ci va avela te mechav tut, hai niciechdata ci va avela te duriarav man tutar”. 6 Cadea, daisaras te avas pherde tromai hai te phenas: „O Iehova si mânro ajutorii; ci va avela te darav. So daștil te cherel manghe o manuș?”. 7 Anen tumenghe andi goghi codolendar cai sile angla tumende, cai phende tumenghe i duma le Devleschi, hai dichen cai arăsle prin pengo phiraimos, sichion lendar te avel tumen iech pachiamos sar lengo! 15 Prin leste te anas sea o timpo le Devlesche iech jertfa anda așarimos, adică o rodo amare uștengo, cai phenel angla sea le manușa lesco anav. 16 Pașa cadaia, na bâstren te cheren o miștimos hai te den vi averen anda so si tumen, că le Devles ciaiol-les but cana cheren cadaia. 17 Așunen codolendar cai sile angla tumende hai cheren so phenen tumenghe von, anda codoia că len sama tumendar sea o timpo hai von va trebuna te phenen angla o Del so cărde. Cadea, va cherena cadai buchi bucuriasa, na phare ilesa, că avelas ande tumaro hasarimos. 18 Manghen tumen vi mai dur anda amende, că pachias ciaces că si amen iech conștiința uji hai camas te phiravas-ame pachivales ande sea le buchia.