Matei
6 Len sama te na sicaven tumaro ortomos angla le manușa caște aven dichle lendar. Anda codoia, că cadea ci va avela tumen nici iech pochinimos tumare Dadestar, cai silo andel ceruri. 7 Cana manghen tumen le Devlesche, te na phenen sa codol buchia de fiesavi data, sar cheren le manușa andal națiuni, că von pachian că va avena așunde că phenen but dumes. 8 Cadea că, te na aven sar von, anda codoia că tumaro Dad jianel so trebul tumenghe angla ca tumen te manghen lestar. 9 Tumen cadea te manghen tumen: «Amaro Dad cai san andel ceruri, te avel sfințome chio anav. 10 Te avel chio Regato. Te cărdiol-pe chi voia, cadea sar ando cerii, vi pi phuv. 11 De amen aghies amaro manro anda cado ghies 12 hai chos amare camimata, cadea sar vi amen chosleam le camimata codolenghe cai sas-le amenghe camade. 13 Hai na îngăr amen ando zumaimos, tha ferisar amen codolestar nasul». 14 Că cana iertin le manușenghe greșeli, vi tumaro Dad andal ceruri va iertila tumen, 15 tha, cana ci iertin le manușenghe greșeli, nici tumaro Dad ci va iertila tumare greșeli. 19 Ci mai chiden tumenghe somnacai pi phuv, cai hal i molia hai i rugina hai le cior phaghen hai cioren. 20 Mai mișto, den tumari zor te cheren buchia anda o Del caște chiden tumenghe barvalimata ando cerii, cai nici le cărme hai nici i rugina ci daștin te han-len hai le cior ci daștin te cioren-len tumendar. 21 Anda codoia că, cai si chio somnacai code va avela vi chio ilo. 22 I lampa le corposchi si i iach. Cana chi iach sili ortosardi caring iech corcori buchi, sea chio corpo va avela pherdo udud. 25 Anda codoia phenav tumenghe: Na mai daran anda tumari viața, anda so va hana sau so va piena, hai so va lena pe tumende. Ci si mai cuci tumari viața sar o haben hai o hureaimos cai len-les pe tumende? 26 Dichen le ciriclea: von ci șion semințea andi phuv, ci chiden so barilea anda lende hai nici na șion vareso de iech rig, cu sea cadala, tumaro Dad andal ceruri del-len te han. Ci san tumen mai cuci sar von? 27 Con mașcar tumende, dacă îngrijoril-pe, daștil te cherel mai lungo peschi viața vi numai iech țâra? 28 Hai sostar îngrijorin tumen anda o hureaimos? Sichion catar le lulughia pa o plai, dichen sar barion: ci chinion hai nici na suven, 29 tha phenav tumenghe că nici chiar o Solomon, ande sea peschi gloria, ci sas-lo huriado sar iech anda lende. 30 Dacă cadea huriavel o Del le lulughia le plaiesche, cai aghies sile hai tehara sile șiudine ando bov, ci va huriavela vo cadicheia mai but tumen, manușa cai si tumen țâra pachiamos? 31 Cadea că, na îngrijiorin tumen niciechdata, hai na phenen: «So va haia?» sau «So va avela te pias?» sau «So va avela te las pe amende?». 32 Anda codoia că, sea cadala si buchia pala save le manușa le națiunenghe phiren zurales. Tumaro Dad cerisco jianel că trebul tumen sea cadala. 33 Cadea că, roden sea o timpo te șion po iechto than ande tumari viața o Regato hai Lesco ortomos hai sea cadal buchia va avena tumenghe șiute opral. 34 Anda codoia, na îngrijorin tumen niciechdata anda o ghies de tehara, că le ghieses de tehara va avela-les lesche îngrijorări. Arăsăl fiesave ghieses lesco pharimos.