Ioan

11 Iech manuș po anav Lazăr sas-lo nasfalo; vo sas-lo andai Betania, o gav la Mariaco hai la Martaco, lachi phei. 2 Cadaia sas i Maria cai șiordea uleio cai chandelas șucar po Rai hai choslea lesche pânre lache balența; laco phral, o Lazăr, sas codo nasfalo. 3 Lesche pheia bișalde te phenel-pe le Isusosche: „Raia, ita că codo caste încăres but silo nasfalo”. 11 Pala soste phendea cadala buchia, mai phendea: „O Lazăr, amaro amal sovel, tha jiav te uștiavav-les”. 12 Le discipoli phende lesche: „Raia, dacă sovel, va avela te cărdiol mișto”. 13 Cu sea cadala, o Isus camlea te phenel că vo mulea, tha von pachiaie că dea duma anda o fapto că sovel, sar sovel o manuș. 14 Atunci o Isus phendea lenghe claro: „O Lazăr mulea”. 19 But iudei avile ca Marta hai ca Maria caște zuriaren-len anda codoia că mulea lengo phral. 21 I Marta phendea le Isusosche: „Raia, dacă avileanas cade, mânro phral ci merelas. 22 Hai vi acana, jianav că sea so manghes le Devlesche, o Del va dela-tu”. 23 O Isus phendea lache: „Chio phral va uștela andal mule”. 24 I Marta phendea lesche: „Jianav că va uștela andal mule le jiuvindimaste, ando ghies de palal”. 25 O Isus phendea lache: „Me som o jiuvindimos hai i viața. Con sicavel pachiamos ande mande, chiar dacă merel, va avela pale viațate 26 hai oricon trail hai sicavel pachiamos ande mande ci va merela niciechdata. Pachias tu cadai buchi?”. 27 Voi phendea lesche: „Da, Raia, pachiav că tu san o Cristoso, o Șiav le Devlesco, codo cai trebuisardea te avel andi lumea”. 32 I Maria arăslea ando than cai sas o Isus hai, cana dichlea-les, pelea ca lesche pânre hai phendea lesche: „Raia, dacă avileanas cade, mânro phral ci merelas”. 33 Cana dichlea-la că rovel hai cana dichlea că rovenas vi le iudei cai avile late, o Isus ruia ande peste hai sas-lo zurales duchado. 34 Vo pușlea: „Cai șiutean-les?”. Hai phende lesche: „Raia, av te diches”. 35 Le Isusosche dine lesche asfa. 36 Atunci le iudei phende: „Ita chichi de but încărdea leste!”. 38 Pala so ruia ande peste, o Isus gălea co mormânto, cai sas, de fapt, iech peștera. Pe late sas șutino iech bar. 39 O Isus phendea: „Șion de iech rig o bar!”. I Marta, i phei le muleschi, phendea lesche: „Raia, si te chandel deja, că si o ștarto ghies”. 40 O Isus phendea lache: „Ci phendem tuche că, dacă va avela te pachias, va dicheia i gloria le Devleschi?” 41 Atunci șiute de iech partea o bar. O Isus vazdea pesche iacha caring o cerii hai phendea: „Dade, mulțumiv tuche că așundean-ma. 42 Si ciaces, jianav că de fiesavi data așunes-ma, tha dav duma datorime le manușenghe cai sile pașa mande, caște pachian că tu bișaldean-ma”. 43 Pala so phendea cadal buchia, dea cingar zurales: „Lazăr, av avri!”. 44 Hai o manuș cai sas mulo avilo avri, le pânrența hai le vastența phangle cotorența hai leschi fața phandadi ande iech pohtan. O Isus phendea lenghe: „Pâtren-les hai mechen-les te jial!”.