1 Petru
6 Anda codoia, bucurin tumen but, chiar cana anda țâra timpo trebun te nachen prin mai but zumaimata, 7 ca tumaro pachiamos zumado cadea – but mai cuci sar o sumnacai cai hasardiol, chiar cana silo zumado prin iag – te avel iech motivo anda așarimos, gloria hai pachiv cana va sicavela-pe o Isus Cristos. 8 Chiar cana ci dichlean-les niciechdata, iubin-les. Chiar cana acana ci dichen-les, sicaven pachiamos ande leste hai bucurin tumen but, simțosaren iech bucuria pherdi pachiv cai ci daștil te avel phendi prin dumes, 9 anda codoia că arăsăn ca o miștimos cai anel-les tumaro pachiamos, tumari salvarea. 13 Cadea că pregătin tumari goghi anda i buchi cai si tumen te cheren, așen uștiade, șion tumaro pachiamos ando lașimos nemeritime cai va avela tumenghe dino cana va sicavela-pe o Isus Cristos. 14 Sar niște șiave asculători, na mai mechen ca le dorințe cai sas tumen mai anglal cana ci prinjianenas o ciacimos te paruvel tumen, 15 tha, cadea sar si Codo Sfânto, savo achardea tumen, aven vi tumen sfinți ande sea tumaro phiraimos, 16 că si scriime: „Aven sfinți, că me som sfânto!”. 18 Că tumen jianen, că na buchianța cai nachen, rupesa hai sumnacaiesa, sanas scăpime anda tumaro modo viațaco hasardo cai sas tumenghe dino sar tradiția tumare phurendar, 19 tha, ieche cuci ratesa, sar ieche bacresco bi doșaco hai bi defectosco, le ratesa le Cristososco. 22 Acana, că ujardean tumen prin i ascultarea anda o ciacimos, so îngărdea ca iech afecțiunea phralicani nehohamni, iubin tumen zurales iech averes, anda ilo.