Isaia
13 Anda codoia, cadea phenel o Rai Suverano Iehova: „Ita, mânre slujitori va hana, tha tumen va avena bochale! Ita, mânre slujitori va piena, tha tumen va avena trușale! Ita, mânre slujitori va bucurina-pe, tha tumen va avena cărde lajiavestar! 14 Ita, mânre slujitori va dena cingar anda codoia că lengo ilo va avela pherdo bucuria, tha tumen va avena te den cingar că tumaro ilo silo duchado hai va avena te rovaren tumen că tumaro spirito silo phagărdo. 16 cadea că, con va rodela iech binecuvântarea anda peste pi phuv va avela binecuvântime le Devlestar le ciacimasco hai con va cherela iech solaharimos pi phuv va solaharela po Del le ciacimasco. Că le pharimata de aver data va avena bâstărde hai va avena garade angla mânre iacha. 17 Anda codoia că, dich, me cherav ceruri neve hai iech phuv nevi hai chonic ci va anela pesche amintea le buchiandar cai nachle, hai ci va mai avena parpale ande chanicasco ilo. 18 Cadea că, aven voime hai bucurin tumen anda sea o timpo anda so cherav. Că, ita, me cherav ca o Ierusalimo te avel iech motivo sostar te bucurin tumen hai lesche manușen te aven iech motivo sostar te aven voime. 19 Va avela te bucuriv man anda o Ierusalimo hai mânro ilo va avela voime anda mânre manușa. Ci va mai așunela-pe ande leste nici roimos, hai nici cingar duchatar”. 20 „Ci va mai avela code șiavorro cai piel thud savo te trail numai chichiva ghiesa, nici phuro manuș cai te na pherel pesche ghiesa, anda codoia că codo cai va merela ca iech șăl bărș va avela dichlo sar iech șiavorro, hai o păcătoso, chiar cana va avela-les iech șăl bărș, va avela dino armai. 21 Va cherena chăra hai va beșena ande lende, va șiona andi phuv răza hai va hana lengo rodo. 22 Ci va cherena chăra ca aver choniva te beșel ande lende, nici ci va șiona andi phuv ca aver te han. Că le ghiesa mânre poporosche va avena sar le ghiesa le caștesche hai mânre manușa va bucurina-pe anda sasto ilo le buchiandar cai cheren-le lenghe vasta. 23 Ci va chiniona de ivea, nici ci va cherena șiave ando necazo, că von sile iech sămânța cărdi anda codola cai sile binecuvântime le Iehovastar, von hai lenghe șiave. 24 Angla ca von te den cingar, me va avela te dav lenghe duma parpale, ando timpo so va dena duma încă, me va avela te așunav-len. 25 O ruv hai o bacro va hana ande iech than, o leo va hala suluma sar o guruv hai o haben le sapesco va avela i phuv. Ci va cherena niciech nasulimos hai ci va rimosarela-pe chanci pe sea mânro plain sfânto”, phenel o Iehova.