1 Samuel
30 O David hai lesche manușa arăsle co Țiclag o trinto ghies. Le amaleciți avile opral i rig anda o sudo hai opral o Țiclag. Avile contra o Țiclag hai dine lesche iag. 2 Astarde sar prizonieri le jiuvlean hai sea codolen cai sas-le ando foro, catar o mai țâno ji co mai baro. Ci mudarde nici ieches, tha line-le lența hai îngărde-le pe lengo drom. 3 Cana o David hai lesche manușa arăsle ando foro, dichle că sas lesche dino iag hai că lenghe rromnia, lenghe șiave hai șeia sas-le astarde hai line sar prizonieri. 4 Atunci o David hai le manușa cai sas-le leia astarde te roven zurales ji cana ci mai sas-le zuralimos te roven. 5 Le dui rromnia le Davidosche, i Ahinoam, i izreelita, hai i Abigail, i phivli le Nabaloschi, o carmelito, sas-le line sar prizoniere. 6 O David sas-lo zurales perado, anda codoia că le manușa denas duma te mudaren-les barența, anda codoia că savorengo ilo sas cărco anda lenghe șiave hai șeia. Tha o David zuriardea-pe prin o Iehova, lesco Del.