Mica

4 Andel ghiesa de palal, i plain le chăreschi le Iehovasco va avela zuriardi opral po vârfo le plainengo, va vazdela-pe opral le plaia hai caring late va șiordona le thema. 2 But națiuni va jiana hai va phenena: „Aven, te jias opre ca o plain le Iehovasco, ca o chăr le Devlesco le Iacobosco. Vo va sicavel-ame pesche riga, hai amen va phiraia pe lesche droma”. Că anda o Siono va înclela i legea hai anda o Ierusalimo o cuvânto le Iehovasco. 3 Vo va cherela cris mașcar but thema hai va ortola le buchia ande soste priveal le națiuni zurale, duriarde. Anda lenghe săbii va cherena pluguri hai anda lenghe sulițe, cosoarea. Niciech them ci va mai vazdela i sabia contra aver them hai ci va mai sichiona o războio. 4 Fiesavo va beșela tela peschi răz hai tela pesco smochino hai chonic ci va mai cherela-le te izdran, că o mui le Iehovasco le armatengo dea duma. 5 Fiesavo them va phirela ande pesche devlesco anav, tha amen va phiraia ando anav le Iehovasco, amaro Del, po timpo nedefinime, da, anda sea o timpo.