Psalmii

72 O, Devla, sicav le reges che hotărâri judecătorești, le șiaves le regesche, chio ortomos! 2 Vo te avel orta cana del duma anda pesco poporo hai anda codola umili. 3 Le plaina te anen pacea le poporosche hai le plaia te anen ortomos. 4 Vo te cherel cris codolenghe cai sile umilo anda o poporo, te hastravel le șiaven codolenghe ciore hai te nichiarel codoles cai athavel. 5 Von va darana tutar chichi timpo va avela o cham hai chichi timpo va avela o șionoto, generația pala generația. 6 Vo va avela sar o brâșând cai perel pi ciar șindi, sar le brâșândea barvale, cai chinghiaren i phuv. 7 Ande lesche ghiesa, codo orta va lulughiola hai va avela butimos paceaco ji cana ci va mai avela o șionoto. 8 Vo va raila catar iech marea ji ca aver hai catar i bari Len ji ca le margini la phuveache. 12 Că vo va hastravela le ciores cai del cingar pala ajutorii hai, sa cadea, vi codoles cai silo umilo hai codoles cai nai-les ajutorii. 13 Les va avela-les mila codolestar cai silo umilo hai le ciorăstar hai va hastravela i viața codolenghe cai sile cioră. 14 Va hastravela lengo sufleto catar o nasulimos hai catar i violența hai lengo rat va avela cuci ande lesche iacha. 16 Va avela barvalimos givesco pi phuv, po vârfo le plainengo va avela butimos baro. Le regesche roadea va bariona sar ando Libano, hai andel foruria, le manușa va lulughiona sar le zelenimata la phuveache. 18 Așardo te avel o Iehova Del, o Del le Israelosco, o corcoro cai cherel șucar buchia! 19 Așardo te avel lesco baro anav anda sea o timpo hai leschi pachiv te pherel sea i phuv! Amin hai amin.