Geneza
2 Cadea sas-le terminime le ceruri hai i phuv hai sea so sas ande lende. 2 Ji ando efta-to ghies, o Del terminisardea peschi buchi hai ando efta-to ghies astardea te odihnil-pe catar sea i buchi cai cărdea-la. 3 O Del binecuvântisardea o efta-to ghies hai sfințosardea-les, anda codoia că ande cado ghies o Del odihnil-pe anda sea i buchi cai cărdea-la, anda sea so camlea te cherel. 7 Hai o Iehova Del cărdea le manușes andai țărâna la phuveachi, phurdea ande lesche nări phurdimos viațaco hai o manuș cărdilo iech sufleto jiuvindo. 15 O Iehova Del lea le manușes hai șiutea-les andi bar le Edenoschi caște șiol semințea andi phuv hai te lel sama pe late. 16 Pala codoia, o Iehova Del dea le manușes cadai porunca: „Anda sea-l cașta andai bar daștis te has te ciailios. 17 Tha anda o cașt le prinjianimasco le miștimasco hai le nasulimasco te na has, că, ando ghies cai va avela te has anda leste, siguro va avela te meres”. 18 Pala codoia o Iehova Del mai phendea: „Na-i mișto ca o manuș te așel corcoro. Va avela te cherav lesche iech ajutorii caște potrivil-pe lesche”. 19 O Iehova Del cărdea andai phuv fiesavo animalo sălbatico hai fiesavi creatura cai zburealas hai începosardea te anel-le le manușeste caște dichel sar va șiola anav fiesavesche; hai sar o manuș șiolas anav fiesave sufletosche jiuvindo, cadea așelas lesco anav. 20 Cadea o manuș șiutea anav sea-l animalenghe cai sile pașa o chăr, le creaturenghe cai zburian hai sea-l animalenghe sălbatico, tha anda o manuș ci sas nici iech ajutorii cai te potrivil-pe lesche. 21 Cadea că, o Iehova Del cărdea te perel iech bari lindrî pe manuș hai, ando timpo so cado sovelas, lea iech anda lesche prașave hai pala codoia phandadea thaneste o mas. 22 Hai, anda o prașav cai lea-les anda o manuș, o Iehova Del cărdea iech jiuvli hai andea-la le manușesche. 23 Atunci o manuș phendea: „Cadaia si, în sfârșit, cocalo anda mânre cocala hai mas anda mânro mas! Voi va bușiola «jiuvli», pentru că sas lini anda o murș”. 24 Ita sostar o murș va mechela pesche dades hai pesca deia hai va beșela pesca rromnia hai le dui va avena iech corcoro mas.