Matei
7 Na mai judechin, caște na aven judechime, 2 că i judecata saveaia judechin va avena judechime hai la măsuraia saveaia măsurin va avela te măsuril-pe tumenghe. 3 Sostar diches o sulum anda i iach che phraleschi hai ci diches o cașt anda chi iach? 4 Sau sar daștis te phenes che phralesche: «Mech-ma te lav avri o sulun anda chi iach», cana ita că ande chi iach si iech cașt? 5 Tu cai san ipocrito! Le avri mai anglal o cașt anda chi iach hai pala codoia va avela te diches ujes sar te les avri o sulun anda che phraleschi iach. 7 Manghen mai dur hai va avela te del-pe tumenghe, roden mai dur hai va arachena, maren mai dur hai va avela te pâtrăl-pe tumenghe; 8 că oricon manghel primil, oricon rodel arachel hai oricon marel va avela te pâtrăl-pe lesche. 12 Cadea că, sea so camen te cheren tumenghe le manușa cheren lenghe vi tumen. Cadaia însemnol i Legea hai le Profeți. 13 Jian andre po chidino udar, că buhlo hai baro si o drom cai îngărel ca i distrugerea hai but si codola cai jian pe leste, 14 tha chidino si o udar hai tang si o drom cai îngărel viațate hai hanțî si codola cai arachen-les. 15 Len sama catar le profeți neciace, cai aven tumende hureade sar bacrea, tha andral sile ruv hașvale! 16 Pala lenghe roade va prinjianena-le. Chiden-pe vroiechdata dracha andal spini sau smochinea andal canră? 17 Sa cadea, orisavo cașt lașio del roade lașe, tha orisavo cașt nasul del roade nasul. 18 O lașio cașt ci daștil te del roade nasul, nici o cașt nasul ci daștil te del roade lașe. 19 Orisavo cașt cai ci del roade lașe silo șindo hai șiudino andi iag. 20 Si ciaces, pala lenghe roade va prinjianena cadal manușen. 21 Na oricon phenel manghe: «Raia, Raia» va dela andre ando Regato le cerurengo, tha numai codo cai cherel i voia mânre Dadeschi cai silo andel ceruri. 22 But va phenena manghe ande codo ghies: «Raia, Raia, ci profețisardeam amen ande chio anav, ci încaladeam amen demoni ande chio anav hai ci cărdeam amen but buchia zuralimasche ande chio anav?» 23 Atunci va avela te phenav lenghe: Niciechdata ci prinjiandem tumen! Tilearen mandar, tumen, cai cheren buchia nelegiuime!»”. 24 Cadea că, con așunel cadal cuvintea mânre hai cherel-le va avela sar iech manuș prevăzătorii, cai cărdea pesco chăr pe iech stânca. 25 Dea brâșând, avile bare paia, phurde bare barvalea hai limade zurales codo chăr, tha vo ci pelea, că sas-les i temelia pi stânca. 28 Cana o Isus terminisardea te phenel cadal dumes, le but manușa sas-le uimime catar o modo sar sicavelas, 29 anda codoia că vo sicavelas-le sar iech jeno cai sas-les zuralimos, na sar lenghe scribi.