Iacov
2 Anda codoia că savore greșisaras butivar. Dacă varecon ci greșil ando cuvânto, silo iech manuș perfecto, cai daștil te încărel parpale sea pesco corpo. 3 Dacă șioas iech frâo ando mui le grastengo caște cheras-le te așunen amendar, cadea îngăras vi sea lengo corpo. 4 Ita că vi le corăbii, chiar cana sile cadea de bare hai sile îngărde catar zurale barvalea, sile îngărde catar iech cârma zurales țâni oricai camel o cârmacii. 5 Sa cadea, vi i șib si iech țâni partea anda corpo, tha așarel-pe bare buchianța. Ita, iech țâni iag daștil te del iag iech baro veș! 6 I șib si vi voi iech iag. Mașcar sea le părți anda amaro corpo, i șib si iech lumea le neortomaschi, că meliarel sea o corpo hai del iag sea o drom la viațaco, chiar voi sili dini iag catar i Ghena. 8 Tha i șib, niciech manuș ci daștil te covliarel-la. Ci încărel-pe parpale hai cherel but nasulimos, si pherdi venino cai mudarel. 10 Anda sa codo mui înclel vi i binecuvântarea, vi o armai. Mânre phrala, cadal buchia ci trebunas te aven cadea. 11 Thabdel oare anda sa codoi haing vi pai guglo, hai vi pai cărco? 12 Mânre phrala, daștil o smochino te cherel măslinea sau i răz, smochinea? Nici i haing paieia londo ci daștil te del pai guglo. 13 Con mașcar tumende silo goghiaver hai siles hachiarimos? Te sicavel cadaia prin lesco lașio phiraimos, prin buchia cărde anda o lașimos cai avel anda goghiaverimos. 17 Tha o goghiaverimos de opral silo ando iechto than ujo, pala codoia pașnico, mechel pestar, gata te așunel, pherdo lașimos hai roade lașe, ci cherel diferențea, ci athavel. 18 Mai but, o rodo le ortomasco silo semănime andi pacea anda codola cai cheren pacea.