Faptele

27 Cadea că, andine-le angla o Sanhedrino. Pala codoia o baro rașai șiutea lenghe pușimata 28 hai phendea lenghe: „Phendem tumenghe te na mai sicaven averen ande cado anav, tha cu sea cadala ita că pherdean o Ierusalimo tumare sicaimaia hai camen te anen pe amende o rat cadale manușesco”. 29 O Petru hai le coaver apostoli phende: „Trebul te așunas mai but le Devlestar sar stăpânitorii sar le manușendar. 30 O Del amare phurengo uștadea andal mule le Isusos, cas tumen șiutean-les po stâlpo hai mudardean-les. 31 O Del vazdea-les ca peschi ciaci sar Instrumento Principalo hai sar Codo cai Hastravel, ca o Israelo te daștil te căil-pe hai te daștil te avel iertime catar lesche păcatea. 32 Amen sam martori cadale buchianghe hai sa cadea si vi o spirito sfânto, cai dea-les o Del codolenghe cai așunen lestar sar stăpânitorii”. 33 Cana așunde cadaia, von holiarde-pe zurales hai camle te mudaren-le. 34 Tha iech fariseo po anav Gamaliel, iech sicaitorii la Legeaco mișto dichlo andel iacha le manușengo, vazdea-pe ande pânrănde ando Sanhedrino hai phendea te încalaven avri iech țâra codole manușen. 35 Pala codoia phendea: „Murșa le Israelosche, gândin tumen mișto so camen te cheren cadale manușența. 36 Sar exemplo, angla cadal ghiesa vazdea-pe o Teuda, cai phenelas că silo varecon, hai mai but murșa, cam 400, așile de leschi partea. Tha vo sas mudardo, hai sea codola cai găle pala leste sas-le hulade hai ci mai așundea-pe lendar. 37 Pala leste vazdea-pe o Iuda anda Galileea, andel ghiesa cana cărdiolas-pe o recensământo, hai țârdea manușen pala peste. Tha vi cado manuș mulea hai sea codola cai găle pala leste sas-le hulade. 38 Anda codoia, ande cadai situația, phenav tumenghe: na len tumen cadale manușendar; mechen-le pace. Anda codoia că, dacă cado plano sau cadai buchi sili le manușendar, va avela chosli cu sea, 39 tha dacă si le Devlestar, ci va daștina te peraven-le. Cadea că, daștinas te arachen tumen andi situația că maren tumen contra le Devlesche. 40 Atunci von așunde catar lesco sfato hai acharde le apostolen, marde-le, phende lenghe te na mai den duma ando anav le Isusosco hai pala codoia mechle-le te tiliaren. 41 Von tiliarde de angla o Sanhedrino, bucurime că sas lenghe dini cadai pachiv te aven cărde lajiavestar anda lesco anav. 42 Hai ande fiesavo ghies, ando templo hai chăr chărestar, ci așiavenas-pe te sicaven hai te phenen i vestea lași anda o Isus Cristos.