Isaia

11 Iech ranic va inclela anda i buturuga le Ieseschi hai iech vlăstaro anda lesche rădăcini va dela rodo. 2 Opral leste va șiola-pe o spirito le Iehovasco, iech spirito goghiaverimasco hai hachiarimasco, iech spirito zuralimasco hai anda o sfato, iech spirito prinjianimasco hai daraimasco le Iehovastar. 3 Vo va arachela plăcerea andi dar le Iehovastar. Ci va judechila pala soste dichiol-pe hai ci va ortosarela pala soste așunel-pe. 4 Va judechila codolen ciore bi te dichel ieches mai opre sar averes hai va ortosarela ciacimasa ando miștimos codolengo lașe cai train pi phuv. Hai lesche dume va avena sar iech rovli cai marel i phuv, hai va mudarela codoles nasul le phurdimasa cai avel anda lesche ușta. 5 O ortomos va avela i haravli catar lesco mașcar, hai i fidelitatea, i haravli catar lesche șolduri. 6 O ruv va beșela le țâne bacreia, o leopardo va sovela pașa o buznoro hai o țâno guruv, o leo hai o thulo animalo va avena sea ande iech than hai va tradelale iech șiavoro. 7 I guruvni hai i rișni va hana ciar hai lenghe țâne va sovena ande iech than. O leo va hala suluna sar o guruv. 8 O țâno șiav cai piel thud va călela-pe pașa o than le sapesco hai o șiav cai ci mai pel thud va șiola pesco vast ando chăr le sapesco veninoso. 9 Ci va mai cărdiola-pe niciech nasulimos hai ci va mai avela niciech paguba pe sea mânro plain sfânto, că i phuv va avela pherdi catar o prinjianimos le Iehovasco cadea sar o adânco la mareaco silo pherdo pai. 10 Ande codo ghies, i rădăcina le Ieseschi va vazdela-pe opre sar iech stâlpo anda le popoarea. Le națiuni va ortosarela-pe caring leste caște aven sicade, hai lesco than anda i odihna va avela baro.