Faptele
15 Hai chichiva murșa avile tele anda Iudeea hai astarde te sicaven le phralen cadea: „Dacă ci cheren i circumcizia pala o obiceio cai mechlea-les o Moise, ci daștin te aven hastrame”. 2 Tha o Pavel hai o Barnaba ci dichle le buchia cadea sar von, hai butivar denas duma contra lența. Anda codoia, alosardea-pe ca o Pavel, o Barnaba hai aver chichiva te jian opre co Ierusalimo caște den duma le apostolența hai le phurența anda cadai buchi. 3 Pala so le phrala andai congregația găle lența iech paș drom, cadala murșa găle vi mai dur pe pengo drom caring i Fenicia hai i Samaria. Po drom, von phenenas le phralenghe sar avile co ciacimos le manușa andal națiuni. Cana așunde cadal dumes savore phrala sas-le zurales voime. 7 Pala so dine duma but, o Petru vazdea-pe hai phendea: „Murșale, phralale, jianen mișto că, andal dintune ghiesa, o Del alosardea-ma man mașcar tumende ca, prin mânro mui, le manușa andal națiuni te așunen o cuvânto la vesteachi lași hai te pachian. 12 Atunci sea le manușa așile anda o mui hai așunde le Barnabas hai le Pavelos, cai dine duma anda le but semnea hai minuni cai o Del cărdea-le prin lende ando mașcar le națiunengo. 13 Cana von ci mai dine duma, o Iacov phendea: „Murșale, phralale, așunen-ma!” 14 O Simeon phendea ji ande le mai țâne buchia sar, anda i iechto data, o Del ortosardea pesco dichimos caring le națiuni caște încalavel anda lende iech poporo anda pesco anav. 15 Hai cadaia si sar phende le profeți, pala sar si scriime: 16 «Pala cadal buchia va avela te risarav-ma hai te vazdav pale i țărha peradi le Davidoschi. Va avela te vazdav pale lache ruinea hai te cherav-la pale, 17 ca codola cai așen te roden anda sea o ilo le Iehovas, ande iech than le manușența anda sea le națiuni, manușa cai sile acharde pala mânro anav, phenel o Iehova, codo cai cherel cadal buchia, 18 prinjiande andal puraimata». 21 Andal purane ghiesa, le Moises siles manușa cai den duma anda o Del ande fiesavo foro, anda codoia că si citime voceasa zurali andel sinagogi ande fiesavo sabato”. 23 Prin lende, von bișialde cado lil: „Le apostoli hai le phure, tumare phrala, caring le phrala anda Antiohia, anda Siria hai anda Cilicia cai sile andal națiuni: Te train! 24 Anda codoia că așundeam că chichiva anda amare jene avile hai holiarde tumen prin so phende, hai camle te cheren tumen te hasaren tumaro pachiamos, chiar cana amen ci phendeam lenghe te cheren cadaia, 25 leam i decizia savore ande iech than, te alosaras chichiva murșen saven te bișialas-le tumende, amare cuci phralența o Barnaba hai o Pavel, 26 manușa cai șiute penghi viața ando pericolo anda o anav amare Raiesco, o Isus Cristos. 27 Cadea că, bișialas le Iudas hai le Silas, caște așunen vi anda lengo mui sea cadal buchia. 28 Că o spirito sfânto hai amen hachiardeam că si mișto te na mai șioas tumenghe aver pharimos, avreal cadal buchia savendar si tumen nevoia: 29 te încăren tumen parpale catar le buchia cai sas-le andine sar jertfa le idolenghe, catar o rat, catar le animalea tasade hai catar i imoralitatea sexualo. Dacă len sama te ferin tumen catar cadal buchia, va jiala tumenghe mișto. Aven sasteveste!”. 30 Cana sas mechle te tiliaren, cadal murșa avile tele ca Antiohia, chidine ande iech than sea le discipolen hai dine lenghe o lil. 31 Pala soste citisarde-les, sas-le bucurime anda codoia că simțosarde-pe zuriarde. 36 Pala chichiva ghiesa, o Pavel phendea caring o Barnaba: „Te risaras-ame acana hai te jias ca le phrala anda fiesavo foro cai phendeam o cuvânto le Iehovasco, caște dichas so mai cheren”. 37 O Barnaba camelas zurales te len pența vi le Ioanos, cai bușiolas vi Marcu. 38 Tha o Pavel pachiaia că na-i mișto te len-les lența, anda codoia că vo mechlea-le corcore andi Pamfilia hai ci gălea lența andi predicarea. 39 Atunci astardea-pe iech bari holi mașcar lende, cadea că hulade-pe iech averestar. O Barnaba lea-les peia le Marcos hai găle pi barca caring o Cipro.