1 Timotei
3 Cadal dumes sile ciace: Cana varecon camel te avel phuro, camel iech lași buchi. 2 Cadea că, o phuro te avel iech manuș bidoșaco, te avel-les iech corcori rromni, te jianel te încărel-pe parpale ande sea, te gândil mișto, te lașiarel pesche buchia te aven cadea sar trebun, te primil anda ilo averen peste chăre, te jianel te sicavel averen; 3 te na avel machiardo, te na marel-pe, tha te avel gata te mechel pestar, nici te na hal-pe, nici te na iubil le love; 4 tha te avel iech manuș cai lel sama mișto pesca familiatar hai lesche șiave te așunen lestar hai te phiraven-pe șucar averența 5 (anda codoia că cana varecon ci jianel te lel sama pesca familiatar sar va jianela te lel sama la congregațiatar le Devleschi?); 6 te na avel iech manuș boldo de țâra timpo, ca na varesar te phuchiarel-pe barimastar hai te primil sa codoi judecata sar o Beng. 7 Pașa sea cadala, trebul te avel prinjiando sar iech lașio manuș codolendar de avreal, caște na arăsăl te avel cărdo lajiavestar hai te perel ando vast le Benghesco. 8 Sa cadea, le slujitori cai ajutin le phuren trebun te aven demno pachiamasche, te na hohaven prin so phenen, te na pien prea but mol hai te na camen te cheren love hohaimasa, 9 tha te încăren zurales co secreto sfânto le pachiamasco iecha conștiințasa uji. 10 Mai but, von trebun te aven zumade mai anglal, caște dichiol-pe mișto dacă sile lașe anda cadai buchi; pala codoia dacă ci arachel-pe lenghe niciech doș, daștin te aven slujitori. 11 Sa cadea, le jiuvlea trebun te aven demno pachiamasche, te na phenen hohaimata cioricane anda aver, te jianen te încăren-pe parpale, hai te phiraven-pe pachivales ande sea le buchia. 12 Le slujitores cai ajutil le phuren te avel-les iech corcori rromni hai te lel sama mișto pesche șiavendar hai pesca familiatar. 13 Anda codoia că codola cai slujin mișto, sile dichle lașe iachența averendar hai daștin te den duma anda o pachiamos ando Cristos Isus, bi daraco. 15 că, dacă va avela te arăsav mai târzio, te jianes sar te phiraves tut ando chăr le Devlesco, cai si i congregația le Devleschi jiuvindo, o stâlpo hai i temelia le ciacimaschi.