Iov
1 Ando them Uț beșelas iech manuș cai bușiolas Iov. Cado manuș sas-lo orta hai bidoșaco. Vo daralas le Devlestar hai încărelas-pe dur catar so si nasul. 6 Hai avilea o ghies cana le șiave le ciace Devlesche găle andre angla o Iehova, hai o Satan gălea andre vi vo mașcar lende. 7 Atunci o Iehova phendea le Satanosche: „Cathar aves?”. O Satan phendea le Iehovasche: „Catar o rodimos la phuveaco hai catar o phirimos cai cărdem-les pe late”. 8 Hai o Iehova phendea le Satanosche: „Dichlean le Iovos mânro slujitorii? Na-i chonic sar vo pi phuv, iech manuș orta cai ci daștil te anel-pe lesche niciech doș, cai daral le Devlestar hai încărdiol-pe dur le nasulimastar?” 9 Tha o Satan phendea parpale le Iehovasche: „Oare de ivea daral o Iov le Devlestar? 10 Ci vazdean tu lesche iech bar cai lel sama lestar, lesche chărestar hai catar sea so siles les? Binecuvântisardean i buchi lesche vastenghi, hai lesche animalea pherde i phuv. 11 Tha acana vazde chio vast, hai azbav sea so si lesco hai te diches cana ci va dela-tu armai”. 12 Atunci o Iehova phendea le Satonosche: „Ita că sea so siles si ande chio vast! Numai pe leste te na șios chio vast!”. Hai o Satan tilardo anda i fața le Iehovaschi. 13 Ando ghies cana lesche șiave hai lesche șeia hanas hai pienas mol ando chăr lenghe phralesco, o mai baro, 14 iech mesagero avilea co Iov hai phendea lesche: „Le guruva pharavenas i phuv hai le măgărițe hanas ciar pașa lende, 15 cana le sabeenii avile opral amende hai line-le, hai le slujitoren mudarde-le la sabiaia. Numai me mai așilem caște phenav tuche cadal buchia”. 16 Cana cado încă delas duma, avilea aver hai phendea: „Pelea iag anda o cerii catar o Del hai thabardea le bacrean hai le slujitoren hai ci mai așilea chanci anda lende! Numai me mai așilem caște phenav tuche cadal buchia”. 17 Cana cado încă delas duma, avilea aver hai phendea: „Le caldeenii cărde trin grupuri, șiudine-pe opral le cămilea hai line-le, hai le slujitoren mudarde-le la sabiaia. Numai me mai așilem caște phenav tuche cadal buchia”. 18 Cana cado încă delas duma, mai avilea iech hai phendea: „Che șiave hai che șeia hanas hai pienas mol ando chăr penghe phralesco o mai baro. 19 De iechdata avilea iech barval zurali catar o pustio hai dea dab le ștar colțuri le chăresche hai o chăr pelea pe le tărne, hai von mule. Numai me mai așilem caște phenav tuche cadal buchia”. 20 Atunci o Iov vazdea-pe, șindea o hureaimos pa peste hai pesche bal anda o șăro. Pala codoia, pelea ca i phuv, mechlea-pe tele, 21 hai phendea: „Nango avilem avri anda o păr mânra deiaco hai nango va avela te jiav parpale code! O Iehova dea, o Iehova lea. Așardo te avel vi de acanara mai dur o anav le Iehovasco!”. 22 Ande sea cadala, o Iov ci păcătuisardea hai ci doșardea le Devles anda chanci nasul.