Geneza
3 O sap sas o mai cior anda sea-l animalea sălbatico cai cărdea-le o Iehova Del. Vo phendea la jiuvleache: „Si ciaces că o Del phendea te na han anda sea-l cașta andai bar?”. 2 I jiuvli phendea parpale le sapesche: „Daisaras te has anda o rodo le caștengo andai bar. 3 Tha, anda o rodo le caștesco anda o mașcar la bareaco, o Del phendea: «Te na han anda leste, nici te na șion o vast pe leste, caște na meren»”. 4 Atunci o sap phendea la jiuvleache: „Siguro ci va merena. 5 Că o Del jianel că ando ghies cana va hana anda leste va pâtărdona-pe tumare iacha hai va avena sar o Del, prinjianindoi so si mișto hai so si nasul”. 6 Atunci i jiuvli dichlea că o rodo anda o cașt sas lașio hamasco hai că bucurilas le iacha, da, că o cașt sas plăcuto dichimasco. Cadea că lea anda lesco rodo hai halea. Pala codoia, cana sas-li pesche rromeia dea vi lesche, hai vo halea. 14 Hai o Iehova Del phendea caring o sap: „Anda codoia că cărdean cadai buchi, dino armai te aves mașcar sea le jiuvindimata chăresche hai mașcar sea le jiuvindimata sălbatico! Pe chio păr va avela te țârdes-tu hai va avela te has phuv ande sea le ghiesa chia viațache! 15 Va avela te șioav dușmănia mașcar tute hai i jiuvli hai mașcar che șiave hai lache șiave. Vo va phagărela chio șăro hai tu va avela te phagăres lesco călcâio”. 17 Hai le Adamosche phendea: „Anda codoia că ascultisardean catar chi rromni hai halean anda o cașt anda savo poruncisardem tuche: «Te na has anda leste», dini armai si i phuv datorime tuche! Andi duch va avela te has lache roade ande sea-l ghiesa chia viațache. 18 Spini hai canră va dela-tu hai va haia le plante le câmposche. 19 Andel paia chia fațache va avela te has chio manro ji cana va avela te risares-tu parpale andi phuv, că anda late sanas lino. Că phuv san hai andi phuv va avela te risares-tu parpale”. 22 Pala codoia o Iehova Del phendea: „Ita că o manuș arăslea sar iech anda amende, prinjianel so si mișto hai so si nasul. Acana, ca na varesar te zinghiarel pesco vast hai te lel vi anda o cașt la viațaco caște hal anda lesco rodo hai te trail veșnico ...”. 23 Hai o Iehova Del dea-les avri andai bar le Edenoschi, caște cherel buchi i phuv anda savi sas lino. 24 Duriardea-les deci le manușes, hai ando esto la bareaco le Edenoschi șiutea heruvimi hai i lama iagali iecha sabiachi cai învârtilas-pe soavră timpo caște păzil o drom caring o cașt la viațaco.