Romani
15 Că tumen ci primisardean iech spirito de sclavie cai cherel tumen pale te daran, tha primisardean iech spirito cai lea tumen sar șiave, spirito cai cherel-ame te das cingar: „Ava, Dade!”. 16 Chiar o spirito șiol mărturia ande iech than amare spiritoia că sam le Devlesche șiave. 17 Cadea că, dacă sam șiave, sam vi moștenitori – da, le Devlesche moștenitori, tha moștenitori ande iech than le Cristosoia - ,numai te suferisaras ande iech than le Cristosoia caște avas glorifichime ande iech than leia. 20 Anda codoia că i creația sas șiuti ande chanceste na că voi camlea cadea, tha prin codo cai șutea-la, pi baza la speranțachi 21 că vi i creația va avela scăpime andai sclavia le musarimaschi hai că va avela-la i bari libertatea le șiavenghi le Devlesche. 22 Anda codoia că jianas că ji ando ghies de aghies sea i lumea rovel hai sili andel ducha. 24 Anda codoia că ande cadai speranța samas salvime; tha iech speranța cai dichiol-pe na-i speranța, căci mai speril iech manuș ande iech buchi cai dichel-la? 25 Tha, dacă sperisaras ande iech buchi cai ci dichas-la, ajucăras-la mai dur cu perseverență. 31 So va avela te phenas atunci anda cadal buchia? Dacă o Del silo amența, con va avela contra amenghe? 32 Cadea că dacă vo ci încărdea-pe parpale te del chiar pesche Șiaves anda savore anda amende, ci va dela-ame vo lașimaia vi sea le coaver buchia ande iech than leia? 34 Con va doșarela-le? O Cristos Isus si codo cai mulea hai chiar sas-lo ușteado andal mule, vo silo ca i ciaci le Devleschi hai del duma ande amaro miștimos. 35 Con va încărela amen dur catar i iubirea le Cristososchi? O pharimos sau i duch sau i persecuția sau o bochalimos sau că na-i amen hureaimos sau o pericolo sau i sabia? 36 Pala sar si scriime: „Ande fiesavo ghies sam dine le merimasche anda tute, sam dichle sar niște bacrea dine te aven șinde”. 37 Tha anda sea cadala amen încleas cu sea victorioși prin codo cai iubisardea-ame. 38 Că som siguro că nici o merimos, nici viața, nici îngeri, nici raimata, nici buchia de acana, nici buchia cai aven, nici zuralimata, 39 nici o ucimos, nici i adâncimea nici aver creația ci va daștila te încărel amen dur catar i iubirea le Devleschi cai si ando Cristos Isus, amaro Rai.