1 Tesaloniceni

3 Anda codoia, cana ci mai daisardeam te ajucăras, pachiaiam că si mai mișto te așias andi Atena 2 hai te bișialas le Timoteios, amaro phral hai o slujitorii le Devlesco anda i vestea lași anda o Cristos, caște zuriarel tumen hai te sastiarel tumaro ilo, ca tumaro pachiamos te avel vazdino, 3 ca chonic te na perel catar cadal pharimata. Că tumen jianen că ci daisaras te hastras bi te na nachas părdal cadal ducha. 4 Cana samas tumența, phendeam tumenghe de mai anglal că va avela te nachas prin pharimata hai sar jianen mișto, chiar cadea sas.