Romani

2 Sar exemplo, dacă o Avraam avileas arachlo orta pala le buchia cai cărdea-len, avelas-les sostar te așarel-pes, tha na angla o Del. 3 Că so phenel o Lil le Devlesco? „Le Avraamos sas-les pachiamos ando Iehova hai, anda codoia, sas-lo arachlo orta.” 4 Tha codolesche cai cherel buchi, lesco pochinimos ci silo o lașimos nemeritime, tha iech buchi cai trebul te avel lesche dini. 5 Tha codolesche cai ci cherel buchi, tha siles pachiamos ande Codo cai arachel orta codoles nasul, lesco pachiamos cherel-les orta. 6 Cadea sar vi o David del duma anda i fericirea le manușeschi cas o Del arachel-les orta, tha na anda le buchia cai cărdea-le: 7 „Fericime sile codola savenghe buchia nasul sas-le iertime hai savenghe păcatea sas-le pachiarde; 8 fericime si o manuș savesche o Iehova ci încărel conto catar lesco păcato”. 11 Hai primisardea iech semno, i circumcizia, sar sigilo le ortomasco prin o pachiamos cai sas-les cana sas-lo necircumciso. Cadea o Avraam cărdilo o dad sea codolengo cas silen pachiamos, chiar cana sile necircumciși, caște aven arachle orta. 12 Sa cadea, vo cărdilea o dad codolengo circumciși, tha na numai codolengo cai încăren i circumcizia, tha vi codolengo cai uștaren de pașă pi urma le pachiamaschi cai sas amare dades le Avraamos cana sas-lo necircumciso. 18 „Chiar cana ci sas-les niciech motivo te speril, cu sea cadala, prin speranța, les sas-les pachiamos că va avela o dad bute națiunengo, cadea sar sas phendo: „Cadea va avena che șiave”. 19 Hai, chiar cana lesco pachiamos ci sas covlo, vo gândisardea-pe ca lesco corpo, cai sas sar mulo (anda codoia că sas-les cam 100 bărșa), hai vi ca o păr mulo la Saraco. 20 Tha, anda codoia că pachiaia-pe andel promisiuni le Devlesche, vo sicadea pachiamos hai cărdilea zuralo prin pesco pachiamos hai dea gloria le Devlesche, 21 hai pachialas zurales că Vo daștilas te cherel so promitisardea. 23 Cu sea cadala, le dumes „sas-lo arachlo orta” ci sas-le scriime numai anda leste, 24 tha vi anda amende, cai va avela te avas arachle orta, anda codoia că pachias ande Codo cai uștiadea andal mule le Isusos, amaro Rai.