Iacov
7 Cadea că aven răbdători, phralale, ji cana avel o Rai! Ita că o manuș cai șiol semințea andi phuv ajucărel o cuci rodo la phuveaco hai siles răbdarea ji cana avel o angluno brâșând hai o palutno brâșând. 8 Aven răbdători vi tumen; zuriaren tumaro ilo, că pașilea o timpo cana avel o Rai! 10 Phralale, len tumen pala le profeți cai dine duma ando anav le Iehovasco cai nachle prin nasulimos hai sas-le răbdători. 11 Dichta! Amen pachias că fericime sile codola cai ci mechle-pe andel zumaimata. Așundean sar așilea zuralo o Iov andel zumaimata hai dichlean o sfârșito cai dea-les lesche o Iehova, că o Iehova silo pherdo iubirea hai îndurătorii. 13 Si mașcar tumende varecon cai silo duchado? Te manghel-pe! Si varecas lași voia? Te ghilabal psalmi! 14 Si mașcar tumende varecon nasfalo? Te acharel peste le phuren la congregațiache, hai von te manghen-pe anda leste, hai te machen-les uleiosa ando anav le Iehovasco. 15 O manglimos pherdo pachiamos va cherela mișto codolesche nasfalo, hai o Iehova va vazdela-les. Hai, dacă cărdea păcatea, va avela iertime. 16 Cadea că, phenen ciaces tumare păcatea iech averenghe hai manghen tumen iech anda aver, caște aven sastiarde. Baro zuralimos si le manglimas cai cherel-les iech manuș orta. 17 O Ilie sas iech manuș cai simțolas sar amen; cu sea cadala, cana manglea-pe zurales te na del o brâșând, ci dea o brâșând opral o them trin bărșa hai șov șiona. 18 Pala codoia manglea-pe pale, hai o cerii dea brâșând ha i phuv dea roade. 19 Mânre phrala, dacă varecon cherel vroieches mașcar tumende te duriarel-pe catar o ciacimos hai aver anel-les parpale, 20 te jianen că codo cai anel parpale ieche manușes păcătoso catar lesco drom greșime va salvila-les catar o merimos hai va pachiarela but păcatea.