Matei

3 Ando timpo so beșelas po Plain le Măslinengo, le discipoli găle leste, de iech partea, hai phende lesche: „Phen amenghe: Cana va avena cadal buchia hai so va sicavela că san cathe hai că avilea o phandaimos cadale sistemosco?” 4 O Isus phendea lenghe parpale: „Len sama ca chonic te na athavel tumen, 5 pentru că va avena but ande mânro anav, phenindoi: «Me som o Cristoso», hai va athavena buten. 6 Va așunena anda marimata hai nevimata anda marimata. Len sama te na daran, anda codoia că cadal buchia trebul te aven, tha cado ci va avela o sfârșito. 7 Va vazdela-pe națiunea contra națiunea hai regato contra regato, hai va avela țâra haben hai anda iech than ande aver izdraimata phuveache. 8 Sea cadala si o începuto le duchengo. 9 Atunci le manușa va persecutina tumen hai va mudarena tumen hai va avena urâme sea le themendar anda mânro anav. 10 Sa cadea, atunci but jene va perena, va bichinena-pe iech pe aver hai va urâna-pe iech pe aver. 11 Va vazdena-pe but hohamne profeți hai va athavena buten, 12 hai, anda codoia că o nasulimos va bariola, le mai butenghi iubirea va șudrola. 13 Tha con va perseverila ji co sfârșito, codo va avela hastrame. 14 Cadai vestea lași anda o Regato va avela phendi pe sea i phuv, ca savore manușa te așunen anda late. Hai atunci va avela o sfârșito. 15 Cadea că cana va dichena i buchi melali cai anel pustiirea – anda savi dea duma o profeto Daniel – că beșel ande iech than sfânto (o cititorii te folosil pesco discernământo), 16 atunci codola anda Iudeea te nașen ca le plaina. 17 Con si opral po chăr te na avel tele caște jial andre ando chăr pala pesche buchia 21 Că atunci va avela iech baro necazo, sar ci mai sas de cana astardea i lumea ji acana, nici, hai ci mai va avela vroiechdata. 22 Hai, te na avenas harniarde codola ghiesa, chonic ci avelas hastrame; tha, de o drago codolengo cai si alome, codola ghiesa va avena harniarde. 29 Sigo pala o necazo anda codola ghiesa, o cham va cărdiola-pe calo, o ciumut ci va mai dela peschi lumina, le cerhaia va perena anda o cerii, hai le cerosche zuralimata va nachena prin izdraimata. 30 Atunci o semno le Șiavesco le manușesco va sicavela-pe ando cerii hai sea le popoarea pa i phuv va marena-pe ando colin duchatar hai va dichena le Șiaves le manușesco sar avel pe le cerosche nori zuralimaia hai bari gloriaia. 31 Vo va bișalela pesche îngeren ande iech baro bașimos trompetaco hai von va chidena ande iech than codolen alosarde anda le ștar barvalea, catar iech rig le cerurenghi ji andi coaver rig. 32 Sichion acana anda cadai ilustrarea anda o smochino: Cana leschi rovli si nevi hai den lesche patrina, jianen că o milai si pașă. 33 Sa cadea, cana va dichena sea cadal buchia, te jianen că vo silo pașă, co udar. 36 Tha codo ghies hai o ceaso chonic ci jianel-len, nici le îngeri anda o cerii, nici o Șiav, numai o Dad. 37 Anda codoia că, cadea sar sas le ghiesa le Noesche, cadea va avela vi i prezența le Șaveschi le manușesco. 38 Că andel ghiesa angla o Potopo, le manușa hanas hai pienas, le murșa lenas penghe rromnia hai le jiuvlea sas-le dine rromesche, ji cana o Noe dea andre andi arca. 39 Von ci dine atenția ji cana avilo o Potopo hai șâladea le savoren. Cadea va avela vi i prezența le Șaveschi le manușesco. 40 Atunci dui manușa va avena po câmpo: iech va avela lino hai ocoaver mechlo cothe. 41 Dui jiuvlea va hurdiarena o ghiv: iech va avela lini hai i coaver va avela mechli cothe. 42 Cadea că așen uștiade hai len sama, anda codoia că ci jianen ande savo ghies avel tumaro Rai. 44 Anda codoia, aven vi tumen gata, că o Șiav le manușesco avel ca iech ceaso cana ci ajucăren tumen. 45 Con si ciaces o sclavo fidelo hai prevăzătorii, saves lesco stăpâno șiutea-les opral le slujitori anda lesco chăr caște del-len haben cana trebul? 46 Fericime si cado sclavo dacă lesco stăpâno, cana avel, dichel că cherel cadaia! 47 Ciaces phenav tumenghe că va șiola tela lesco vast sea lesche buchia.