Numerea

6 O Iehova mai phendea le Moisesche: 2 „Phen le israelițenghe: «Dacă iech murș sau iech jiuvli cherel iech solaharimos specialo că va traila sar nazireo anda o Iehova, 3 te încărel-pe parpale catar i mol hai catar aver pimos. Te na piel șut anda mol, nici șut anda aver pimos. Te na piel niciech pimos cărdo anda dracha hai te na hal dracha, nici de acanara hai nici șuche. 4 Ande sea le ghiesa sar nazireo te na hal chanci cai avel andai răz, nici chiar dracha bipache hai nici lenghi coja. 5 Ande sea le ghiesa pesche solaharimasco sar nazireo, te na aven rangle lesche bala. Vo te avel sfânto, te mechel pesche bala te barion ji cana va phandavena-pe le ghiesa anda save șiutea-pe de iech rig anda o Iehova. 6 Ande sea le ghiesa ande save si șiuto de iech rig anda o Iehova te na pașiol nicieche mule manușestar. 7 Chiar cana lesco dad, leschi dei, lesco phral sau leschi phei merenas, te na meliarel-pe, anda codoia că siles po șăro o semno sar nazireo anda lesco Del. 8 Vo silo sfânto anda o Iehova ande sea lesche ghiesa sar nazireo. 24 „O Iehova te del-tu miștimata hai te lel sama pe tute! 25 O Iehova te cherel te strălucil leschi fața opral tute hai te sicavel tuche favoarea! 26 O Iehova te dichel lașimaia caring tute hai te del-tu pacea!”». 27 Von te acharen mânro anav opral le israeliți, ca me te anav lenghe miștimata”.