Revelația
17 Iech andal efta îngeri cai sas-le le efta cupe avilea hai phendea manghe: „Av hai va avela te sicavav tuche i cris anda i bari prostituata cai beșel pe but paia. 2 Le regi pa i phuv cărde imoralitatea sexualo laia hai codola cai train pi phuv machiarde-pe anda i mol cai avilea anda lachi imoralitatea sexualo”. 3 Hai vo îngărdea-ma prin o zuralimos le spiritosco ande iech șuco than. Code dichlem iech jiuvli cai beșelas pe iech fiara zurales loli, cai sas pherdi anavența cai prasan le Devles hai sas-la efta șăre hai deș șinga. 4 I jiuvli sas hureadi ando vâneto hai lolo, pe late sas but sumnacai, cuci bara hai miriclea hai ande laco vast sas-la iech tahtai anda sumnacai pherdo buchianța melale hai neuje anda lachi imoralitatea sexualo. 5 Pe laco cicat sas scriime iech anav, pharo hachiarimasco: „O Babilono o Baro, i dei le jiuvleanghe prostituato hai le buchianghe melale pa i phuv”. 6 Hai dichlem că i jiuvli sas-li machiardi catar o rat codolenghe sfinți hai le ratestar le martorenghe le Isusosche. Cana dichlem-la, ci avilea manghe te pachiav. 8 I fiara cai dichlea-la sas hai ci mai si, tha sili gata te vazdel-pe anda o abiso hai va jiala co merimos. Hai le manușa cai beșen pi phuv – codola savenghe anava ci sas-le scriime ando sulo la viațaco de cana sas cărdi i lumea – ci va avela lenghe te pachian că i fiara sas hai ci mai si, tha că va avela pale. 9 Anda cadaia trebul iech goghi goghiaver: Le efta șăre si efta plaina, pe save beșel i jiuvli. 10 Si efta regi: panji sas perade, iech silo, hai ocoaver încă ci avilea; tha cana va avela, va mai așela țâra timpo. 11 Hai i fiara savi sas hai ci mai si, si o ohto-to rege, tha avel anda codola efta hai jial co merimos. 12 Le deș șinga cai dichlean-le si deș regi cai ci primisarde încă iech regato, tha va avela lenghe dino zuralimos sar regi anda iech ceaso ande iech than la fiaraia. 14 Von va marena-pe le Bacresa, tha, anda codoia că vo si o Rai le raiengo hai o Rege le regengo, o Bacro va marela-len. Hai va marena-pe vi codola acharde, alosarde hai loialo, cai sile lesa”. 15 Vo phendea manghe: „Le paia cai dichlean-le, pe save beșel i prostituata, si popoarea, but manușa, națiuni hai șiba. 16 Le deș șinga cai dichlean-le hai i fiara va urâna la prostituata, va pustiina-la, va mechena-la nanghi, va hana lache cotora masesche hai va thabarena-la cu sea andi iag. 17 Că o Del șiutea ande lengo ilo te pheren lesco gândo, da, te pheren pengo corcoro gândo, te den lengo regato la fiarache ji cana va pherdiona-pe le cuvintea le Devlesche.