Proverbe
3 Phande-len pe che naia hai scriisar-len pe chio ilo. 7 hai, ando timpo cana dichlemas codolende cai pachian oriso, dichlem mașcar le tărne ieche șiaves bi goghiaco. 8 Vo nachelas pi ulița, pașa o colțo la ulițaco cai beșelas cadai jiuvli, hai jialas po drom cai îngărel caring laco chăr. 9 Sas pala so mechlea-pe tele o cham pi riat; cana șiolas-pe i riat hai o tunearico. 10 Hai dichlem că avilea angla leste iech jiuvli huriadi sar codola cai soven avere murșența hai cai sas-la iech ilo cai athavelas. 11 La sila baro mui hai ci așunel chanicastar. Ci beșel niciechdata chăre. 12 Sili cana avri, cana andel piețe cai si but manușa hai ajucărel cioricanes ca fiesavo colțo. 13 Voi țârdel-les hai ciumidel-les, pala codoia, bi lajiavesco, phenel lesche: 14 „Trebuisardea te anav chichiva jertfe anda mulțumiri. Aghies pherdem mânre promisiuni. 15 Anda codoia avilem angla tute, caște rodav tut, hai arachlem tut! 16 Lașiardem șucar mânro pato, șiutem pe leste iech plapuma colorime anda o Egipto. 17 Șiutem pe mânro pato smirna, aloe hai scorțișoara. 18 Av te machioas iubireasa ji teharin, hai te bucurisaras amen iech averestar iagasa bari. 19 Că mânro rrom ci silo chăre, tiliardea dur. 20 Hai lea pesa o gonorro le lovența hai ci avel chăre ji ando ghies cana o șionoto si pherdo”. 21 Voi diliarel leschi goghi. Prin lache gugle dumes voi țârdel-les peste. 22 De iechdata, vo jial pala late, sar o guruv cai jial te avel șindo hai sar o dilo cai jial te avel pedepsime andel butuci, 23 ji cana iech săgeata pusavel lesco buco. Sar i ciricli cai sighiarel te jial andi capcana, vo ci jianel că va hasarela peschi viața. 24 Hai acana, mânro Șiav, așun mandar, le sama ca le dumes cai phenav-le tuche. 25 Te na meches chio ilo te jial caring lache droma. Te na hasares tut hai te na arăsăs pe lache droma. 26 Anda codoia că voi cărdea bute manușen te peren mudarde hai sile but codola saven mudardea-le. 27 Laco chăr si o drom caring o Mormânto hai jial tele caring le thana cai si o merimos.