2 Corinteni
3 Așardo te avel o Del hai o Dad amare Raiesco Isus Cristos, o Dad la milaco duioso hai o Del cai zuriarel amen, 4 cai mângâil-ame ande sea amare necazuri, ca prin i mângâierea cai primisaras-la le Devlestar, te daisaras te mângâisaras codolen cai nachen prin orisavo zumaimos. 8 Căci ci camas te na prinjianen, phralale, o pharimos prin savo nachleam andi provincia Asia. Samas ande iech situația zurales phari, opral amaro zuralimos, cadea că ci mai jiangleam barem dacă mai așias andi viața. 9 Chiar vi simțosardeam că samas condamnime co merimos. Tha cadaia sas caște șioas amaro pachiamos na ande amende, tha ando Del cai ușteavel le mulen. 10 Vo scăpisardea amen anda iech pericolo merimasco hai va mai scăpil-ame; hai si amen i speranța ande leste că va scăpil-ame vi mai dur. 11 Vi tumen daștin te ajutin amen prin tumare manglimata anda amende. Cadea, but jene va anena mulțumiri anda amende anda i favoarea cai primisardeam-la sar răspunso ca le butenghe rugăciuni. 21 Tha codo cai garantil că vi tumen, hai vi amen sam le Cristososche hai codo cai machlea-ame silo o Del. 22 Vo șutea pe amende o sigilo hai dea ande amaro ilo o spirito sar garanția anda so va avela. 24 Na că sam stăpâni pe tumaro pachiamos, tha cheras buchi ande iech than caște aven fericime, anda codoia că tumen așen zurale prin tumaro pachiamos