Ioan

8 Mânro Dad si glorifichime prin cadaia: că tumen den but rodo vi mai dur hai că sicaven că san mânre discipoli. 9 Cadea sar o Dad iubsardea-ma man, cadea iubisardem vi me tumen; așen ande mânri iubirea. 10 Dacă încăren mânre porunci, va așena andi mânri iubirea, cadea sar vi me încărdem mânre Dadesche porunci hai așiav ande leschi iubirea. 12 Ita mânri porunca: Te iubin tumen iech averes cadea sar me iubisardem tumen. 13 Chanicas nai-les iubirea mai bari sar codoles cai del peschi viața anda pesche amala. 14 Tumen san mânre amala dacă cheren so phenav tumenghe. 15 Ci mai phenav tumenghe sclavi, anda codoia că o sclavo ci jianel so cherel lesco stăpâno. Phenav tumenghe că san mânre amala, pentru că sea-l buchia cai așundiom-le mânre Dadestar cărdiom-le prinjiande vi tumenghe. 19 Dacă cherenas partea andai lumea, i lumea iubilas tumen. Tha, anda codoia că ci cheren partea andai lumea, hai me alosardem tumen andai lumea, i lumea urâl tumen. 20 Anen ande tumari goghi i duma cai phendem-la tumenghe: Iech sclavo ci silo mai baro sar lesco stăpâno. Dacă persecutisarde man, vi tumen va avela te persecutin tumen; dacă line-pe pala mânro cuvânto, va lena-pe vi pala tumaro. 24 Cărdem mașcar lende buchia cai chonic ci daștilas te cheren-len. Dacă ci cărdemas-len, ci avileas-len nici iech păcato. Tha acana dichle man hai urâsarde vi man, hai vi mânre Dades. 25 Cadaia întâmplosardea-pe caște pherel-pe lenghi Legea: «Urâsarde man bi te avel-len sostar»”.