So si amența cana meras?

Hasardean vroiechdata varecas cuci ando merimos? Daștil-pe că chio ilo sas zurales duchado hai pușlean-tu: „So si amența cana meras? Mai daisaras te dichas vroiechdata codolen cuci cai mule?”. Ande cadai lecția hai andi lecția cai avel, va avela te araches le răspunsuri la Bibliache, cai daștin te len o pharimos pa chio ilo.

1. So si amența cana meras?

O Isus phendea că o merimos si sar iech bari lindr. Ieche manușes cai siles iech bari lindr ci jianel chanci anda so si pașa leste. Sostar daisaras te phenas că o merimos si sar iech lindr? Pala soste merel iech manuș, ci mai duchal-les chanci. I Biblia sicavel că „le mule ci jianen chanci”. (Citisaren Eclesiasto 9:5.)

2. So miștimata si amen cana prinjianas o ciacimos anda o merimos?

But manușa daran le merimastar hai vi le mulendar. Tha so phenel i Biblia anda o merimos, daștil te zuriarel chio ilo. O Isus phendea: „O ciacimos va eliberila tumen”. (Ioan 8:32) Chichiva religii sicaven că, pala soste iech manuș merel, lesco sufleto trail mai dur. Tha i Biblia ci sicavel cadai buchi. Cadea că, le manușes ci mai siles niciech duch pala soste merel. Hai, anda codoia că le mule ci mai jianen chanci, von ci daștin te cheren amenghe nasul. Cadea că, amen ci trebul te cheras vareso anda le mule ca von te na aven holiarde, nici te anas lenghe închinarea, hai nici te mangas-ame le Devlesche anda lende.

Si manușa cai phenen că daștin te den duma le mulența. Tha cadaia na-i ciaces. Cadea sar sichileam, le mule „ci mai jianen chanci”. Codola cai pachian că den duma penghe mulența, ci den duma ciaces lența; von den duma le demonența, cai phenen că sile lenghe mule. Cadea că, cana prinjianas o ciacimos anda o merimos, vo feril-ame catar le demoni. O Iehova phenel amenghe de mai anglal te na camas te das duma le mulența, anda codoia că va avela te das duma le demonența, cai va cherena amenghe but nasul. (Citisaren Deuteronomo 18:10-12.)

3. O ciacimos anda codola cai sile mule

Le manușa pa sea i phuv pachian buchia diferime anda so si amența cana meras. Tha ci daștin te aven ciace sea cadal buchia ande save pachian le manușa.

• So pachian andal mule le manușa anda o than cai tu beșes?

MATERIALO VIDEO: Savi si i starea le mulenghi? (iech cotor) (1:19)

Citisaren Eclesiasto 3:20 hai pala codoia den duma:

• Cadea sar sicavel o verseto, so si le manușeia cana merel?

• Așel vareso jiuvindo anda o manuș pala so merel?

I Biblia del duma anda o merimos le Lazărosco, iech lașio amal le Isusosco. Caște diches so phendea o Isus anda o Lazăr cai sas mulo, citisaren Ioan 11:11-14 hai pala codoia den duma:

• Sar phendea o Isus că si o merimos?

• Sar ajutil-ame cadaia te hachiaras so si codolența cai mule?

• Tu pachias so phenel i Biblia anda o merimos?

4. O ciacimos andal mule anel amenghe miștimata

Cana prinjianas o ciacimos anda o merimos, ci mai daras le mulendar. Citisaren Eclesiasto 9:10 hai pala codoia den duma:

• Daștin te cheren amenghe vareso nasul le mule?

Mai but, cana prinjianas o ciacimos andai Biblia, amen ci mai pachias le hohaimata cai phenen-pe andal mule. Sar exemplo, ci mai pachias că trebul te cheras vareso anda lende caște na aven holiarde sau că trebul te anas lenghe închinarea. Citisaren Isaia 8:19 hai Revelația 4:11 hai pala codoia den duma:

• So si ando ilo le Iehovasco cana dichel că varecon camel te del duma le mulența sau anel lenghe închinarea?

5. O ciacimos anda le mule lel o pharimos pa amaro ilo

But manușa sas sicade te pachian că pala o merimos, va avena chinuime caște pochinen anda le buchia nasul cai cărde-le. Tha i Biblia sicavel că le mule ci mai jianen chanci; cadea că nici codola cai cărde buchia nasul ci sile chinuime pala soste meren. Cadaia lel o pharimos pa amaro ilo. Citisaren Romani 6:7 hai pala codoia den duma:

• I Biblia phenel că, cana merel iech manuș, o Del ci mai dichel-les doșalo anda so cărdea. Acana că jianes cadal buchia, tu pachias că le mule mai sile chinuime anda le buchia nasul cai cărde-le?

Cana arăsas te prinjianas mai mișto le Iehovas, hachiaras că vo ci chinuil niciechdata le manușen cai mule. Citisaren Deuteronomo 32:4 hai 1 Ioan 4:8 hai pala codoia den duma:

• Cadal versetea sicaven sar si o Del. Daștilas vo te chinuil le manușen pala soste meren?

• Pachias că o ciacimos andal mule daștil te lel vi o pharimos pa chio ilo? Sostar?

SO SICHILEAM

Cana iech manuș merel, chanci anda leste ci mai așel jiuvindo. Le mule ci mai sile chinuime hai nici ci daștin te cheren amenghe nasul.

So dichleam

• So si le manușeia cana merel?

• So miștimata anel amenghe o ciacimos andal mule?

• Sar lel o pharimos pa amaro ilo, o fapto că jianas o ciacimos andal mule?

RODE MAI BUT

Va avela te diches sar trebul te hachiaras o cuvânto „sufleto”, cadea sar arachas-les andi Biblia.

„So si o sufleto?” (Articolo pa amaro site-o)

Va avela te diches că o Del ci chinuil ando iado le manușen cai cheren buchia nasul.

Si ciaces o iado iech than cai le mule sile chinuime? (3:07)

Trebulas te daras le mulendar?

Le spiritea le mulenghe – Daștin te ajutin-tu sau te cheren tuche nasul? Existin von ciaces? (broșura)

Va avela te diches so miștimata sas ieche murșes anda codoia că prinjiandea o ciacimos andal mule.

„Le răspunsuri cai arachlem-le andi Biblia, zuriarde-ma” (O Turno de veghe, 1 februaria 2015)