Mânri șucar viața ando servicio le Iehovasco

Ando bărș cai avilea, sas cărdo iech anunțo că sas nevoia phralendar cai te cheren buchi ca i filiala anda Africa de Sud, cai avelas șiuti iech presa rotativo. Phendem că vi me camav te jiav, hai bucurisardem-ma că somas alosardo te jiav ande iech than avere pharelența beteliști anda Canada, po anav: Dennis Leech, Bill McLellan hai Ken Nordin. Phende amenghe că si ame biletea numai ji code.

Sunisardem mânra deia hai phendem lache: „Deie, camav te phenav tuche vareso, jiav andi Africa de Sud”. Mânri dei ci delas duma but, tha sas-la iech baro pachiamos hai iech spiritualitatea zurali. Ci phendea prea but buchia, tha jianglem că susținilas-ma. Mânre dada sas duchade că jiav cadichi de dur, tha cu sea cadala ci phende manghe te na jiav.

CARINIG I AFRICA DE SUD

Mai anglal, găleam sea le ștar phrala co Betelo anda Brooklyn, cai samas sicade trin șiona sar te folosisaras o linotipo hai i presa de tipărit. Pala codoia, leam i barca cai jialas ando Cape Town, Africa de Sud. Atunci sas-ma numai 20 bărșa. Anda Cape Town leam o treno ji co Johannesburg. Găleam pi riat hai cana pâtărdea-pe o mui le ghiesesco arăsleam ande iech țâno foro anda Karoo, iech than șuco. Sas baro tachimos hai but prafo. Ci avelas amenghe te pachias cana dichleam cai arăsleam. So avelas te ajucărel-ame? Chichiva bărșa mai târzio, avelas te avas parpale hai te dichas avere iachența cadal șucar thana hai i liniștea catar.

Chichiva bărșa, cărdem buchi co linotipo, iech mașina complicato hai interesanto. Trebulas te pregătiv hai te șioav le rânduri literența ande plăcuțe cărde anda plumbo, caște aven tipărime le revistea O Turno de veghe hai Ușten!. I filiala tipărilas revistea ande mai but șiba africano, na numai anda Africa de Sud, tha vi anda but aver thema anda Africa. I presa rotativo saveate avileam te cheras buchi anda i coaver rig la phuviachi sas zurales but folosime!

Mai târzio, cărdem buchi ande iech birouo ando Departamento cai organizilas i traducerea, i tipărirea hai sar sas bișaldi i literatura. Chiar cana sas-ma but buchi, i viața co Betelo andea manghe but bucuria.

I CĂSĂTORIA HAI IECH NEVI REPARTIȚIA

Ande 1968 căsătorisardema iecha pheiasa pioniera po anav Laura Bowen, cai beșelas pașa o Betelo. Voi cherelas buchi vi ando Departamento de traducere cai scriilas le publicații. Ande codol ghiesa, codola cai căsătorinas-pe ci așenas ando Betelo, cadea că samas numime pionieri speciali. Darailem iech țâra. Pala 10 bărșa ando Betelo, cai sas-ma hamos hai iech than cai te beșav, ci jianglem so avelas te cherav caște avel-ame sea so trebul anda o subsidio de pionier specialo. Ande fiesavo șion, primisardeam fiesavo anda amende 25 ranzi (adică ande codoi vremea cam 35 dolarea americano), tha cadaia numai cana cărdeamas le ore cai trebunas, le vizite ulterioare hai deamas le publicații. Cadale lovența trebulas te pochinas i chiria, o hamos, o transporto hai vi le cheltuieli anda amaro sastimos hai personalo.

Samas bișalde ande iech țâni grupa, pașa o foro Durban, pa o malo le Oceanosco Indiano. Cade sas mai but indieni, cai sas le urmași codolenghe cai sas adine andi Africa de Sud co sfârșito le bărșengo 1800, caște cheren buchi andi industria le zaharoschi. Acana cherenas buchi aver vareso, tha încărde penghi cultura hai o hamos, sar si o lașio curry. Hai, so ajutisardea-ame o mai but sas că denas duma i șib englezo.

Le pionieri speciali trebunas te predichin 150 ore pe șioneste, anda codoia, me hai i Laura camleam ca ando iechto ghies te predichisaras șov ore. Sas zurales tato hai o aero sas umedo! Ci sas-ame vizite ulterioare hai nici studii biblico, cadea că ajucărenas-ame șov ore andi predicarea chăr chărestar. Pala iech timpo, dichlem o ceaso: nachle numai 40 minutea! Gândisardem-ma: Sar va avela te cheras pionierato specialo ande cado modo?

Tha, pala țâra timpo, samas mai organizime. Leam amența ande fiesavo ghies haben sau cafeaua. Cana camleam te beșas iech țâra, așiadeam amari țâni mașina tela i ucial ieche cașteschi. Po iechdata chidenas-pe pașa amende le șiave indieni, cai cherenas bare iacha pe amende. Pala chichiva ghiesa, deam amari sama că pala dui, trin ore, o timpo nachelas sigo.

Ce bucurime samas te das duma anda o ciacimos la Bibliaco le manușența ospitalieri anda cado teritorio! Le indieni phiravenas-pe șucar, sas-le pherde respecto hai daranas le Devlestar. But andal hinduși camle te așunen amaro mesajo. Placialas-le te sichion anda o Iehova, anda o Isus, anda i Biblia, anda i lumea nevi hai anda i speranța le jiuvindimaschi. Pala iech bărș, sas ame 20 studii biblico. Ande fiesavo ghies, haleam ca iech andal familii casa studiisardeam. Placiaia-ame but cado teritorio.

Tha, na pa but timpo, samas bișalde andi lucrarea intineranto po șucar malo le Oceanosco Indiano. Ande fiesavo curco, beșleam ca iech familia phralenghi cana vizitisardeam lenghi congregația. Cărdeam lucrarea ande iech than lența hai zuriardeam-le. Von phirade-pe amența sar cana avileamas anda lenghi familia, samas bucurime te beșas lența hai lenghe șiavența. Sas dui șucar bărșa. Pala codoia, bi te ajucăras-ame, primisardeam iech telefono catar i filiala. Phende amenghe: „Camas te aven pale co Betelo”. Ame phendeam lenghe: „Placial-ame but amari repartiția cai si ame acana”. Tha, si ciaces, camleam te slujisaras oricai samas bișalde.

AVAS PALE CO BETELO

Cărdem buchi co Departamento anda servicio, cai sas-ma o privilegio te cherav buchi ande iech than bute phralența zurale spiritualo. Ande codo timpo, fiesavi congregația cai sas vizitime catar o supraveghetoro de circumscripție, primilas iech lil pala o raporto cărdo cadalestar. Cadal lila sas-le bișalde caște zuriaren le phralen hai te den-le sfaturi lașe. Cadaia sas iech buchi phari anda le secretari, te traducin le lila anda xhosa, zulu hai aver șiba andi engleza, hai pala codoia anda engleza ande le șiba africano. Anda mande sas zurales cuci cadal phrala cai cărde i traducerea. Von ajutisarde-ma te hachiarav save sas le pharimata prin save nachle amare phrala africani.

Atunci, o guverno anda Africa de Sud ci mechelas ca le manușa de diferime rase te așen ande iech than. Fiesavo grupo rasialo beșelas hai cherelas buchi ande anumime thana, caște aven ande iech than manușența anda diferime rase. Amare phrala africani cale denas duma hai predichinas numai ande lenghi șib hai jianas ca le întruniri cai delas-pe duma lenghi șib.

Ci prinjiandemas but phrala africani cale anda codoia că somas sea o timpo andel congregații de șib englezo. Tha, acana daisardem te prinjianav mai but buchia anda lende, anda lenghi cultura hai obiceiuri. Mai but, dichlem prin ce pharimata nachle amare phrala anda codoia că ci lenas partea ca le religii localo hai ca lenghe tradiții. Trebulas lenghe but tromai caște duriaren pendar le tradiții nebiblico, le practici spiritisto hai i ura cai avelas catar lenghe familii hai le manușendar anda o gav. But manușa sas-le ciore, nesicade, tha cu sea cadala respectinas but i Biblia.

Sas-ma o privilegio te cherav buchi ca chichiva cazuri juridico anda i libertatea de închinare hai i neutralitatea. Cana dichlem i loialitatea hai o tromai le tărnenghe Martori, cadaia zuriardea mânro pachiamos. Von sas-le dine avri andai școala anda codoia că ci camle te phenen rugăciuni sau te ghilaban imnuri religioso.

Ande iech țâno them africano, cai bușiolas Swaziland, le phralen sas-le aver pharimos. Cana o rege Sobhuza o duito mulea, sea codolendar cai beșenas code manglea-pe te încăren chichiva obiceiuri anda o prahimos. Le murșa trebuisarde te randen pengo șăro, hai le jiuvlea te șinen harnes penghe bala. But phrala hai pheia sas-le persecutime anda codoia că ci camle te încăren cadal obiceiuri cai anenas pachiv le mulenghe. Lenghi loialitatea caring o Iehova arăslea ande amaro ilo. Sichileam but buchia anda loialitatea hai răbdarea amare phralendar africano, cadaia zuriardea amaro pachiamos.

PALE CA I TIPOGRAFIA

Ande 1981, cărdem buchi pale ca i tipografia, caște ajutisarav te aven folosime le calculatoarea anda tipărirea. Sas zurales șucar codol timpuri! Le metodea de tipărire parude-pe but. Iech manuș catar iech firma, dea la filiala iech mașina de fotoculegere electronico caște avel folosime iech timpo bi te avel pochindi. Cadea că, panji mașini neve line o than codolenghe enia mașini purane. Mai but, sas andini iech nevi presa de tipărire. Acana i tipărirea jialas mai sigo sar oricana!

Le calculatoarea ajutisarde-ame te arachas neve metodea de tehnoredactare prin o Sistemo de Editare Electronico anda mai but Șiba (MEPS). Ce but lașiardea-pe i tehnologia de cana avileam anda Canada co Betelo andi Africa de Sud! (Is. 60:17) Ande codo timpo, sea le ștar leam amenghe rromnia cai iubisarde but le Iehovas hai cherenas pionierato. Me hai o Bill samas încă co Betelo, tha o Ken hai o Dennis cărde penghe familii hai beșenas pașă.

Ca i filiala cărdea-pe sea mai but buchi. Le publicații biblico sas traducime hai tipărime ande sea mai but șiba hai bișalde ca aver filiale. Anda codoia că trebulas iech nevo Betelo, mai baro, le phrala vazdine iech aver, ande iech șucar than anda Johannesburg, cai sas dedichime ande 1987. Sas-ma i bari bucuria te lav partea co bariarimos anda Africa de Sud hai te slujisarav ando Comiteto la filialaco but bărșa.

IECH AVER REPARTIȚIA

Ande 2001, sas-ma i surpriza te slujisarav ando nevo Comiteto la filialaco andal Statele Unite. Chiar dacă sas amenghe pharo te mechas amari repartiția hai le amalen anda Africa de Sud, samas zurales bucurime te începosaras iech nevi viața andi familia Betel andal Statele Unite.

Cu sea cadala, cărdeam amenghe griji că va avaia dur catar i dei la Laurachi, cai sas phuri. Simțosardeam-ame mai mișto cana așundeam că le trin pheia la Laurache camle te len sama pe late po plano fizico, emoționalo hai te ajutin-la le lovența. Von phende: „Ame ci daisaras te avas ando servicio cu timp integral, anda codoia camas te phiravas grija amara deiache, ca tume te daștin te așen andi repartiția”. Sam zurales recunoscători lenghe!

Sa cadea, mânro phral hai leschi rromni cai beșenas ando Toronto, Canada, sas-le grija mai but sar 20 bărșa amara deiatar, cai așilea phivli. Voi mulea ca țâra timpo pala soste ame arăsleam ando New York. Ame sam zurales recunoscători anda i grija cai phirade-la lache ji cana mulea. Si iech bari buchi te avel-tu neamuria cai camen te susținin-tu hai te paruven penghi viața caște aven-le grija le dadendar phure, chiar cana po iechdata cadai buchi si phari!

Andel Statele Unite, chichiva bărșa cărdem buchi ca i tipografia. O modo sar si cărdi i literatura si mai moderno hai mai simplo. Acana cherav buchi ca o Departamento de aprovizionare. Ce privilegio sas ca andel palutne 20 bărșa te cherav buchi ande cadai bari filiala cai si cam 5 000 beteliști hai cam 2 000 slujitori navetisto!

Acana 60 bărșa, ci pachiaiem că va avela-ma iech viața cadichi de barvali spiritualo ando servicio le Iehovasco! Ande sea cado timpo, i Laura sas pașa mande sea le ileia. Anda amende si cuci sea le repartiții cai sas-ame hai vi sea le phrala casa cărdeam buchi. Cana vizitisardeam le filiale, prinjiandeam mai but phrala anda diferime thana la lumeache. Acana, că sima mai but sar 80 bărșa, cherav mai țâra buchi anda codoia că si but tărne cai sas-le sicade te avel-le mai but responsabilități.

Chichi de ciace si le cuvintea cai phendea-le o psalmisto: „Fericime si i națiunea casco Del si o Iehova”! (Ps. 33:12) Som zurales recunoscătorii că daștiv te slujisarav le Iehovasche pașa lesco poporo fericime.