Si tumen pachiamos?

Caște avas cuci andel iacha le Iehovasche, trebul te avel amen pachiamos. Cu sea cadala i Biblia phenel: „o pachiamos na-i iech buchi cai te avel sea le manușen”. (2 Tes. 3:2) Ande cado verseto, o apostolo Pavel delas duma anda le manușa „nasul hai cioricane” cai persecutinas-les hai savendar camelas te hastral. Tha, le dumes cai phendea-len anda o pachiamos sile ciace anda mai but manușa. Si chichiva manușa cai ci pachian că si iech Creatoro cai cărdea sea le buchia, adică o Del. Von ci pachian cadaia chiar cana but buchia sicaven cado ciacimos. (Rom. 1:20) Aver manușa pachian că si varecon zuralo ando cerii. Tha, na cado felo pachiamasco camel o Iehova te avel amen.

Trebul te pachias anda sea o ilo că o Iehova „existil hai că vo cărdiol o pochinitorii” codolengo saven silen iech pachiamos zuralo. (Evr. 11:6) O pachiamos arachel-pe ando rodo le spiritosco sfânto le Devlesco. Caște avel amenghe dino o spirito sfânto, trebul te mangas-les le Devlestar ando manglimos. (Luca 11:9, 10, 13) Aver buchi cai daisaras te cheras-la caște avel amen o spirito sfânto si te citisaras o Lil le Devlesco. Pala codoia si mișto te gândisaras amen ca so citisardeam hai te cheras so sichileam. O spirito le Iehovasco daștil te cherel buchi ande amari viața hai ajutil amen te bariaras iech pachiamos cadea sar ciaiol Les te avel amen.