Te avas umili hai te hachiaras că ci prinjianas sea le buchia

1. So zuralimos dea amen o Iehova hai sostar?

O IEHOVA dea amen o zuralimos te gândisaras, te prinjianas neve buchia hai te hachiaras sar daisaras te cheras so sichileam. Sostar cărdea amen o Iehova cadea? Anda codoia că vo camel ‘te arachas o prinjianimos anda o Del’ hai te slujisaras lesche pala sar manghel cado ciacio prinjianimos. (Prov. 2:1-5; Rom. 12:1)

2. a) So trebul te hachiaras? (Iov 37:23, 24) (Dich vi i imaginea.) b) So miștimata si amen cana hachiaras că ci daisaras te prinjianas sea le buchia?

² O Iehova cărdea amen caște daisaras te sichioas but buchia, cu sea cadala, ci prinjianas sea le buchia. (Citisar Iov 37:23, 24.) Te gândisaras amen co Iov. O Iehova șutea lesche mai but pușimata cai sicade chichi de țâra buchia hachiarelas vo. Cadai experiența ajutisardea le Iovos te avel mai umilo hai te ortosarel pesco gândimos. (Iov 42:3-6) Vi amen si amen miștimata cana sam umili hai hachiaras că ci prinjianas sea le buchia. I umilința va ajutila amen te pachias că o Iehova va sicavela amenghe le buchia cai trebul ciaces te jianas-len caște cheras lașe alosarimata. (Prov. 2:6)

3. Anda so va avela te das duma ande cado articolo?

³ Mai dur, va avela te das duma anda chichiva buchia cai ci prinjianas-len hai sostar cadaia daștil te cherel poiechdata mai phari amari viața. Sa cadea, va avela te dichas vi sostar si ande amaro miștimos te na jianas chichiva buchia. So sichioas va zuriarela amaro pachiamos că o Iehova, „Codo cai prinjianel mișto sea le buchia” sicavel amenghe numai le buchia cai trebul ciaces te prinjianas-len. (Iov 37:16)

CI JIANAS CANA VA AVELA O SFÂRȘITO

4. Cadea sar phenel-pe ando Matei 24:36, savi si iech anda le buchia cai ci prinjianas-len?

⁴ Citisar Matei 24:36. Ci jianas cana va avela o sfârșito cadala lumeaco. Chichi timpo sas pi phuv, nici o Isus ci jianglea o „ghies hai o ceaso”.a Pala iech timpo, vo phendea le apostolenghe că o Iehova, o Baro Rai le Timposco, si codo cai alosarel cana te pheren-pe anumime buchia hai că cadala sile ‘tela lesco zuralimos’. (Fap. 1:6, 7) O Iehova alosardea cana va avela te chosel cadai lumea nasul, tha amen ci daisaras te jianas ciaces cana va avela codo ghies.

5. So daștil te avel amenghe pharo anda codoia că ci jianas cana va avela o sfârșito?

⁵ Cana gândisaras amen le buchiande cai phendea-len o Isus, hachiaras că ci jianas chichi timpo mai trebul te ajucăras ji cana va avela o sfârșito. Cadea că, daisaras te hasaras amari răbdarea sau te avas perade, vi mai but cana ajucăras de but timpo te avel o ghies le Iehovasco. Sau daștilas te avel amenghe pharo te jias angle cana codola anda amari familia sau aver manușa prasan amen. (2 Pet. 3:3, 4) Daștil-pe că pachias că daisaras te avas mai răbdători hai te avas mai zurale cana varecon prasal amen dacă avelas te jianas ciaces o ghies cana va avela o sfârșito.

6. Sostar si mișto că ci jianas o ghies cana va avela o sfârșito?

⁶ Anda codoia că o Iehova ci phendea amenghe o ghies cana va avela o sfârșito, amen daisaras te sicavas că slujisaras lesche anda codoia că iubisaras-les hai si amen pachiamos ande leste. Camas te slujisaras le Iehovasche anda sea o timpo, na numai ji ando ghies cana va avela o sfârșito, sar cana amaro pachiamos încărel numai iech timpo. Ando than te gândisaras amen mai but cana va avela ‘o ghies le Iehovasco’, avelas mai mișto te gândisaras amen le buchiande lașe cai va anela-len codo ghies. Cadea, va avela te slujisaras anda sea o ilo le Devlesche hai te cheras sea so daisaras caște avas dichle lașe iachența lestar. (2 Pet. 3:11, 12)

7. So buchi prinjianas?

⁷ Si importanto te gândisaras amen le buchiande cai prinjianas-len. Jianas că le palutne ghiesa astarde anda o bărș 1914. O Iehova dea amen mai but profeții cai phenen amenghe anda cado bărș, hai vi ande save phenel-pe sar va avena cadal ghiesa. Cadea că, pachias ciaces că „o baro ghies le Iehovasco si pașă”. (Țef. 1:14) Sa cadea, jianas vi so buchi dea amen o Iehova te cheras, te phenas chichi mai bute manușenghe i „vestea lași anda o Regato”. (Mat. 24:14) Cadai vestea lași si phendi ande cam 240 thema hai teritorii hai ande mai but sar 1 000 șiba. Ci trebul te jianas o „ghies hai o ceaso” caște predichisaras iagasa ando ilo le manușenghe.

CI JIANAS SAR VA CHERELA O IEHOVA LE BUCHIA

8. So trebul te hachiaras prin „i buchi le ciace Devleschi”? (Eclesiasto 11:5)

⁸ Amen ci jianas sea o timpo „i buchi le ciace Devleschi”. (Citisar Eclesiasto 11:5.) Anda cadal dumes trebul te hachiaras că o Iehova cherel sau mechel te întâmplon-pe chichiva buchia caște pherel peschi voința. Amen ci jianas ciaces sostar o Iehova mechel te întâmplon-pe chichiva buchia hai so va cherela vo ande amaro miștimos. (Ps. 37:5) Ci daisaras te hachiaras cu sea cadal buchia, cadea sar ci daisaras te hachiaras cu sea sar iech șiavorro bariol ando păr pesca deiaco, iech buchi cai nici le goghiaver manușa ci hachiaren-la cu sea.

9. So pharimata daștin te aven amen anda codoia că ci jianas so va cherela o Iehova ande amaro miștimos?

⁹ Anda codoia că ci jianas ciaces so va cherela o Iehova ande amaro miștimos, daștil te avel amenghe pharo te cheras chichiva alosarimata. Daștil-pe că așavas amen te cheras mai but andi buchi le Iehovaschi. Sar exemplo, daștil te avel amenghe pharo te avel amen iech viața mai simplo sau te muchisaras amen ande iech than cai si nevoia mai bute phralendar. Sau daștil-pe că pușias amen dacă o Iehova mai dichel amen lașe iachența cana ci cărdeam so șuteam amenghe andi goghi, cana jias but andi predicarea hai ci si amen studii biblico sau cana si amenghe pharo te cheras buchi ca iech proiecto anda o Iehova.

10. So calități daisaras te bariaras anda codoia că ci jianas sar va cherela le buchia o Iehova?

¹⁰ Anda codoia că ci jianas sar va cherela o Iehova le buchia, daisaras te bariaras calități zurales importanto, sar avelas i umilința. Cadea, hachiaras că le gânduri hai le droma le Iehovasche sile sea o timpo mai lașe sar amare. (Is. 55:8, 9) Sa cadea, sichioas te pachias amen mai but ando Iehova hai te mechas amen ande lesco vast cu sea caște avel amen succeso. Cana jial amenghe mișto andi predicarea sau ande aver buchi cai cheras-la anda o Del, așaras le Iehovas. (Ps. 127:1; 1 Cor. 3:7) Hai dacă le buchia ci sile cadea sar ajucărdeam amen, anas amenghe amintea că sea le buchia sile ando vast le Iehovasco. (Is. 26:12) Si importanto te cheras amari partea hai te pachias ciaces că o Iehova va cherela peschi partea. Chiar cana o Iehova ci va cherela iech miracolo cadea sar cărdea poiechdata mai anglal, te pachias anda sea o ilo că vo va sicavela amenghe so trebul te cheras. (Fap. 16:6-10)

11. So buchia importanto jianas anda o Iehova?

¹¹ Cadea că, so jianas anda o Iehova? Jianas că vo sea o timpo silo orta, goghiaver, hai că iubil amen zurales but. O Iehova dichel cuci sea so cheras anda leste hai anda amare phrala. Hai jianas vi că o Iehova pochinel parpale sea o timpo codolen cai sile loialo lesche. (Evr. 11:6)

CI JIANAS SO VA AVELA TEHARA

12. So sichioas anda o Iacov 4:13, 14?

¹² Citisar Iacov 4:13, 14. Si ciaces că chonic ci jianel so va avela tehara lesca viațasa. Ande cadai lumea, „o timpo hai le buchia cai ci ajucăras-len arăsăn le savoren”. (Ecl. 9:11) Cadea că, ci jianas dacă va avela te cheras so șuteam amenghe andi goghi sau dacă va avel amen viața te cheras codol buchia.

13. Sar daisaras te simțosaras amen anda codoia că ci jianas so va avela tehara ande amari viața?

¹³ Daștil te avel amenghe pharo cana ci jianas so va avela tehara ande amari viața. Cana daras prea but anda le buchia cai daștin te aven, daisaras te hasaras amari bucuria. Chichiva buchia nasul cai daștin te aven ande amari viața bi te ajucăras amen, daștin te duchaven but amaro ilo. Hai cana ajucăras vareso hai ci întâmplol-pe, daisaras te avas zurales perade. (Prov. 13:12)

14. Cana daștin le manușa te aven ciaces fericime? (Dich vi le imagini.)

¹⁴ Cana așias zurale andel pharimata, daisaras te sicavas că oriso avelas, slujisaras amare Dadesche anda codoia că iubisaras-les, na anda codoia că del amen miștimata. Le relatări cai si scriime andi Biblia sicaven amen că ci trebul te ajucăras le Iehovastar te feril amen catar orisavo pharimos. Sa cadea, hachiaras că vo ci alosarel so buchia va avena ande amari viața. Vo jianel că le manușa sile fericime cana așunen lestar, na cana jianen so va avela ando viitorii. (Ier. 10:23) Cana rodas so phenel amenghe o Iehova angla te alosaras so te cheras, si sar cana phenas: „Te camela o Iehova, va avela te traisaras hai va avela te cheras cadai buchi sau codoi buchi”. (Iac. 4:15)

15. So jianas anda o viitorii?

¹⁵ Chiar dacă ci jianas so va avela tehara, jianas că o Iehova phendea că va avela te traisaras anda sea o timpo pi phuv sau ando cerii. Jianas că vo ci daștil te hohavel hai chanci ci daștil te așavel-les te pherel sea pesche promisiuni. (Tit 1:2) Numai vo daștil te phenel „catar o începuto o sfârșito hai andal ghiesa purane le buchia cai ci sas-le cărde încă”. Sea le buchia cai vo phendea că va avena andel purane ghiesa, pherdile-pe, hai sea le buchia cai phendea că va avena ando viitorii, jianas că va pherena-pe. (Is. 46:10) Jianas mișto că chanci ci daștil te duriarel amen catar i iubirea le Iehovaschi. (Rom. 8:35-39) Vo del amen goghiaverimos, zuralimos, hai lel o pharimos pa amaro ilo, caște daisaras te jias angle hai te na mechas amen prin orisavo pharimos avelas te nachas. Daisaras te pachias ciaces că o Iehova va ajutila amen hai va dela amen miștimata. (Ier. 17:7, 8)

CI DAISARAS TE HACHIARAS CU SEA CHICHI DE MIȘTO PRINJIANEL AMEN O IEHOVA

16. Cadea sar phenel-pe ando Psalmo 139:1-6, so buchia jianel o Iehova anda amende hai so si ande amaro ilo cana jianas cadaia?

¹⁶ Citisar Psalmo 139:1-6. O Iehova jianel fiesavi buchi anda amende, vo jianel sostar amen gândisaras sau simțosaras iech anumime buchi, vo jianel so phenas hai so si ande amaro ilo. Vo dichel caring amende sea o timpo. Sa cadea, o Iehova jianel sea le buchia cai cheras-len hai vi sostar cheras-len. O rege David phendea că o Iehova si sea o timpo gata te ajutil amen. Lesco vast na-i niciechdata prea dur amendar. Amaro ilo bariol cana das amari sama că O Mai Baro Rai anda o universo hai Codo cai cărdea sea le buchia ando cerii hai pi phuv, dichel cadichi de but caring fiesavo de mașcar amende! Vi ande amaro ilo si so phendea o David: „Cado prinjianimos si mai baro sar daștiv me te hachiarav, si prea ucio caște arăsav leste”. (Ps. 139:6)

17. Sostar daștilas te avel amenghe pharo te hachiaras că o Iehova prinjianel amen zurales mișto?

¹⁷ Amari familia, i cultura ande savi barileam sau le buchia cai pachiaiam-len mai anglal daștin te așaven amen te dichas le Iehovas sar ieche Dades pherdo iubirea cai duchal-les ciaces amendar. Sau daisaras te simțosaras că le greșeli cai cărdeam-len mai anglal sile cadichi de bare că o Iehova ci camelas te prinjianel amen sau te pașiol amendar niciechdata. Chiar vi o David simțosardea-pe cadea. (Ps. 38:18, 21) Pe aver rig, iech manuș cai del sea peschi zor te paruvel peschi viața hai te așunel le Devlestar, daștilas te pușel-pe: „Dacă o Del hachiarel man ciaces, sostar trebulas te paruvav mânri viața cai fal-pe manghe cadea de normalo?”.

18. So miștimata si amen cana hachiaras că o Iehova prinjianel amen mai mișto sar amen prinjianas amen? (Dich vi le imagini.)

¹⁸ Daisaras te arăsas te hachiaras că o Iehova prinjianel amen mai mișto sar amen prinjianas amen hai că daștil te dichel ande amende le lașe buchia cai amen ci dichas-len. Chiar cana dichel amare imperfecțiuni hai hachiarel sostar cheras chichiva buchia, vo iubil amen zurales but. (Rom. 7:15) Cana hachiaras ciaces că o Iehova dichel mișto so daisaras te cheras, astaras i zor cai trebul amen caște slujisaras lesche mai dur fidelo hai pherde bucuria.

19. So jianas anda o Iehova?

¹⁹ Jianas că o Iehova si iubirea hai pachias ciaces cadai buchi. (1 Ioan 4:8) Jianas că so phenel amenghe vo te cheras si anda codoia că iubil amen hai camel te avel amen i mai lași viața. Sa cadea, jianas că o Iehova camel te bucurisaras amen viațatar anda sea o timpo. Vo dea le Isusos caște cherel amenghe cado daro. O merimos le Isusosco sicavel amenghe că daisaras te avas dichle lașe iachența le Iehovastar chiar cana sam imperfecți. (Rom. 7:24, 25) Mai but, jianas că „o Del silo mai baro sar amaro ilo hai prinjianel sea”. (1 Ioan 3:19, 20) O Iehova prinjianel sea le buchia anda amende hai siles o pachiamos că daisaras te cheras so les placial-les.

20. So va ajutila amen te na daras prea but le buchiandar cai ci jianas-len?

²⁰ O Iehova ci garadea amendar chanci cai daștilas te ajutil amen. Dacă hachiaras pherde umilința cado ciacimos, ci va avela te daras prea but le buchiandar cai ci jianas-len hai daisaras te gândisaras amen mai but le buchiande cai sile ciaces importanto. Cadea, sicavas că pachias amen cu sea ando Iehova, „Codo cai prinjianel mișto sea le buchia”. (Iov 36:4) Chiar cana acana ci hachiaras cu sea chichiva buchia, cana va avela te traisaras anda sea o timpo, va avela te daisaras te sichioas sea o timpo buchia neve amare Dadestar hai anda amaro Baro Del. (Ecl. 3:11)