Sea amari viața sichileam amare Bare Sicaitorestar

O EXEMPLO MÂNRE DADESCO HAI DEIACO

Co sfârșito le bărșesco 1950, mânro dad hai mânri dei tiliarde catar i Italia andi Canada hai beșle ando Kindersley, Saskatchewan. Pala țâra timpo, von prinjiande o ciacimos hai cado arăslea i mai importanto buchi anda amari viața. Anav manghe amintea că cana somas țânorro, butivar gălem sasto ghies andi predicarea mânra familiasa. Anda codoia, butivar cherav pherasa hai phenav că cărdem o „pionerato auxiliaro” cana sas man ohto bărșa!

Chiar cana sas-le ciore, mânro dad hai mânri dei sicade amen prin pengo lașio exemplo te șioas le Iehovas po iechto than ande amari viața. Sar exemplo, ando bărș 1963 von bichinde but anda penghe buchia caște chiden love hai cadea te jias co congreso internaționalo anda Pasadena, California, (SUA). Ando bărș 1972 muchisaileam ando Trail, Columbia Britanico (Canada) cam 1 000 km amare chărestar, caște slujisaras ando teritorio anda i șib italiano. Mânro dad cherelas ujimos hai lașiarelas le buchia ande iech magazino. Vo ci camlea aver buchi mai mișto pochindi caște daștil te cherel mai but andi buchi le Iehovaschi.

Mulțumisarav but mânre dadesche hai mânra deiache anda o lașio exemplo cai dine-les manghe hai mânre trine phralenghe. Anda lengo exemplo sichilem sar te cherav mai mișto i buchi anda o Iehova. Lendar sichilem vareso cai ci bâstărdem niciechdata: Dacă șioav o Regato po iechto than ande mânri viața, o Iehova va lela sama mandar. (Mat. 6:33)

ASTARAS O SERVICIO CU TIMP INTEGRAL

Ando bărș 1980, lem manghe iech șucar rromni, i Debbie, cai camelas te cherel mai but anda o Iehova. Camleam te astaras o servicio cu timp integral, cadea că, pala trin șiona de cana leam amen, i Debbie astardea o pionierato. Iech bărș pala o abiav, muchisaileam ande iech țâni congregația cai sas nevoia phralendar hai astardem vi me o pionierato.

Pala iech timpo, arăsleam te avas perade hai alosardeam te tiliaras andai congregația. Tha, mai anglal deam duma le phralesa cai vizitil le congregații. Vo phendea amenghe pherdo iubirea hai claro: „O modo sar dichen le buchia cherel te avel tumenghe pharo. Tumen dichen mai but le buchia nasul anda tumari situația. Tha, dacă roden te dichen le lașe buchia, va avela te arachen-len”. Sas chiar so trebulas te așunas. (Ps. 141:5) Cărdeam sigo so phendea amenghe o phral hai dichleam că andi congregația sas but lașe buchia. Chichiva phrala camenas te cheren mai but anda o Iehova, chiar vi le tărne hai le pheia cai lengo rrom ci sas martoro. Atunci sichileam vareso importanto: Te rodas te dichas le lașe buchia hai te pachias că o Iehova va ajutila amen te nachas prin le pharimata cai si amen. (Mic. 7:7) Samas pale bucurime hai le buchia lașiarde-pe.

Le phrala cai sicade amen ande amari iechto școala andal pionieri, slujisarde ande aver thema. Cana sicade amenghe poze hai phende amenghe prin so pharimata nachle hai le miștimata cai sas-len, camleam anda sea o ilo te avas vi amen misionari. Cadea că, alosardeam te șioas amenghe cado obiectivo.

Caște cheras so șiuteam amenghe andi goghi, ando bărș 1984 muchisaileam ando Quebec, cai sas mai but sar 4 000 km catar i Columbia Britanico. Code trebulas te sichioas iech nevi cultura hai iech nevi șib, i șib francezo. Butivar sas amen vi pharimata le lovența. Iech vremea, haleam numai le cartofi cai iech jeno mechlea amen te chidas-len pa leschi phuv. I Debbie cărdea lașe hai diferime habena anda codol cartofi. Chiar cana sas amen pharimata, cărdeam sea so daisardeam caște jias angle pherde bucuria. Mai but, dichleam sar o Iehova lea sama amendar. (Ps. 64:10)

Ande iech ghies, varecon sunisardea amen hai phendea amenghe vareso cai ci ajucărdeam amen. Samas acharde te slujisaras co Betelo andai Canada. Anda codoia că mai anglal cărdeam i cererea anda i Școala Galaad, cana samas acharde co Betelo simțosardeam amen bucurime tha vi perade. Cu sea cadala, găleam co Betelo. Cana arăsleam code, deam duma le phralesa Kenneth Little, anda o Comiteto la filialaco hai pușleam-les: „So va avela te cheras dacă sam acharde ca i Școala Galaad?” Vo phendea amenghe: „Va avela te dichas cana va arăsăla codo ghies”.

Pala iech curco arăslea codo ghies, me hai i Debbie samas acharde ca i Școala Galaad. Trebulas te alosaras so te cheras. O phral Little phendea amenghe: „Oriso alosaren te cheren acana, daștil-pe că pala iech timpo va gândina că trebunas te alosaren i coaver buchi. Vi le dui buchia sile lașe; o Iehova daștil te binecuvântil orisavi anda lende”. Ji la urmă, alosardeam te jias ca i Școala Galaad hai andel bărșa cai avile dichleam chichi de ciace sas le dumes le phralesche Little. Butivar phendeam vi amen cadaia chichiva phralenghe cai trebunas te alosaren mașcar diferime repartiții.

I VIAȚA SAR MISIONARI

Samas bucurime te avas mașcar le 24 phrala hai pheia andai clasa 83 andai Școala Galaad. Cadaia incărdea-pe andi aprilia 1987 ando Brooklyn, New York. O Ulysses Glass hai o Jack Redford sas le phrala cai sicade amen o mai but ca i Școala Galaad. Cadal panji șiona nachle zurales sigo, hai ande 6 septembria, 1987, terminisardeam i școala. Samas bișialde ando Haiti ande iech than le phralesa John hai la pheiasa Marie Goode.

Anda o bărș 1962, de cana le palutne misionari sas-le dine avri anda Haiti, ci mai sas bișialdo chonic ande codo than catar i Școala Galaad. Trin curche pala so terminisardeam i școala, găleam ando Haiti ande iech țâni congregația mașcar le plaina, cai sas 35 phrala. Samas tărne, trebulas te sichioas but buchia hai beșleam corcore ande iech chăr andal misionari. Le manușa sas-le ciore hai le mai but anda lende ci jianenas te citin. Ande codo timpo, cana astardeam te slujisaras sar misionari, nachleam prin diferime pharimata sar avelas marimata mașcar le manușa, nehachiarimata politico, manușa cai cherenas bare iaga caște phandaven le droma hai dezastrea naturalo.

Sichileam but amare phralendar hai pheiandar anda Haiti cai așile zurale hai bucurime chiar cana nachle prin pharimata. Buten sas-len iech viața phari, tha iubinas but le Iehovas hai lengo ilo thabolas anda i predicarea. Anav manghe amintea iecha pheiatar mai phuri cai sichilea te phenel anda goghi cam 150 versetea, chiar cana ci jianelas te citil. Le pharimata le manușenghe cai beșenas code, cărde amen te camas vi mai but te phenas i vestea lași anda o Regato, i corcori buchi cai daștil te chosel lenghe pharimata. Amaro ilo hutel bucuriatar cana dichas că chichiva anda le manușa casa sichileam andai Biblia arăsle pionieri regulari, pionieri speciali hai phure de congregație.

Ando Haiti arachlem ieche tărne murșes, o Trevor, cai sas iech misionaro mormono hai savesa daisardem te dav duma andai Biblia țâra timpo. Pala chichiva bărșa, bi te ajucărav man, primisardem iech lil lestar cai phenelas: „Va avela te bolav man co congreso cai avel. Camav te avav parpale ando Haiti hai te slujisarav sar pioniero specialo ande sa codo than cai somas misionaro mormono”. Hai cadaia cărdea but bărșa ande iech than pesca rromniasa.

EUROPA HAI PALA CODOIA AFRICA

Andi Europa de Est i predicarea astardea te bariol, anda codoia samas bișialde te slujisaras code. Ando bărș 1992 arăsleam andi Ljubljana (Slovenia) pașa o than cai barilea mânro dad hai mânri dei angla te jian andi Italia. Ande chichiva thana andai purani lugoslavia, încă sas războio. I filiala andai Viena (Austria) anda Zagreb (Croația) hai anda Belgrad (Serbia) lenas sama catar i predicarea anda codo than. Anda i purani lugoslavia sas cărde ștar thema, save avenas te aven-len fiesaves iech Betelo.

Acana trebulas te sichioas iech nevi șib hai iech nevi cultura. Le manușa anda Slovenia phenenas butivar: „Jezik je težek”, cai însemnol: „I șib si phari”. Hai chiar cadea si! Sas zurales cuci anda amende i loialitatea le phralenghi cai sas-le gata te len-pe pala le paruimata cai cărdea-len i organizația hai dichleam sar binecuvântisardea-len o Iehova. Dichleam încă iech data sar o Iehova lașiarel le buchia pherdo iubirea hai co mai lașio momento. Le buchia cai sichileam-len mai anglal ajutisarde amen te na mechas amen ande le bărșa cai beșleam andi Slovenia, hai code, sichileam vi aver neve buchia.

Tha acana, amari viața avelas te paruvel-pe pale. Ando bărș 2000 samas bișialde ando Côte d’Ivoire, andi Africa de Vest. Pala codoia andi noiembria 2002 cade astardea iech războio hai trebuisardea te tiliaras andi Sierra Leone. Code chiar atunci terminisardea-pe o războio cai încărdea 11 bărșa. Sas zurales pharo anda amende te tiliaras cadea de sigo anda Côte d’Ivoire, tha le buchia cai sichileam-len mai anglal ajutisarde amen te na hasaras amari bucuria.

Ande amari nevi repartiția, camleam te gândisaras amen le manușende cai camenas te așunen o ciacimos hai le phralende cai așile zurale andel bărșa cana sas o războio. Von sas-le ciore tha gata te den buhle vastesa anda so sas-len. Iech phei camlea te del chichiva hureaimata mânra rromniache. I Debbie ci camlea te lel-len, tha i phei phendea lache: „Cana sas o războio, le phrala anda aver thema ajutisarde amen. Acana, camas vi amen te ajutisaras tumen”. Cadaia arăslea ande amaro ilo hai camleam vi amen te las amen pala lende.

Ji la urmă găleam parpale ando Côte d’Ivoire tha, le nehachiarimata politico cărde te aven pale marimata mașcar le manușa. Cadea că, andi noiembria 2004 trebuisardea te nașas sigo le elicopterosa hai daisardeam te las amența numai iech bagajo de 10 kg. Codoi riat suteam tele ande iech baza militaro francezo, hai o duito ghies tiliardeam andi Elveția. Arăsleam andi filiala de cothar ando mașcar la ratiaco. Le phrala anda o Comiteto la filialaco, le phrala cai încăren le Școli anda o Sicaimos Ministerialo hai lenghe rromnia primisarde amen lașe habenesa hai bute ciocolatasa andai Elveția. Cadaia cărdea te simțosaras amen ciaces iubime.

Samas bișialde iech timpo andi Ghana hai pala so așade-pe le marimata, risaileam ando Côte d’Ivoire. O lașimos cai sicade amenghe le phrala ajutisardea amen te nachas prin cadal bare pharimata. Chiar cana andi organizația le Iehovaschi si vareso normalo te iubisaras amen iech averes, me hai i Debbie camleam te încăras sea o timpo andi goghi chichi de cuci si i iubirea mașcar le phrala. Pala iech timpo dichleam că vi codol phare ghiesa ajutisarde amen te sichioas but buchia.

O ORIENTO MAȘCARUTNO

Ando bărș 2006 o sedio mondialo bișialdea amenghe iech lilorro ande savo phende amenghe te astaras iech nevi repartiția ando Oriento Mașcarutno. Acana trebulas te pregătisaras amen anda aver neve buchia, neve pharimata, iech nevi șib hai cultura. Ande codo than, ande savo sas but nehachiarimata politico hai religioso, avelas te sichioas but buchia. Ciailea amen te dichas chichi de but șiba denas-pe duma andi congregația hai vi te dichas că, cana las amen pala le îndrumări cai del amen i organizația, i congregația așel chidini. Dichleam cuci le phralen anda codoia că pherde tromai, așile zurale cana lenghe familii, lenghe colegi catar i școala hai catar i buchi hai vi le jene cai beșenas pașa lende, așile lenghe contra.

Ando bărș 2012 găleam ca iech congreso specialo ando Tel Aviv (Israel). Cado sas o iechto congreso pala i Penticosta anda 33 a.e. ande savo chidine-pe cadea de but phrala ande codo than. Ci va avela te bâstras codo ghies!

Ande codol bărșa samas bișialde ande iech them cai ci mechenas amen te predichisaras. Leam chichiva lila amența, găleam andi predicarea hai vi chichiva întrunirende țâne. Dichleam soldați armența peste sea cai beșenas te controlin le manușen. Cu sea cadala, găleam ande mai but thana bi te țârdas i atenția hai simțosardeam amen andi siguranța pașa le phrala cai sas-le amența.

PARPALE ANDI AFRICA

Ando bărș 2013 primisardeam iech repartiția zurales diferime, te slujisaras andi filiala anda Kinshasa (Congo). Codo them sas zurales șucar tha nachlea but timpo prin iech baro ciorâmos hai but marimata. Mai anglal phendeam: „Jianas sar si andi Africa. Sam pregătime”. Tha sas amen but buchia te sichioas, vi mai but cana trebuisardea te phiras prin thana cai ci sas nici droma. Dichleam vi but buchia lașe sar avelas, că le phrala ci mechle-pe te slujin bucuriasa chiar cana sas-len pharimata le lovența. Dichleam vi lenghi iubirea anda i predicarea hai că denas sea penghi zor te jian ca le întruniri hai le congresea. Dichleam amare iachența că o Iehova sas-lo pașa amende hai ajutisardea amen anda codoia că, sea mai but manușa prinjiande o ciacimos ande cado them. Ande le bărșa cai slujisardeam ando Congo sichileam but sumnacune buchia hai cărdeam amenghe amala cai sile sar amari familia.

Co sfârșito le bărșesco 2017, arăsleam ande iech nevi repartiția andi Africa de Sud. Ci slujisardeam niciechdata ande iech filiala cadea de bari hai le buchia cai sas amenghe dine te cheras-len code sas-le neve anda amende. Vi cade sas amen but buchia te sichioas, tha so sichileam ji acana ajutisardea amen zurales but. Iubisaras le phralen hai le pheian anda cado them cai așen zurale ando pachiamos de but bărșa. Sam zurales bucurime te dichas chichi de chidine si le phrala anda o Betelo chiar cana aven anda thema hai culturi diferime. Dichas amare iachența sar o Iehova del pacea pesche manușenghe cana paruven-pe hai len-pe pala so phenel i Biblia.

Ande cadal bărșa, me hai i Debbie slujisardeam ande șucar repartiții, prinjiandeam diferime culturi hai sichileam diferime șiba. Ci sas sea o timpo ușoro, tha simțosardeam sea o timpo i iubirea le Iehovaschi prin leschi organizația hai prin amare phrala. (Ps. 144:2) Jianas ciaces că sea so sichileam ande cadal bărșa ajutisardea amen te avas slujitori mai lașe le Iehovasche.

Mulțumiv anda sea o ilo mânre dadesche hai mânra deiache anda le buchia cai sicade man, mânra gulea rromniache, i Debbie, cai sas sea o timpo pașa mande hai vi le phralenghe pa sea i phuv cai sile lașe exemplea. Me hai i Debbie camas zurales but te mechas amen sicade amare Bare Sicaitorestar vi mai dur!