So si o studio biblico le Martorența le Iehovasche?
Le Martori le Iehovasche camen te ajutin-tu te hachiares i Biblia mai ușoro. Iech studio biblico amența daștil te ajutil-tu:
te avel-tu iech viața fericime
te pașios le Devlestar
te jianes so phenel i Biblia anda sar va avela amaro viitorii
Ande cadai pagina:
Daștiv te cherav studio numai iech data caște dichav sar si?
Dacă cherav cado studio, trebul te cărdioav iech Martoro le Iehovasco chiar cana ci camav?
Dacă mai studiisardem i Biblia le Martorența le Iehovasche, daștiv te studiiv pale?
Mai si aver modo te studiiv i Biblia, bi ieche Martoresco le Iehovasco?
Sar încărel-pe iech studio biblico?
Iech Martoro le Iehovasco va ajutila-tu te hachiares i Biblia, pe subiectea. Anda o lil Bucurisar-tu viațatar anda sea o timpo! va avela te sichios țâra po țâra so phenel i Biblia hai sar daștil voi te ajutil-tu. Dich mai but ande cado materialo video.
Trebul te pochinav anda cado studio?
Nici. Le Martori le Iehovasche len-pe pala so phendea o Isus pesche discipolenghe: „Bi lovengo primisardean, bi lovengo te den”. (Matei 10:8) Ci trebul te pochines chanci anda le lila anda o studio cai si: iech Biblia hai o lil Bucurisar-tu viațatar anda sea o timpo!
Chichi timpo încărel o studio biblico?
Ando lil si 60 lecții. Tu alosares chichi de sigo va avela te cheres cadal lecții. Tha but anda codola cai sichion, camen te cheren iech lecția sau mai but ande iech curco.
So trebul te cherav caște astarav-les?
1. Pher o formularii online. Va avela te folosisaras che date personalo numai caște daștis te des duma ieche Martoreia, cadea sar manglean.
2. Iech Martoro va dela duma tusa. Vo va sicavela tuche so si o studio biblico hai va avela te del-tu răspunso ca orisavo pușimos cai daștil te avel-tu.
3. Alosaren ande iech than cana hai sar te studiin. Daștin te dichen tumen fizico caște încăren o studio, daștin te dichen tumen prin video sau te studiin co telefono, prin lila sau prin e-mail. Fiesavo studio încărel cam iech ceaso, tha daștil te încărel mai but sau mai țâra, pala sar cames tu.
Daștiv te cherav studio numai iech data caște dichav sar si?
Sar te na! Caște cheres cadaia, pher o formularii online. Cana des duma le Martoreia, phen lesche că cames te cheres numai iech data o studio, caște diches sar si hai dacă placial-tu. O phral sau i phei casa des duma va studiila tusa anda i broșura Bucurisar-tu viațatar anda sea o timpo, cai sila numai le dintune trin lecții hai cadea daștis te diches sar si.
Dacă cherav cado studio, trebul te cărdioav iech Martoro le Iehovasco chiar cana ci camav?
Nici. Le Martori le Iehovasche den duma le manușența anda i Biblia pherde bucuria, tha ci spiden-le te cărdion Martori. Amen sicavas le manușen so phenel i Biblia, tha mechas fiesaves te alosarel so te cherel. (1 Petru 3:15)
Daștiv te folosisarav mânri Biblia?
Da, daștis te folosis orisavi Biblia cames. Amen folosisaras mai butivar i Biblia – Traducerea la lumeachi nevi, anda codoia că si claro hai exacto, tha hachiaras că but alosaren iech traducerea cai prinjianen-la mai mișto.
Daștiv te acharav vi averen co studio?
Da. Daștis te achares sea chi familia
Dacă mai studiisardem i Biblia le Martorența le Iehovasche, daștiv te studiiv pale?
Da. Mai but, daștil-pe că acana o studio va avela vi mai șucar anda tute, anda codoia că o nevo lil sas cărdo caște ajutil vi mai but le manușen de aghies. Siles mai but materialea video hai mai but pușimata.
Mai si aver modo te studiiv i Biblia, bi ieche Martoresco le Iehovasco?
Da. Chiar cana but manușa camen te sichion andai Biblia ande iech than ieche Martoreia, chichiva alosaren ca mai anglal te sichion corcore. Andi pagina Instrumentea cai ajutin-tu te studiis i Biblia, va avela te araches mai but materialea cai ajutin-tu te hachiares i Biblia, bi te pochines chanci. Ita chichiva anda lende:
Materialea video bazome pi Biblia: cadal lecții video harne explichin chichiva sicaimata biblico importanto.
Răspunsuri pușimatande biblico: cadal articolea den răspunso ca mai but feluri pușimata biblico.
Versetea biblico explichime: cadal articolea explichin expresii hai versetea biblico prinjiande.