LECȚIA 32
O Regato le Devlesco rail acana!
O Regato le Devlesco astardea te rail ando cerii ando bărș 1914. Sa ande codo bărș, astarde vi le palutne ghiesa anda o raimos le manușengo. Catar jianas cadai buchi? Ande cadai lecția va avela te dichas iech profeția biblico, hai vi sar parudea-pe i lumea hai o phiraimos le manușengo anda o bărș 1914 ji acana.
1. So phendea de mai anglal i Biblia?
Anda o lil biblico Daniel hachiaras că o Regato le Devlesco avelas te astarel te rail cana terminilas-pe iech perioada cai bușiol „efta timpuri”. (Daniel 4:16, 17) But bărșa pala codoia, o Isus phendea anda sa cadai perioada că si „le timpuri cai sas dine le națiunenghe” hai mai phendea că cadala ci terminisarde-pe încă. (Luca 21:24) Cadea sar va avela te dichas, le efta timpuri terminisarde-pe ando bărș 1914.
2. Sar parudea-pe i lumea hai o phiraimos le manușengo anda o bărș 1914?
Le discipoli pușle le Isusos: „Savo va avela o semno cai va sicavela chi prezența hai o phandaimos cadale sistemosco?”. (Matei 24:3) O Isus phendea lenghe că, pala soste va astarela te rail sar Rege ando Regato le Devlesco, va avena mai but buchia, sar avenas le marimata, o bochalimos hai le izdraimata phuveache. (Citisaren Matei 24:7.) Mai but, i Biblia phendea de mai anglal că, anda codoia că le manușa va phiravena-pe nasul, andel „ghiesa de palal” va avena timpuri phare, „cai phares va cărdiola lenghe fața”. (2 Timotei 3:1-5) Anda o bărș 1914, sea cadal buchia dichen-pe vi mai but.
3. Sostar si le buchia pi phuv sea mai nasul de cana o Regato le Devlesco rail?
Ca țâra timpo pala soste o Isus sas cărdo Rege ando Regato le Devlesco, vo phiradea iech marimos ando cerii contra o Beng hai lesche demoni. O Beng hasardea codo marimos. I Biblia phenel că „sas-lo șiudino pi phuv, hai lesche îngeri sas-le șiudine ande iech than leia”. (Revelația 12:9, 10, 12) Le Benghes siles iech bari holi, anda codoia că jianel că va avela mudardo. Cadea că, vo si codo cai cherel but nasulimos hai anel pe sea i phuv iech bari duch. Cadaia ajutil-ame te hachiaras sostar aghies andi lumea, le buchia jian cadea de nasul. O Regato le Devlesco va chosela pa i phuv sea cadal ducha.
HACHIAR MAI MIȘTO
Va avela te hachiares catar jianas că o Regato astardea te rail ando bărș 1914 hai so trebul te cheras amen anda codoia că jianas cadai buchi.
4. Cana înghinas le bărșa pala sar sicavel i Biblia, arăsas co bărș 1914
O Del dea le reges Nebucadnețar, anda o Babilono purano, iech suno ande savo sicadea lesche so va avela. Citisaras anda cado suno hai anda o hachiarimos cai dea-les lesche o Daniel, andi Biblia. Ande cado suno delas-pe duma vi anda o raimos le regesco Nebucadnețar, tha vi anda o Regato le Devlesco. (Citisaren Daniel 4:17.)a
Citisaren Daniel 4:20-26 hai pala codoia den duma anda le imagini cai aven:
A) So dichlea o Nebucadnețar ando suno? (Dich le versetea 20 hai 21.)
B) So avelas te avel le cașteia? (Dich o verseto 23.)
C) So avelas te avel pala le „efta timpuri”? (Dich o verseto 26.)
O cașt anda o suno le regesco Nebucadnețar hai o Regato le Devlesco
I PROFEȚIA (Daniel 4:20-36)
O raimos
A) Iech cașt zurales baro
O raimos si așado
B) „Șinen o cașt” hai mechen „te nachen efta timpuri”
O raimos silo andino parpale
C) „O Regato va avela pale chiro”
I iechto var cana pherdilea-pe i profeția . . .
D) Con si o cașt? (Dich o verseto 22.)
E) Sar sas așado lesco raimos? (Citisaren Daniel 4:29-33.)
F) So sas le regeia Nebucadnețar cana nachle le „efta timpuri”? (Citisaren Daniel 4:34-36.)
I IECHTO DATA CANA PHERDILEA-PE
O raimos
D) O Nebucadnețar, o rege le Babilonosco
O raimos si așado
E) Pala o bărș 606 a.a.e., o Nebucadnețar hasarel peschi goghi hai lesco raimos si așado efta bărșa
O raimos silo andino parpale
F) Le reges Nebucadnețar siles pale iech goghi sastevesti hai rail pale
I duito var cana pherdilea-pe i profeția . . .
G) Con si o cașt? (Citisaren 1 Cronici 29:23.)
H) Sar sas așado lengo raimos? Catar jianas că cado raimos sas așado vi cana o Isus sas-lo pi phuv? (Citisaren Luca 21:24.)
I) Cana hai cai sas andino parpale cado raimos?
I DUITO DATA CANA PHERDILEA-PE
O raimos
G) Le regi israeliți cai raisarde opral o poporo le Devlesco
O raimos si așado
H) O Ierusalimo silo distrugime hai o raimos le regengo israeliți si așado 2520 bărșa
O raimos silo andino parpale
I) O Isus astarel te rail ando cerii sar Rege le Regatosco le Devlesco
Chichi timpo si le efta timpuri?
Chichiva versetea andai Biblia ajutin-ame te hachiaras le coaveren. Sar exemplo, anda o lil biblico Revelația hachiaras că trin timpuri hai dipaș si 1 260 ghiesa. (Revelația 12:6, 14) Efta timpuri si dui-var cado număro, adică 2 520 ghiesa. Poiechdata, andi Biblia, o cuvânto „ghies” sicavel iech bărș. (Ezechiel 4:6) Cadea că, le efta timpuri anda o lil Daniel si 2 520 bărșa.
5. I lumea parudea-pe anda o bărș 1914
O Isus phendea de mai anglal sar va avela i viața pi phuv pala so vo va arăsăla Rege ando cerii. Citisaren Luca 21:9-11 hai pala codoia den duma:
So buchia anda save dea duma o Isus dichlean sau așundean că si andi lumea?
O apostolo Pavel phendea sar va avena le manușa andel ghiesa de palal. Citisaren 2 Timotei 3:1-5 hai pala codoia den duma:
Dichlean vi tu manușa cai phiraven-pe cadea ande amare ghiesa?
6. O raimos le Regatosco le Devlesco trebulas te spidel-ame te cheras vareso
Citisaren Matei 24:3, 14 hai pala codoia den duma:
So bari buchi cai cherel-pe aghies sicavel că o Regato le Devlesco rail?
Sar daștis vi tu te cheres cadai buchi?
O Regato le Devlesco rail acana ando cerii hai na pa but timpo va raila vi opral sea i phuv. Citisaren Evrei 10:24, 25 hai pala codoia den duma:
So trebulas te cherel fiesavo anda amende acana că dichas că „o ghies pașiol”?
Dacă jianeias iech buchi cai daștilas te ajutil sau chiar te hastravel averen, so chereias?
UNII DAȘTINAS TE PUȘEN-TU: „Sostar le Martori le Iehovasche den duma cadea de but anda o bărș 1914?”.
Tu so pheneias lenghe?
SO SICHILEAM
Cana înghinas le bărșa pala le profeții biblico hai dichas le buchia cai si andi lumea, jianas că o Regato rail. Sicavas că pachias cadaia, cana phenas i vestea lași hai jias ca le întruniri.
So dichleam
So sas pala le efta timpuri anda save dea duma de mai anglal o lil biblico Daniel?
Sostar pachias că o Regato le Devlesco rail anda o bărș 1914?
Sar daștis te sicaves că pachias că o Regato le Devlesco rail aghies?
RODE MAI BUT
Va avela te diches so phenen chichiva istorici hai aver manușa anda le paruimata cai si andi lumea anda o bărș 1914.
„De cana ci mai si i lumea cadea de uji moralo” (Ușten!, aprilia 2007)
Va avela te diches sar parudea i viața ieche murșeschi i profeția anda o Matei 24:14.
„O baseballo sas mânri viața!” (O Turno de veghe, nr. 3 2017)
Catar jianas că i profeția anda o Daniel, o capitolo 4, del duma anda o Regato le Devlesco?
„Cana astardea te rail o Regato le Devlesco? (Iechto partea)” (O Turno de veghe, 1 octombria 2014)
Catar jianas că le „efta timpuri” anda o Daniel, o capitolo 4 phandade-pe ando bărș 1914?
„Cana astardea te rail o Regato le Devlesco? (Duito partea)” (O Turno de veghe, 1 noiembria 2014)
a Dich le palutne dui articolea catar i secțiunea „Rode mai but” anda cadai lecția.