Na pa but timpo, prin pesco Regato, o Iehova va chosela sea-l pharimata le manușenghe. Cadai vestea sili cadea de șucar, că sea-l manușa trebun te așunen-la. O Isus camlea ca lesche discipoli te phenen savorenghe cadai vestea lași! (Matei 28:19, 20) Sar cheren le Martori le Iehovasche cadai buchi pala i porunca cai dea-la o Isus?

1. Sar pherdiol-pe ande amare ghiesa o Matei 24:14?

O Isus phendea: „Cadai vestea lași anda o Regato va avela phendi pe sea i phuv”. (Matei 24:14) Le Martori le Iehovasche cheren cadai buchi pherde bucuria. Amen phenas i vestea lași pe sea i phuv ande mai but sar 1 000 șiba! Cadaia si iech buchi zurales bari. Anda codoia trebul te das sea amari zor hai te avas mișto organizime. Cadai buchi ci daștilas te avel cărdi bi te ajutil-ame o Iehova.

2. Sar das amari zor caște phenas le manușenghe i vestea lași?

Amen phenas i vestea lași oricai arachas manușa. Sa cadea sar cărde le creștini anda o iechto secolo, vi amen phenas cadai vestea „chăr chărestar”. (Faptele 5:42) Cadea, daisaras te das duma milioanea manușența ande fiesavo bărș. Anda codoia că ci arachas le manușen sea o timpo chăre, phenas i vestea lași vi andel thana cai chiden-pe but manușa. Amen rodas sea o timpo te das duma le manușența anda o Iehova hai anda so va cherela vo.

3. Con trebul te phenel le manușenghe i vestea lași?

Sea le ciace creștini trebun te phenen i vestea lași averenghe. Anda amende cadai buchi si zurales importanto. Jianas că cadai vestea daștil te salvil i viața le manușenghi, anda codoia das sea amari zor caște das duma chichi mai but lența. (Citisaren 1 Timotei 4:16.) Ci sam pochinde te cheras cadai buchi, anda codoia că i Biblia phenel: „Bi lovengo primisardean, bi lovengo te den”. (Matei 10:7, 8) But manușa ci camen te așunen-ame. Cu sea cadala, amen phenas mai dur i vestea lași, anda codoia că cadea camel o Iehova hai camas te bucurisaras lesco ilo.

HACHIAR MAI MIȘTO

4. Das sea amari zor caște arăsas ca sea le manușa

MATERIALO VIDEO: Phenas i vestea lași „ji ande o mai duriardo than la phuveaco” (7:33)

• So si ande chio ilo cana diches sar le Martori le Iehovasche den sea penghi zor te phenen i vestea lași?

Citisaren Matei 22:39 hai Romani 10:13-15 hai pala codoia den duma:

• Sar sicavas prin i buchi cai cheras-la că iubisaras le manușen?

• Sar dichel o Iehova codolen cai phenen i vestea lași? (Dich o verseto 15.)

5. Amen cheras buchi ande iech than le Devleia

Si but exemplea cai sicaven că o Iehova si amența cana cheras leschi buchi. Sar exemplo, ande iech teharin, iech jiuvli anda Noua Zeelandă manglea-pe le Devlesche te bișalel late varecas cai te ajutil-la te prinjianel-les. Voi phendea lesche po anav, Iehova, cana manglea-pe. Pala numai trin ceasuri, iech phral po anav Paul, cai sas andi buchi le Devleschi chăr chărestar, mardea ca laco udar.

Citisaren 1 Corinteni 3:9 hai pala codoia den duma:

• Sar sicavel cado exemplo hai vi aver, că o Iehova si amența cana cheras leschi buchi?

Citisaren Faptele 1:8 hai pala codoia den duma:

• Sostar trebul amenghe o ajutorii le Iehovasco caște cheras leschi buchi?

Jianglean că?

Ca i întrunirea cai si ando mașcar le curchesco, sam sicade sar te phenas averenghe i vestea lași. Dacă sanas ca iech anda cadal întruniri, sar fal-tu o sicaimos cai primisaras-les code?

6. Amen phenas i vestea lași anda codoia că așunas le Devlestar

Ando iechto secolo, sas manușa cai camle te așaven le discipolen le Isusosche caște na mai phenen i vestea lași. Le dintune creștini cărde sea so daisarde caște na hasaren pengo drepto te den duma anda o Del, hai dine sea penghi zor caște cheren ca „i vestea lași te arăsăl te avel legalo”. (Filipeni 1:7) Vi le Martori le Iehovasche de aghies cheren sa cadea.a

MATERIALO VIDEO: Sar las sama ca i vestea lași te arăsăl te avel legalo (2:28)

Citisaren Faptele 5:27-42 hai pala codoia den duma:

• Sostar phenas mai dur i vestea lași, chiar cana aver așen amenghe contra? (Dichen le versetea 29, 38 hai 39.)

SO SICHILEAM

O Isus phendea pesche discipolenghe te phenen i vestea lași sea le manușenghe. O Iehova ajutil pesche manușen te cheren cadai buchi.

So dichleam

• Sar si phendi i vestea lași pe sea i phuv?

• Sar sicavas că iubisaras le manușen prin i buchi cai cheras-la?

• Pachias că dacă phenas averenghe i vestea lași, cadai buchi daștil te pherel amaro ilo bucuriatar? Sostar?

RODE MAI BUT

Va avela te diches sar phenen le Martori le Iehovasche i vestea lași andel bare foruria.

I mărturia publico andel bare foruria – ando Pariso (5:11)

Sar ajutisarde le Martori le Iehovasche codolen cai sas-le refugiați?

I vestea lași arăslea ca le refugiați cai sas-le trușale pala o ciacimos (5:59)

Va avela te diches so bucurii sas iecha pheia anda codoia că alosardea te cherel mai but andi buchi le Devleschi.

Som bucurime că alosardem te cherav cadai buchi (6:29)

Va avela te diches chichiva victorii juridico bare, cai cărde ca i buchi le Devleschi te jial mai dur hai te bariol.

„Codola cai phenen i vestea anda o Regato jian andi instanța caște aven-le mai dur cado drepto” (O Regato le Devlesco rail!, o capitolo 13)

O Isus phendea că le creștini trebun te aven bolde. (Citisaren Matei 28:19, 20.) Tha so si o bolimos? Hai so trebul te cherel iech manuș caște arăsăl te bolel-pe?

1. So si o bolimos?

O cuvânto „bolel” avel andai șib grecisco hai însemnol „te avel șiuto cu sea” ando pai. Cana o Isus sas boldo, vo sas-lo șiuto cu sea ando Iordano, pala codoia „vazdea-pe anda o pai”. (Marcu 1:9, 10) Sa cadea, le ciace creștini, cana sile bolde, sile șiutea cu sea ando pai.

2. So sicavel o bolimos?

O bolimos sicavel că o manuș dea peschi viața le Iehovasche. Sar daștil varecon te del peschi viața le Devlesche? Angla te bolel-pe, o manuș phenel iech manglimos, cana si numai vo corcoro le Iehovaia, hai phenel lesche că camel te slujil-les anda sea o timpo. Vo solaharel că va anela închinarea numai le Iehovasche hai că i mai importanto buchi ande leschi viața va avela te cherel so manghel lestar o Del. Vo alosarel ‘te na mai trail anda peste, tha te lel-pe sea o timpo pala’ o exemplo hai le sicaimata le Isusosche. (Matei 16:24) Cana das amari viața le Devlesche hai bolas-ame, va avela-ame iech amalimos chidino le Iehovaia hai codolența cai anen lesche închinarea.

3. So trebul te cherel iech manuș caște arăsăl te bolel-pe?

Angla o bolimos, trebul te sichios anda o Iehova hai te bariares chio pachiamos ande leste. (Citisaren Evrei 11:6.) Cana va avela te prinjianes mai mișto le Iehovas hai te pachias-tu ande leste, va avela te iubis-les vi mai but. Pala codoia, va cameia te des duma averența anda leste hai te avel-tu iech phiraimos cadea sar vo camel. (2 Timotei 4:2; 1 Ioan 5:3) Cana ieche manușes siles „iech phiraimos cadea sar camel o Iehova”, daștil-pe că va camela te del peschi viața le Devlesche hai te bolel-pe.a (Coloseni 1:9, 10)

HACHIAR MAI MIȘTO

4. So sichioas anda o bolimos le Isusosco

Caște dichen sar sas o Isus boldo, citisaren Matei 3:13-17 hai pala codoia den duma:

• Sas boldo o Isus pala so năștisailea?

• Sar sas-lo boldo? Sas-lo numai chinghiardo paieia?

Pala o bolimos, o Isus astardea te cherel pi phuv i buchi cai dea-la lesche o Del. Citisaren Luca 3:21-23 hai Ioan 6:38 hai pala codoia den duma:

• Pala soste o Isus boldea-pe, savi buchi șiutea vo po iechto than ande peschi viața?

5. Daștis te arăsăs co bolimos

Daștil-pe că acana fal-tu că si prea pharo te des chi viața le Devlesche hai te boles-tu. Cu sea cadala, dacă ci meches-tu hai jias mai dur, va avela te arăsăs te pachias că vi tu daștis te cheres cadai buchi importanto. Caște prinjianes vi avere manușen cai cărde cadai buchi, dichen o MATERIALO VIDEO.

MATERIALO VIDEO: Te zuriaras amaro amalimos le Iehovaia (1:11)

Citisaren Ioan 17:3 hai Iacov 1:5 hai pala codoia den duma:

• So daștil te ajutil ieche manușes te arăsăl co bolimos?

1. Cana das amari viața le Iehovasche, solaharas lesche că va avela te slujisaras-les anda sea o timpo

2. Cana bolas-ame, sicavas averenghe că deam amari viața le Devlesche

6. Cana boles-tu, aves andi familia le Iehovaschi

Iech manuș cai bolel-pe cherel partea andai familia chidini le Iehovaschi pa sea i phuv. Chiar cana avas anda mai but thana hai sam diferime, savore pachias sa codol buchia hai traisaras cadea sar sicavel-ame i Biblia. Citisaren Psalmo 25:14 hai 1 Petru 2:17 hai pala codoia den duma:

• Pala so iech manuș bolel-pe, sar va avela lesco amalimos le Iehovaia hai codolența cai anen lesche închinarea?

SO SICHILEAM

O Isus sicadea-ame că le creștini trebun te aven bolde. Caște arăsăl co bolimos, iech manuș trebul te bariarel pesco pachiamos ando Iehova, te trail cadea sar sicavel-ame i Biblia hai te del peschi viața le Devlesche.

So dichleam

• So si o bolimos hai sostar trebul te cheras-les?

• So sicavel o bolimos?

• So trebul te cherel iech manuș angla te del peschi viața le Devlesche hai te bolel-pe?

RODE MAI BUT

Va avela te diches so si hai so na-i o bolimos.

„So si o bolimos?” (Articolo pa amaro site-o)

Va avela pale te diches, so trebul te cherel iech manuș caște arăsăl co bolimos.

„I iubirea hai i recunoștința anda o Iehova va cherena-tu te cames te boles-tu” (O Turno de veghe, martia 2020)

Va avela te diches sostar iech murș alosardea te bolel-pe.

„Von camle te hachiarav corcoro că cado si o ciacimos” (O Turno de veghe, 1 februaria 2013)

Va avela te diches so miștimata anel tuche o bolimos hai sar daștis te arăsăs leste.

„Te bolav-ma?” (Le tărne pușen-pe – Răspunsuri cai ajutin-le, O duito lil, o capitolo 37)