O Isus phendea: „Va vazdela-pe națiunea contra națiunea hai regato contra regato. Va avena bare izdraimata phuveache hai anda iech than ande aver țâra hamasco hai bare nasfalimata”. (Luca 21:10, 11) Cadea sar le linii pa iech nai cheren iech amprenta, sa cadea, sea cadal evenimentea ande iech than cheren iech corcoro semno. Hai cadea sar iech amprenta digitalo sicavel con si iech jeno, sea cadal evenimentea cai întâmplon-pe ande sa codo timpo, sicaven că „o Regato le Devlesco silo pașă”. Pherdile-pe ciaces sea cadal evenimentea ande sa codo timpo, pe sea i phuv? Te dichas le dovezi.

2. IZDRAIMATA PHUVEACHE

I revista Britannica Academic phenel că ande fiesavo bărș, cam 100 izdraimata phuveache cheren „bare pagube”. O servicio de prospectare geologică andal Statele Unite phenel că, pala le rapoartea andal palutne 100 bărșa, ajucăras-ame ca, ande fiesavo bărș, te aven cam 16 bare izdraimata phuveache”. Unii phenen că ci si mai but izdraimata phuveache, tha că acana si aparatea mai lașe cai sicaven-le sea. Tha, o ciacimos si că le bare izdraimata phuveache pa sea i phuv, anen but ducha hai mudaren mai but manușa sar oricana.

3. BOCHALIMOS

O bochalimos cai si aghies pe sea i phuv cărdilea anda le but marimata, corupția, criza economico, că i phuv ci mai del pesco rodo hai anda codoia că le manușa ci jianen te încăren tela o controlo le paruimata meteo. Iech raporto anda o Programo Alimentaro Mondialo catar o ONU anda 2018 phenel: „Pi phuv, 821 milioanea manușen silen țâra hamos; mașcar lende 124 milioanea manușen nai-len chanci so te han”. Ande fiesavo bărș, meren cam 3,1 milioanea șiave anda codoia că ci silen so te han. Ando bărș 2011, cam 45% anda le șiave cai mule, mule bochatar.

4. NASFALIMATA HAI EPIDEMII

Iech revista anda i Organizația Mondialo anda o Sastimos phenel: „O secolo 21 nachlea deja prin bare epidemii. Avile parpale nasfalimata cai sas andal timpuri purane, sar si i holera, i ciuma hai i febra galbeno, hai avile neve nasfalimata, sar si SARS [o Sindromo respirator acut sever], i gripa pandemică, MERS [o Sindromo respirator anda o Oriento Mijlociu], Ebola hai Zika.” Hai i palutni sas i pandemia de COVID-19. Chiar cana le manușa sicade hai le medici dine penghi zor caște sichion mai but andal nasfalimata, von ci arachle tratamentea anda lende.