Sostar si nasulimos hai duch?

Cana avel andi viața le manușenghi iech buchi cai duchavel-le zurales but, si normalo ca von te pușen-pe: „Sostar?”. Ce șucar că i Biblia del răspunso claro cadale pușimaste!

1. Sar andea o Satan o nasulimos andi lumea?

O Satan o Beng, ci mai camlea te așunel le Devlestar hai șiutea-pe contra lesche. Vo camlea ca savore te aven tela lesco vast, anda codoia athadea le dintune manușen, le Adamos hai la Eva, caște aven vi von contra le Devlesche. O Beng țârdea le manușen de leschi rig prin iech hohaimos cai phendea-les la Evache. (Geneza 3:1-5) Vo cărdea-la te pachial că o Iehova garavelas latar vareso lașio hai că le manușa avenas mai fericime dacă ci așunenas le Devlestar. O iechto hohaimos cai phendea-les o Satan, sas cana phendea la Evache că ci va merela. Anda codoia, i Biblia phenel că o Satan si „iech hohamno hai o dad le hohaimasco”. (Ioan 8:44)

2. So alosarde o Adam hai i Eva te cheren?

O Iehova dea anda sea o ilo le Adamos hai la Eva sea so trebulas lenghe. Vo phendea lenghe că daștinas te han anda orisavo cașt anda i bar le Edenoschi, tha numa anda iech te na han. (Geneza 2:15-17) Cu sea cadala, von alosarde te han chiar anda codo cașt. I Eva „lea anda lesco rodo hai halea”, hai pala codoia „halea” vi o Adam. (Geneza 3:6) Niciech anda lende ci așundea le Devlestar. Anda codoia că o Adam hai i Eva sas-le perfecți, sas ande lende te cheren so si mișto. Von alosarde te na așunen le Devlestar; von camle cadai buchi. Cadea, von păcătuisarde hai sicade că ci camen ca o Del te phenel lenghe so te cheren hai so te na cheren. Cadal buchia ande lenghe but duch. (Geneza 3:16-19)

3. So buchi nasul cărde amenghe o Adam hai i Eva?

Cana păcătuisarde, o Adam hai i Eva arăsle imperfecți hai anda codoia, cana năștisaile, vi lenghe șiave sas-le sa cadea. „Prin iech corcoro manuș avilea o păcato andi lumea hai prin o păcato o merimos, hai cadea o merimos nachlea ca sea le manușa”. (Romani 5:12)

Cadea că, sostar sam duchade? Si mai but motivea. Poiechdata sam duchade anda codoia că las decizii nasul. Aver data sam duchade anda codoia că aver manușa len decizii nasul. Hai poiechdata sam duchade anda codoia că sam ando than nelașio co momento nelașio. (Citisaren Eclesiasto 9:11.)

HACHIAR MAI MIȘTO

4. Con si doșalo anda codoia că amen sam duchade?

But manușa pachian că i lumea si tela o zuralimos le Devlesco. Savo si o ciacimos? Dichen o MATERIALO VIDEO.

MATERIALO VIDEO: Tela casco zuralimos si i lumea? (1:24)

Citisaren Iacov 1:13 hai 1 Ioan 5:19 hai pala codoia den duma:

• Si o Del doșalo anda i duch hai o nasulimos cai si aghies andi lumea?

5. Sar arăslea i lumea de cana si tela o zuralimos le Benghesco?

MATERIALO VIDEO: Sostar mechel o Del i suferința? (iech cotor) (3:07)

Citisaren Geneza 3:1-6 hai pala codoia den duma:

• So hohaimos phendea o Satan? (Dich le versetea 4 hai 5.)

• Sar cărdea o Satan le manușen te pachian că o Iehova garavelas lendar vareso lașio?

• Sas ciacimos le Satanos cana phendea că le manușa ci trebun te așunen le Iehovastar caște aven fericime?

Citisaren Eclesiasto 8:9 hai pala codoia den duma:

• Sar jian le buchia de cana i lumea ci si tela o zuralimos le Iehovasco?

1. O Adam hai i Eva sas-le perfecți hai beșenas ando Paradiso. Tha așunde le Benghestar hai așile contra o Iehova

2. De cana von alosarde te așunen le Benghestar, i lumea si iech than pherdo păcato, duch hai merimos

3. O Iehova va chosela o păcato, i duch hai o merimos. Le manușa va avena pale perfecți hai va traina ando Paradiso

6. O Iehova dichel amari duch

So si ando ilo le Devlesco cana dichel că sam duchade? Dich so scriisarde o rege David hai o apostolo Petru. Citisaren Psalmo 31:7 hai 1 Petru 5:7 hai pala codoia den duma:

• So si ande chio ilo cana jianes că o Iehova dichel chi duch hai că duchal-les tutar?

SO SICHILEAM

O Satan o Beng hai le iechto manușa sile doșale anda o nasulimos cai si andi lumea. O Iehova si zurales duchado cana dichel amari duch hai na pa but timpo, va chosela-la.

So dichleam

• So hohaimos phendea o Beng la Evache?

• So buchi nasul cărde amenghe o Adam hai i Eva?

• Catar jianas că o Iehova si duchado cana dichel amari duch?

RODE MAI BUT

Va avela te diches so phenel i Biblia că si o păcato.

„So si o păcato?” (Articolo pa amaro site-o)

Va avela te citis anda o iechto hohaimos cai phendea-les o Beng anda o Iehova andi bar le Edenoschi.

„Sostar mechel o Del i suferința?” (O Turno de veghe, 1 ianuaria 2014)

Chio ilo va avela sastiardo cana va aracheia o răspunso ca iech pușimos pharo.

„Sostar sas o Holocausto? Sostar ci așadea-les o Del?” (Articolo pa amaro site-o)

Va avela te diches so hachiardea iech murș cana dichlea i duch le manușenghi de pașa leste.

Ci mai som corcoro (5:09)

Amen păcătuisaras, nachas prin pharimata hai meras anda codoia că le dintune manușa, o Adam hai i Eva, ci așunde le Devlestar.a Cu sea cadala, ci sam hasarde. O Iehova bișaldea pesche Șiaves, le Isus Cristosos, caște hastravel-ame anda o armai le păcatosco hai le merimasco. I Biblia sicavel-ame că, prin pesco merimos, o Isus pochindea iech răscumpărarea. So si iech răscumpărarea? Si o prețo pochindo ca varecon te avel hastrame. O prețo pochindo le Isusostar sas leschi viața perfecto sar manuș. (Citisaren Matei 20:28.) O Isus daisardeas te trail veșnico pi phuv sar manuș. Tha vo alosardea te merel caște pâtrel amenghe o drom caring sea so o Adam hai i Eva hasarde. Prin cadaia sas sicadi i bari iubirea cai le Isusos hai le Iehovas silen caring amende. Cadai lecția va ajutila-tu te diches vi mai cuci o merimos le Isusosco.

1. So miștimata anel amenghe o merimos le Isusosco aghies?

Anda codoia că sam păcătoși, amen cheras but buchia cai duchaven le Iehovas. Cu sea cadala, daștil te avel-ame iech amalimos chidino leia, cana fal-ame ciaces pharo anda le buchia nasul cai cărdeam-le, mangas-les te iertil-ame ando anav le Isusosco hai das sea amari zor te na mai cheras cadal păcatea. (1 Ioan 2:1) I Biblia phenel: „O Cristoso mulea iech data anda sea o timpo anda păcatea, iech manuș orta anda codola neorta, caște îngărel tumen co Del”. (1 Petru 3:18)

2. So miștimata anel amenghe o merimos le Isusosco ando viitorii?

O Iehova bișaldea le Isusos „ca oricon sicavel pachiamos ande leste te na avel distrugime, tha te avel-les viața veșnico”. (Ioan 3:16) Anda codoia că o Isus mulea anda amende, pa țâra timpo o Iehova va chosela sea le buchia nasul cai andea-le o Adam cana ci așundea le Devlestar. Cadea că, dacă sicavas pachiamos ando merimos le Isusosco, daisaras te bucurisaras-ame viațatar anda sea o timpo ando paradiso pi phuv. (Isaia 65:21-23)

HACHIAR MAI MIȘTO

3. O merimos le Isusosco hastravel-ame anda o păcato hai o merimos

MATERIALO VIDEO: Sostar mulea o Isus? (Partea 1) (2:01)

• So hasardea o Adam anda codoia că ci așundea le Devlestar?

Citisaren Romani 5:12 hai pala codoia den duma:

• So andea tuche o păcato le Adamosco?

Citisaren Ioan 3:16 hai pala codoia den duma:

• Sostar bișaldea o Iehova pesche Șiaves pi phuv?

1. O Adam sas iech manuș perfecto cai ci așundea le Devlestar hai îngărdea le manușen co păcato hai co merimos

2. O Isus sas iech manuș perfecto cai așundea le Devlestar hai va îngărela le manușen ca i perfecțiunea hai ca i viața veșnico

4. O merimos le Isusosco anel miștimata sea le manușenghe

MATERIALO VIDEO: Sostar mulea o Isus? (Partea 2) (2:00)

• Sar daștil-pe ca o merimos ieche corcore manușesco te anel miștimata sea le manușenghe?

Citisaren 1 Timotei 2:5, 6 hai pala codoia den duma:

• O Adam sas iech manuș perfecto cai îngărdea le manușen co păcato hai co merimos. Vi o Isus sas iech manuș perfecto. Sostar o merimos le Isusosco sas iech „lași răscumpărarea” anda le păcatea le manușenghe?

5. I răscumpărarea si o cadouo le Iehovasco anda tute

Le amala le Iehovasche dichen i răscumpărarea sar iech cadouo anda pende. Citisaren Galateni 2:20 hai pala codoia den duma:

• Sar sicadea o Pavel că dichlea i răscumpărarea sar iech cadouo anda peste?

Cana o Adam păcătuisardea, vo hai sea lesche șiave sas-le șiute tela o armai le merimasco. Tha o Iehova bișaldea pesche Șiaves te merel ca tu te daștis te trais anda sea o timpo.

Cana citis le versetea cai aven, gândisar-tu so sas ande le Iehovasco ilo cana dichlea pesche Șiaves prin so bari duch nachlea. Citisaren Ioan 19:1-7, 16-18 hai pala codoia den duma:

• So si ande chio ilo acana că jianes so cărdea o Iehova hai o Isus anda tute?

SO SICHILEAM

Anda codoia că o Isus mulea anda amende, o Iehova daștil te iertil amare păcatea hai te del-ame viața anda sea o timpo.

So dichleam

• Sostar mulea o Isus?

• Sostar o merimos le Isusosco sas iech „lași răscumpărarea” anda le păcatea le manușenghe?

• So miștimata anel tuche o merimos le Isusosco?

RODE MAI BUT

Va avela te hachiares sostar i viața perfecto le Isusoschi si iech răscumpărarea.

„Sar si i jertfa le Isusoschi iech «răscumpărarea anda but manușa»?” (Articolo pa amaro site-o)

Va avela te hachiares so trebul te cheres caște aves hastrame.

„Sar hastravel-ame o Isus?” (Articolo pa amaro site-o)

Daștil te iertil o Iehova chiar vi le bare păcatea?

„Pușimata hai răspunsuri andai Biblia” (O Turno de veghe, 1 mai 2013)

Va avela te diches sar ajutisardea i jertfa le Cristososchi ieche murșes te paruvel pesco phiraimos.

„Ci mai som iech manuș ratavalo” (Articolo pa amaro site-o)