Pe sea i phuv, le manușa dichen diferime o pimos. Poiechdata, unii manușa pien penghe amalența. Aver alosaren te na pien niciechdata. Cu sea cadala, si manușa cai pien ji cana mation. Tha so phenel i Biblia anda o alcoolo?

1. Si nasul te pies alcoolo?

I Biblia ci phenel că si nasul te pies alcoolo. Cana i Biblia del duma anda le daruri cai dea-le amenghe o Del, voi phenel vi anda i „mol, cai cherel voime o ilo le manușesco”. (Psalmo 104:14, 15) Chichiva murșa hai jiuvlea loialo anda save del duma i Biblia pienas poiechdata alcoolo. (1 Timotei 5:23)

2. So sfaturi del i Biblia codolenghe cai alosaren te pien alcoolo?

O Iehova dichel nasul cana varecon piel prea but alcoolo, sau cadichi de but ji cana matiol. (Galateni 5:21) Lesco Cuvânto phenel: „Te na aves mașcar codola cai pien prea but mol”. (Proverbe 23:20) Cadea că, cana alosaras te pias alcoolo – vi cana sam corcore – ci trebulas te pias cadichi de but, ji cana hasaras amari goghi hai ci mai daisaras te încăras parpale amare dumes hai amaro phiraimos, sau te arăsas te peras nasfale. Dacă ci daisaras te încăras-ame parpale, trebulas te na mai pias niciechdata.

3. Sar trebul te dichas codolen cai alosaren te pien hai codolen cai alosaren te na pien alcoolo?

Fiesavo manuș trebul te alosarel corcoro dacă piel sau nici alcoolo. Anda codoia, ci trebul te judechisaras varecas cai camel te piel iech țâra hai nici te cheras varecas te piel alcoolo dacă ci camel. (Romani 14:10) Cadea că, si mai mișto te alosaras te na pias, cana cadaia peravel averen. (Citisaren Romani 14:21.) Va avela te rodas ‘na amaro miștimos, tha averengo’. (Citisaren 1 Corinteni 10:23, 24.)

HACHIAR MAI MIȘTO

4. Tu alosares dacă pies sau nici alcoolo

Sar dichlea o Isus o alcoolo? Hachiaras cadaia, anda o iechto miracolo cai cărdea-les o Isus. Citisaren Ioan 2:1-11 hai pala codoia den duma:

• So sichioas anda cado miracolo anda sar dichel o Isus o alcoolo hai codolen cai pien?

• O Isus ci phendea că si nasul te pies alcoolo. Cadea că, sar trebul te dichel iech creștino varecas cai alosarel te piel?

Cu sea cadala, chiar cana na-i nasul ca iech creștino te piel alcoolo, cadaia ci însemnol că si sea o timpo mișto te piel. Citisaren Proverbe 22:3 hai pala codoia den duma dacă si mișto sau nici te pies ande cadal situații:

• Va avela te trades i mașina sau te folosisares iech utilajo.

• San phari.

• Iech doctoro phendea tuche te na pies alcoolo.

• Ci daștis te pies numai iech țâra, sea o timpo pies prea but.

• I legea ci mechel-tu te pies alcoolo.

• San varecaia cai acana ci mai camel te piel anda codoia că mai anglal pielas prea but.

Trebulas te des alcoolo ca iech abiav sau ca iech petrecerea? Angla te alosares so te cheres, dichen o MATERIALO VIDEO.

MATERIALO VIDEO: Si mișto te dav averen te pien alcoolo? (2:41)

Citisaren Romani 13:13 hai 1 Corinteni 10:31, 32 hai pala fiesavo verseto, roden o răspunso ca o pușimos:

• Sar ajutin-tu cadal versetea te les iech lași decizia andel iacha le Iehovasche?

5. Tu alosares chichi de but alcoolo te pies

Cana alosares te pies, na bâstăr: O Iehova ci dichel nasul te pies alcoolo, tha vo phenel că si nasul te pies prea but. Sostar? Citisaren Osea 4:11, 18 hai pala codoia den duma:

• So daștil te întâmplol-pe cana varecon piel prea but?

So daisaras te cheras caște na arăsas te pias prea but? Trebul te avas modesto. Cadaia însemnol te prinjianas amare limitea, te jianas chichi de but daisaras te pias. Citisaren Proverbe 11:2 hai pala codoia den duma:

• Sostar si mișto te jianes exacto de mai anglal chichi alcoolo va avela te pies?

6. Sar daștis te meches-tu dacă pies prea but

MATERIALO VIDEO: „Ci mai daștisardemas te continuiv cadea” (6:32)

• Sar phiravelas-pe o Dimitri cana pielas prea but alcoolo?

• Sas lesche ușoro te mechel-pe catar o pimos?

• Sar daisardea te mechel-pe catar o pimos hai te na mai matiol?

Citisaren 1 Corinteni 6:10, 11 hai pala codoia den duma:

• Chichi de nasul si ca varecon te matiol?

• Sar sicaven cadal versetea că varecon cai piel prea but daștil te mechel-pe catar o pimos?

Citisaren Matei 5:30 hai pala codoia den duma:

• Cana o Isus phendea te șinas amaro vast, vo camlea te hachiaras că, poiechdata, caște avas plăcuți le Iehovasche trebul te mechas amendar vareso, chiar cana cadai buchi duchal-ame zurales. So daștis te cheres dacă cames te meches-tu catar o pimos?a

Citisaren 1 Corinteni 15:33 hai pala codoia den duma:

• Sar arăsăs dacă phires codolența cai pien prea but?

SO SICHILEAM

O alcoolo si iech mașcar le daruri cai o Iehova dea-le amenghe caște avas bucurime. Tha vo ci camel te pias prea but sau te arăsas mate.

So dichleam

• So phenel i Biblia anda o alcoolo?

• Sar arăsăn codola cai pien prea but?

• Sar trebulas te dichas codolen cai pien hai codolen cai ci pien alcoolo?

RODE MAI BUT

Sar daștin le tărne te alosaren mișto dacă te pien sau nici alcoolo?

Na mech o alcoolo te ciorel chi goghi (2:31)

Va avela te diches so daștis te cheres caște meches-tu catar o alcoolo.

„Încăr o alcoolo ca lesco than” (O Turno de veghe, 1 ianuaria 2010)

Si mișto ca iech creștino te vazdel o paharo?

„Pușimata catar amare cititori” (O Turno de veghe, 15 februaria 2007)

Andi relatarea „Somas iech baro machiardo cai ci ciailiolas niciechdata”, va avela te diches sar iech murș cai pielas prea but mechlea-pe catar o pimos.

„I Biblia paruvel i viața le manușenghi” (O Turno de veghe, 1 mai 2012)

Savoren placial-ame te alosaras corcore sar te hureavas-ame hai sar te sicavas de avreal. Cana las-ame pala so phenel i Biblia, daisaras te alosaras te phiravas iech hureaimos cai placial-ame, tha cai placial vi le Iehovas. Te dichas so phenel i Biblia anda cadai buchi.

1. So versetea ajutin-ame cana alosaras sar te hureavas-ame hai sar te sicavas de avreal?

Trebul ‘te hureavas-ame pachivales, te na das-ame bare, te sicavas că si amen iech goghi sastevesti’ hai te avas sea o timpo uje, caște dichiol-pe că ‘anas închinarea le Devlesche’. (1 Timotei 2:9, 10) Te dichas cadal ștar buchia: 1) ‘Te hureavas-ame pachivales’. Ca le întruniri la congregațiache dichlean că amen, le Martoren le Iehovasche placial-ame te hureavas-ame ande moduri diferime. Cu sea cadala, amaro hureaimos hai o modo sar lașiaras amare bala sicaven sea o timpo respecto caring amaro Del. 2) Sicavas că ‘na das-ame bare’ cana, prin amaro hureaimos, ci țârdas i atenția caring amende hai nici ci cheras averen te aven-le gânduri melale ande lenghi goghi cana dichen-ame. 3) Sicavas că ‘si amen iech goghi sastevesti’ cana ci camas sea o timpo te las-ame pala i mai nevi moda. 4) Prin o modo sar sicavas de avreal le coaver trebun te dichen că ‘anas închinarea le [ciace] Devlesche’, Iehova. (1 Corinteni 10:31)

2. Sostar trebul te gândisaras-ame ca amare phrala hai pheia cana alosaras sar te hureavas-ame?

Si ciaces că daisaras te alosaras so hureaimata te las pe amende, tha trebul te gândisaras-ame sar dichen aver amaro hureaimos. Amen das sea amari zor te na peravas chanicas, tha ‘te avas cuci andel iacha amare pașardesche hai te cheras so si mișto caște zuriaras-les’. (Citisaren Romani 15:1, 2.)

3. Sar daștil amaro hureaimos te cherel averen te camen te sichion anda o Iehova?

Sea o timpo das amari zor te hureavas-ame șucar, cadea sar trebul; tha vi mai but cheras cadaia cana jias ca le întruniri la congregațiache hai andi lucrarea de predicare. Ci camas ca le manușa te dichen mai but pe amaro hureaimos sar te camen te așunen i vestea lași. Mai but, camas ca o modo sar sicavas de avreal te țârdel le manușen caring o ciacimos hai cadea, te ‘te cheras mai șucar o sicaimos amare Salvatorosco’. (Tit 2:10)

HACHIAR MAI MIȘTO

4. Cana sicavas mișto de avreal, das pachiv le Iehovasche

Savo si o mai baro motivo sostar trebul te las sama te sicavas mișto de avreal? Citisaren Psalmo 47:2 hai pala codoia den duma:

• Sar trebul te hureavas-ame ca le manușa te dichen că o Iehova si amaro Del?

• Tu pachias că trebul te las sama sar sicavas de avreal cana jias ca le întruniri sau andi predicarea? Sostar?

5. Catar jianas sar trebul te hureavas-ame hai sar te sicavas de avreal

Dichen o MATERIALO VIDEO.

MATERIALO VIDEO: „Den pachiv le Devlesche prin sea so cheren” (10:18)

Chiar cana amaro hureaimos si cuci sau nici, vo trebul te avel ujo hai potrivime anda o than cai sam. Citisaren 1 Corinteni 10:24 hai 1 Timotei 2:9, 10 hai pala codoia den duma sostar ci trebul te las pe amende iech hureaimos . . .

• melalo, șindo sau prea lejero.

• cai si prea chidino pe amende, cai dichiol prin leste hai cherel le coaveren te aven-le gânduri melale cana dichen-ame.

Chiar cana le creștini ci mai sile tela i Legea le Moiseschi, von daștin te sichion anda late sar gândil o Iehova. Citisaren Deuteronomo 22:5 hai pala codoia den duma:

• Sostar ci trebul niciechdata ca iech murș te hureavel-pe sar iech jiuvli hai iech jiuvli te hureavel-pe sar iech murș?

Citisaren 1 Corinteni 10:32, 33 hai 1 Ioan 2:15, 16 hai pala codoia den duma:

• Sostar trebul te las sama ca o modo sar sicavas de avreal te na peravel codolen anda o than cai beșas sau le phralen andai congregația?

• Sar placial le manușen de pașa tute te sicaven de avreal hai te hureaven-pe?

• Pachias că si mișto ca iech creștino te phiravel sea so phiraven cadal manușa? Sostar?

SO SICHILEAM

Cana alosaras mișto sar te hureavas-ame hai sar te sicavas de avreal, sicavas respecto caring o Iehova hai vi caring aver.

So dichleam

• Sostar si importanto anda o Iehova sar hureavas-ame hai sar sicavas de avreal?

• So versetea biblico ajutin-ame te alosaras sar te hureavas-ame hai sar te sicavas de avreal?

• So pachian le manușa anda i închinarea ciaci cana dichen amaro hureaimos hai o modo sar sicavas de avreal?

RODE MAI BUT

So sicaves averenghe prin o modo sar hureaves-tu?

„Sar sicavav de avreal?” (Articolo pa amaro site-o)

Va avela te diches sostar si goghiaver te gândis-tu de mai anglal dacă si mișto te cheres tuche iech tatuajo.

„So phenel i Biblia anda le tatuaje?” (Articolo pa amaro site-o)

Va avela te diches vi aver versetea biblico cai ajutin-tu te les lașe decizii.

„Anes pachiv le Devlesche prin o modo sar hureaves-tu?” (O Turno de veghe, septembria 2016)

Va avela te diches sar iech jiuvli cai camlea te avel plăcuto le Devlesche sichilea te dichel lașe iachența o modo sar aver alosaren te hureaven-pe.

„O modo sar le coaver hureavenas-pe hai sicavenas de avreal peradea-ma” (Ușten!, 22 decembria 2003)